Psalms 81

¹KŨNGŨIYAI Ngai na kayũ kanene, o we hinya witũ; anĩrĩrai Ngai wa Jakubu mũkenete.

²Arũkanai na thaburi, hũrai kĩhembe, o na kĩnanda kĩa mũgeto kĩrĩa kĩgambi wega, gwata o kĩrĩa kĩngĩ kĩa nga.

³Huhai coro karũgamo ka mweri, ningĩ mweri waiganana, mũthĩ ũrĩa wa gĩathĩ giitũ.

⁴Nĩ amu gĩathĩ kĩu nĩ mũtugo waathirũo Isiraeli, nĩ itua rĩa Ngai wa Jakubu.

⁵Nĩ gwathĩrĩria aagĩathĩrĩirie gĩtuĩke ũira kwa Jusufu, rĩrĩa aathiire gũtharĩkĩra bũrũri wa Misiri: nĩrĩo ndaiguire mwario itaakoretwo njũĩ.

⁶Atĩrĩrĩ, Kĩande gĩake nĩndagĩthengirie harĩ mũrigo; moko make magĩgĩtigithanio na rũgara.

⁷Wee-rĩ, nĩwetanire rĩrĩa warĩ na mĩnyamaro, na niĩ ngĩgũthara harĩ yo; ndagwĩtĩkire ndĩ hitho-inĩ kũrĩa kwarurumaga; wĩ maĩ-inĩ marĩa ma Meriba nĩ kũgeria ndakũgeririe.

⁸Iguai, inyuĩ kĩrĩndĩ gĩakwa, nĩngũmũtaara: na arĩ, Isiraeli, korũo wetĩkĩra kũnjigua!

⁹Gwaku menya gũkagĩa na ngai ng’eni; ngai yumĩte kũngĩ-rĩ, menya ũkamĩthathaiya.

¹⁰Nĩ niĩ Jehova Ngai waku, ũrĩa wakwambatirie akuumĩtie bũrũri wa Misiri: ta athamia kanua mũno, na nĩngũkaiyũria.

¹¹No rĩ’, kĩrĩndĩ gĩakwa gĩtiigana gũthikĩrĩria mũgambo wakwa; Isiraeli-rĩ, ndangĩnjigua.

¹²Ngĩkĩmarekereria marũmĩrĩre ũremi wa ngoro ciao, metwarage na njĩra ya wĩtaari wao ene.

¹³Na arĩ korũo kĩrĩndĩ gĩakwa gĩetĩkĩra kũnjigua, korũo Isiraeli etĩkĩra gũthiaga na njĩra ciakwa!

¹⁴Ndahoria thũ ciao o narua, njokie guoko na kũrĩ acio me muku nao.

¹⁵Athũũri Jehova nĩ kwĩnyihĩrĩria mangĩĩnyihĩrĩria harĩ we: no-o, itĩĩna rĩao, nĩ gũtũũra rĩngĩtũũra nginya tene na tene.

¹⁶O na nĩ kũmahe ingĩmaheaga ngano ĩrĩa ĩrĩ ũnoru marĩage, na ngũhũnagie ũũkĩ ũrĩa uumĩte ndũmba-inĩ ya ihiga.