Psalms 66

¹ANĨRĨRAI Ngai na gĩkeno, inyuĩ mabũrũri mothe ma thĩ:

²Inai mũrahe riri wa rĩĩtwa rĩake; gũkumio gwake mũgĩtũme kũgĩe riri.

³Ĩrai Ngai atĩrĩ, Mawĩko maku-rĩ, ĩ matikĩrĩ na wĩtigĩrithanio mũnene! tondũ wa ũrĩa hinya waku wĩ mũnene, thũ ciaku no ciũke ciĩnyihĩrĩrie harĩ wee.

⁴Andũ othe a thĩ nĩwe makainamĩrĩra, na kũina makũinagĩre magĩkũgoocaga; ĩĩ-ni, rĩĩtwa rĩaku rĩo makĩrĩinagĩre.

⁵Ũkai, muone mawĩko ma Ngai; maũndũ marĩa ekaga ciana kĩrĩndĩ nĩ ma gĩĩtigĩrithanio kĩnene.

⁶Iria rĩrĩa inene, we nĩaarĩgarũrire ũrĩa rĩatariĩ rĩgĩtuĩka thĩ niaru; rũũĩ naruo, kĩrĩndĩ gĩkĩrũringa na magũrũ; kũu kũmũkenera tũgĩkĩmũkenera mũno.

⁷Tondũ wa ũguo arĩ ũhoti, atũũraga e mwathani tene na tene; maitho make matũire o macũthagĩrĩria ndũrĩrĩ: arĩa aremi-rĩ, nĩmamenye gũkanetũũgĩria.

⁸Ĩ no kĩgathei Ngai witũ, inyuĩ ĩruka ici cia andũ, oererai mũgambo wa kũmũkumia,

⁹O we ũrĩa ũigĩte ngoro ciitũ harĩa tũngĩikara na muoyo, na ndarekete magũrũ maitũ mahigũrũo.

¹⁰Amu wee, Ngai, nĩũtũgeretie kũroria niũtũroranĩtie, o ta ũrĩa betha ĩroragio rĩrĩa ĩgũtherio.

¹¹Watũmire tũgwatio nĩ wabu ya mũtego; watũigĩrĩire mũrigo mũgongo watũhihinyaga mũno.

¹²Watũmire andũ mahaicĩte mbarathi matũrange mĩtwe; twatuĩkanĩirie mwaki-inĩ o na tũgĩtuĩkanĩria maĩ-inĩ: no rĩrĩ, ũgĩcoka ũgĩtuumĩria wega-inĩ mũingĩ.

¹³Nĩngũtonya nyũmba yaku ndĩ na mahaki ma gũcinwo, ngĩkũhingĩrie mĩĩhĩtwa yakwa,

¹⁴O yo ĩrĩa mĩromo yakwa yatumũrire, kanua gakwa gagĩkĩmĩrĩkia, rĩrĩa ndahatĩkĩtwo.

¹⁵Ngũkũrutĩra ngoima ituĩke cio mahaki ma gũcinwo, hagĩe na mũcingũ wa ndũrũme; ngũruta ndegwa, o hamwe na irũhĩ.

¹⁶Ũkai, mũigue, inyuĩ inyuothe etigĩri Ngai, nĩngũkiumbũra ũrĩa aateithirie muoyo wakwa.

¹⁷Ndatumũrire kanua ngĩmũkaĩra, na rũrĩmĩ-inĩ rũakwa ndarĩ o na ũgooci, ndĩmũtũũgĩrie.

¹⁸Ingĩakorirũo nũmbũĩtie waganu na ngoro yakwa-rĩ, Mwathani ndarĩ hĩndĩ angĩanjiguire:

¹⁹No kaĩ we Ngai nĩakĩnjiguĩte-ĩ! gũthikĩrĩria nĩathikĩrĩirie mũgambo wakwa ngĩmũhoya.

²⁰Ngai arokĩgathwo, o we ũtaigana kũhũndũra ihoya rĩakwa, agĩkĩaga kũnjehereria ũtugi wake.