Psalms 68

¹NGAI-RĨ, nĩaarahũke, thũ ciake inyaganio; nao amũthũũri more mathenge mbere yake.

²O ta ndogo ũrĩa ĩhurunjũkaga, mahurunjũre o taguo; o ta ũrĩa mũhũra ũringũragwo nĩ mwaki-rĩ, arĩa aaganu o nao marogĩtoma mona ũthiũ wa Ngai!

³No-rĩ, arĩa athingu marokena; gũkenũka nĩmakenũke, me mbere-inĩ ya Ngai: ĩĩ-ni, o na nĩmakengeũke, tondũ wa ũrĩa makenete!

⁴Inĩrai Ngai, inai mũkumie rĩĩtwa rĩake; mwenjerei kĩng’aratua, o we ũcio ũratuĩkania werũ-inĩ e mũkuue nĩ ngari ya mbarathi: rĩĩtwa rĩake-rĩ, nĩ Jahu gĩkenũrũrũkei mbere-inĩ yake.

⁵Nĩwe ithe wa ciana cia ngoriai, na harĩ atumia a ndigwa nĩ mũmatuĩri cira na kĩhooto, o we Ngai, kũu aikaraga, gĩtũũro gĩake gĩtheru.

⁶Ngai-rĩ, arĩa etũũria-gĩthũnũ atũmaga magĩe na mĩciĩ: andũ arĩa ohe amarutaga korokoro akamoimĩria wega-inĩ: ĩndĩ andũ arĩa aremi-rĩ, matũũraga o bũrũri mũng’aru.

⁷Ĩ Ngai, rĩrĩa woimagarire ũtongoirie kĩrĩndĩ gĩaku, o rĩrĩa watuĩkanirie kũrĩa rũng’ũrĩ-inĩ,

⁸Hĩndĩ ĩo thĩ nĩyathingithire, igũrũ narĩo rĩgĩitĩka o kũũra, rĩona ũthiũ wa Ngai; gwata kĩrĩma kĩrĩa gĩa Sinai, nĩkĩainainire nĩ ũndũ wa ũthiũ wa Ngai, o we Ngai wa Isiraeli.

⁹Wee, Ngai, nĩwaminjaminjaga mbura ya ũtana, kũnogora nĩwanogoraga igai rĩaku rĩrĩa rĩanoga.

¹⁰Thama yaku ĩgĩkĩgĩa na ũikaro: tondũ wa wega waku, Ngai, ũgĩkĩbatũra athĩni acio.

¹¹Mwathani-rĩ, nĩaatumũrire na ũhoro, nao andũ-a-nja arĩa maakĩanĩrĩire ngumo maarĩ rũkundi rũnene.

¹²Athamaki ene ita nĩmorĩte, nĩmorĩte! nake mũndũ-wa-nja ũrĩa wĩikarĩire mũciĩ nĩaragayana mataha!

¹³No kwaraha mũgũtinda mwarahĩte ciugũ-inĩ, mũhaana ta mathagu ma ndutura ĩgemete o ta betha, njoya ciayo igagĩkenga o ta thahabu ĩrĩa theru?

¹⁴Hĩndĩ ĩo Mwene-Hinya aanyaganirie athamaki kũndũ kũu-rĩ, no ta rĩrĩa Salimoni kũroira tharunji.

¹⁵Kĩrĩma kĩa Bashani, kĩo nĩ kĩrĩma kĩa Ngai; kĩrĩma kĩa Bashani-rĩ, nĩ kĩrĩa kĩĩ mĩthia mĩraya.

¹⁶Inyuĩ irĩma ici cia mĩthia mĩraya, mũrarora manyiira nĩkĩ kĩrĩma gĩkĩ Ngai eendeire gĩtuĩke gĩtũũro gĩake? Jehova egũtũũra o kĩo tene na tene.

¹⁷Ngari cia Ngai, cia ita, nĩ ngiri ikũmi maita merĩ, nĩ ngiri na ngiri: Mwathani e gatagatĩ gacio ũhoro ũrĩa wa Sinai-rĩ, nĩ mũũku handũ harĩa haamũre.

