Psalms 67

¹NGAI arotũkinyĩria wega wake, agĩtũrathime, arotũma ũthiũ wake ũtũũre ũtwarĩire;

²Nĩguo njĩra yaku, Ngai, ĩmenyũo gũkũ thĩ, ũhonokania waku ũkĩoneke ndũrĩrĩ-inĩ ciothe.

³Irĩndĩ cia thĩ, Ngai, irogũcokeria ngatho; ũrogathagwo nĩ ndũrĩrĩ cia thĩ ciothe.

⁴Ndũrĩrĩ gũkena nĩikene, o na ikũngũyagie nĩ gũkena, tondũ wee ũrĩciragĩra irĩndĩ o ũrĩa kwerekereire, ndũrĩrĩ cia gũkũ thĩ ũtuĩke mũtongoria wacio.

⁵Irĩndĩ cia thĩ, Ngai, irogũcokeria ngatho; ũrogathagwo nĩ ndũrĩrĩ cia thĩ ciothe.

⁶Thĩ nĩĩrutĩte uumithio wayo; Ngai, o we Ngai witũ, nĩatũrathimĩte.

⁷Kũrathima, Ngai no arĩtũrathimaga; ituri ciothe cia thĩ igĩtuĩke cia kũmwĩtigĩra.