Psalms 71

¹WEE, JEHOVA, nĩwe ndahĩire; ndũkanakĩreke njonoke.

²Tondũ wa ũthingu waku-rĩ, ndeithũra, ũkĩ’hatũre; nyinamĩrĩria gũtũ, ũ’honokie.

³Harĩ niĩ tuĩka ta ndũmba ya ihiga, ya ũtũũro, harĩa ndĩrĩingagĩra hingo ciothe: wee nĩwathĩte atĩ ’honokagio; nĩ amu rũaro rũakwa rũa ihiga, o na kĩhingo gĩakwa kĩa hinya, no wee.

⁴Ĩ Ngai wakwa, ’hatũra guoko-inĩ kwa ũrĩa mwaganu, guoko-inĩ kwa mũndũ muogogi na ũrĩa ũtarĩ tha.

⁵Nĩ gũkorũo wee, Mwathani Jehova, nowe kĩĩrĩgĩrĩro gĩakwa; ũtũire wĩ mwĩhoko wakwa kuuma ndĩ o mũnyinyi.

⁶Ndũire ndiirĩrĩirũo nĩwe kuuma o ndaciarũo; wee nĩwe wandutire nda ya maitũ; hingo ciothe nowe ndĩĩgĩkumagia.

⁷Harĩ andũ aingĩ niĩ nduĩkĩte ta ũrirũ; no rĩ’, irahĩro rĩakwa rĩa hinya, no wee.

⁸Kanua gakwa karĩiyũraga o ũhoro wa gũgũkumia, gatindage gakĩgana gũtĩĩka gwaku mũthenya wothe.

⁹Ndũkae kũnde hingo ya ũkũrũ; menya gũkandiganĩria hinya wakwa watua kũnyihĩrĩra.

¹⁰Nĩ gũthima thũ ciakwa nĩciaragia ũhoro wakwa; acio moheirie muoyo wakwa nĩmarĩkanagĩra,

¹¹Makoiga atĩrĩ, Ngai nĩamũtiganĩirie: mũthingatei mũmũnyite, amu ndakĩrĩ na mũmũteithũri!

¹²Ĩ Ngai, tiga kũnjikara haraya; Ngai wakwa, no kĩhiũhe kũndeithia.

¹³Acio magendagĩra ngoro yakwa, ta nĩmaconoke, na maninwo; nĩmahumbwo nĩ rũmena, na kĩnyararo, acio mendaga kũnjĩka ũũru.

¹⁴No niĩ-rĩ, ngũikara hingo ciothe ndĩ o na wĩrĩgĩrĩro, na ngakĩragĩrĩria o gũgũkumia.

¹⁵Kanua gakwa no kaganage ũthingu waku, ndindage o ngĩgana ũhonokio waku mũthenya wothe; amu ũhoro ũcio ndiũĩ mũigana waguo.

¹⁶Ngũũka ngĩkumagia mawĩko ma ũhoti ma Mwathani Jehova; ũthingu waku nĩguo ndĩrĩgwetaga, o waku wee wiki

¹⁷Ngai, nĩwe ũtũire ũndutaga kuuma ndĩ o mũnyinyi, na nginya rĩu no nyumbũraga maũndũ ma magegania marĩa waneka.

¹⁸O na ndakũra, nduĩke ndĩ na mbuĩ, Ngai, menya gũkĩndiganĩria, o nginya ngakorũo ndĩkĩtie kuumĩrĩria andũ a rũciaro rũrũ ũhoro wa hinya waku, maũndũ ma ũhoti waku ngakĩonia mũndũ o wothe ũrĩa ũgũũka thutha.

¹⁹Ningĩ ũthingu waku, Ngai, ũkinyĩte o kũrĩa igũrũ: ĩ wee waneka maũndũ manene ũũ-rĩ, nũ ũngĩ, Ngai, ũkĩhaana tawe?

²⁰Wee-rĩ, o wee ũtuonetie mĩnyamaro mĩingĩ o na mĩũru, no ũrĩcoka gũtũriũkia, ũtũrute thĩ tũrĩ kũrĩa kũriku mũno, ũtũcokie igũrũ rĩngĩ.

²¹Ũnene wakwa, wongerere; kĩnjokerere, ũ’nyamarũre.

²²Niĩ na niĩ no ngũcokagĩrie ngatho ngĩinagia kĩnanda, ngathage ũhoro waku wa ma, wee Ngai wakwa; kĩnanda kĩa mũgeto-rĩ, nĩkĩo ndĩrĩkũinagĩra nakĩo, o wee Ũrĩa Mũtheru wa Isiraeli.

²³Rĩrĩa ngũkũgooca na rũĩmbo, mĩromo yakwa nĩĩrĩkũngũyagia mũno, o gwata ngoro yakwa nayo, ĩno ũkũũrĩte.

²⁴Rũrĩmĩ rũakwa rũrĩtindaga rũkĩaria ũhoro wa ũthingu waku mũthenya wothe: nĩ gũkorũo arĩa endi kũnjĩka ũũru nĩ gũconoka maconokete, kũgegeara nĩ agegearu.