Psalms 73

¹ACA, NOGUO Ngai no wega ekaga andũ a Isiraeli, o arĩa matakĩrĩ na ũũru ngoro.

²No niĩ hakwa-rĩ, magũrũ makwa maratigairie hanini mahigũke, makinya makwa magagĩtigaria o hanini matenderũke.

³Nĩ amu ndĩrarĩ na ũiru nĩ ũndũ wa andũ arĩa erahi, nĩ gũkĩona ũrĩa andũ arĩa aaganu matũire magaacĩire.

⁴Nĩ gũkorũo matiiguaga ruo magĩkua; hinya wao ũkoragwo ũrĩ o mũnyitu.

⁵Mationanaga na nditikũ ta andũ arĩa angĩ, o na kana makonio mahũra ta andũ arĩa angĩ.

⁶Nĩkĩo mwĩtĩo ũmaikaraga ta kĩrengeri ngingo-inĩ yao; ũtoi-rĩ, magakĩwĩhumba ta nguo.

⁷Maitho mao tondũ wa ũnoru nĩ kuumĩra moimĩrĩte; indo me nacio gũkĩra ũrĩa ngoro ingĩĩrirĩria.

⁸O nĩ a kĩnyũrũri, na tondũ wa ũũru ũrĩa me naguo, materetaga o ndeto cia ũrĩa marĩthĩnia andũ; kwaria kwao no kwa mwĩtũũgĩrio.

⁹Kanua kao nĩ ta makaigĩte o igũrũ matu-inĩ, rũrĩmĩ rũao rũhungurucũkaga gũkũ thĩ.

¹⁰Tondũ ũcio andũ ake magacoka naho; riita rĩa maĩ rĩiyũru rĩgakĩinĩkĩrĩrio nĩo.

¹¹Makoiga, Mũrungu akĩrĩ mũmenyi na kĩ? Ũrĩa-wĩ-Igũrũ-Mũno arĩ o ũndũ oĩ?

¹²Onei, arĩa aaganu nĩo acio; na tondũ wa gũikaraga o hingo ciothe na thayũ, ũtonga wao nĩwĩongagĩrĩra.

¹³Aca, ti-itherũ, ’theretie ngoro yakwa tũhũ, na no tũhũ ngĩthambia moko rĩĩthambĩro-inĩ rĩa kũnina ũũru;

¹⁴Amu ndindagio na mahũra mũthenya wothe, o rũcinĩ, o rũcinĩ, ngarokaga kũherithio.

¹⁵Ingĩroigire, Nĩ kwaria ngũkĩaria, njuge ũguo-- Hĩ! hau nĩ kũgarũka ingĩragarũkire rũciaro rũrũ, o ciana ici ciaku.

¹⁶Na ndaikara o ngĩĩciria ũhoro ũcio ndĩũmenye, ũratuĩka wa mĩnoga maitho-inĩ makwa;

¹⁷Onginya ndatonya handũ harĩa haamũre ha Mũrungu, na ndĩraitĩka gũtarania ũhoro wao wa thutha.

¹⁸Aca, noguo ũmaigaga kũndũ kũrĩa gũtenderu; nĩũmairũraga makaanangĩka o kwanangĩka.

¹⁹Nĩ atĩa ũguo maagĩkira ihooru o kahinda kanini! nĩ anine nĩ matebebia o kũninwo.

²⁰Ta kĩroto hĩndĩ ĩrĩa mũndũ aahindũka, no taguo, Mwathani, wearahũra, ũkarurũka ciĩruru icio ciao.

²¹Hĩndĩ ĩo ngoro yakwa ĩrathitĩte nĩ kĩeha, na ngagariũkagwo nĩ higo-rĩ,

²²Ndĩraikarĩte ta ndĩ kĩnunwa, noguo ndĩrarigĩtwo; harĩ wee ngahaana o ta nyamũ.

²³No kaĩ hingo ciothe tũrĩ o hamwe nawe-ĩ; nĩ kũ’nyita ũ’nyitĩte guoko kwa ũrĩo.

²⁴Ũrĩndongoragia na ũtaari waku, na thutha ũkangwata ũgeni riri-inĩ.

²⁵Nũ ũngĩ ndĩ nake kũu igũrũ? twĩ nawe-rĩ, gũkũ thĩ o nakuo gũtirĩ kĩndũ ingĩĩrirĩria.

²⁶Mwĩrĩ wakwa o na ngoro no kũhinyara, ĩndĩ Ngai nĩwe ndũmba ya ihiga harĩ ngoro yakwa, o na nowe rũgai rũakwa tene na tene.

²⁷Amu-rĩ, arĩa magũikaraga hanene nĩ gũtoma magatoma; arĩa othe matuĩkaga ahũri ũmaraya nĩ gũtigana nawe, nĩ kũnina ũmaninaga.

²⁸No niĩ-rĩ, gũkuhĩhĩria Ngai, nĩkuo kũnjagĩrĩire; Mwathani Jehova nowe nduĩte irahĩro rĩakwa, mawĩko maku mothe ndĩkĩmaganage.