¹⁸Wee nĩwambatĩte igũrũ, nĩwĩtahĩire itaha rĩaku; thĩinĩ wa andũ nĩwamũkĩire nduhi, ĩĩ-ni, o na harĩ arĩa aremi, nĩguo Jahu Ngai atũũre kuo.

¹⁹Mwathani arogathwo, o we ũtũkuuagĩra mũrigo witũ mũthenya o mũthenya, o we Mũrungu mwene ũhonokio witũ.

²⁰Mũrungu-rĩ, harĩ ithuĩ nĩ Mũrungu wa mahonokania; we Jehova, o we Mwathani, nĩwe mwene ciumĩrĩro cia kuuma gĩkuũ-inĩ.

²¹No rĩ’, Ngai nĩ kũmemenda akamemenda ciongo cia thũ ciake, amemende ruototia rũu rũĩ njuĩrĩ rũa mũndũ ũrĩa ũthiagĩrĩra o na ũgeri wake wa ngero.

²²Mwathani oigire atĩrĩ, Nĩngamagĩra moime Bashani, nĩngamagĩra moime o thĩinĩ wa ndia iria ndiku cia iria:

²³Nĩ getha wee ũgĩtobokie ikinya rĩaku thakame-inĩ, nacio nĩmĩ cia magui maku igĩe na rũgai rũacio harĩ thũ ciaku.

²⁴Mũgendere waku, Ngai, andũ nĩmawine, nĩmoine mũgendere wa Mũrungu wakwa, o we Mũthamaki wakwa, ũgĩthiĩ gũtonya handũ harĩa haamũre.

²⁵Aini nĩo matongoirie, makoimwo thutha nĩ ahũri a inanda, me gatagatĩ ka airĩtu arĩa marahũra tũhembe.

²⁶Gathagai Ngai ciũngano-inĩ cianyu, o we Mwathani mũkĩmũgathage, inyuĩ a rũrĩra rũa Isiraeli.

²⁷Ũrĩa mũnyinyi, Benjamini, o we mwathi wao, nĩkuo arĩ, ningĩ anene a Juda, rũkundi rũao, anene a Zebuluni, o na anene a Nafitali.

²⁸Ĩ Ngai, gĩathe hinya waku warahũke; kandĩra, Ngai, o we wanatwĩkĩra maũndũ.

²⁹Tondũ wa hekarũ yaku ĩĩ kũu Jerusalemu-rĩ, athamaki nĩmagagũtegagĩra matega.

³⁰Rũithia nyamũ ĩrĩa ya gĩthaara-inĩ, kĩrũithie mbũtũ ya ndegwa cia njamba, o hamwe na njaũ, arĩ cio irĩndĩ, ũkĩrangagĩrĩria tũtuĩku twacio twa betha: kĩnyaganie iruka iria ikenagĩra mbaara.

³¹Kũrĩ makang’ũ magoka moimĩte Misiri; Kushi o nakuo nĩgũkahiũha gũtambũrũkĩria Ngai moko.

³²Ĩ kĩinĩrei Ngai, inyuĩ mothamaki maya ma thĩ; gĩkumiei Mwathani na nyĩmbo;

³³Kumiai ũcio ũkuuagwo nĩ igũrũ o rĩrĩa rĩa igũrũ, o rĩu rĩtũire ho kuuma agu na agu: iguai! nĩaratumũra mũgambo, mũgambo o ũrĩa wa hinya.

³⁴Rahai Ngai atĩ nĩwe wĩ hinya: ũkaru wake nĩguo ũgitĩire Isiraeli; matu-inĩ nĩ hinya wake ũiyũire kuo.

³⁵Wee Ngai-rĩ, wĩtigĩrithania waku nĩ mũnene, ũrĩa uumaga handũ harĩa haku haamũre; Mũrungu wa Isiraeli-rĩ, nowe mwĩkĩri kĩrĩndĩ gĩake hinya, o gwata ũhoti. Ngai arokĩgathagwo!