Psalms 80

¹WEE MŨRĨITHI wa Isiraeli-rĩ, ta tega gũtũ, o wee ũtongoragia Jusufu o ta arĩ rũũru rũa mbũri; wee ũikarĩire makerubi-rĩ, cangarũrũka!

²Wĩ hau mbere ya Efiraimu na Benjamini na Manase-rĩ, hindũra ũhoti waku, ũũke ũtũhonokie.

³Ngai, tũcokererie; tũma ũthiũ waku ware, na nĩtũkũhonoka.

⁴Ĩ Jehova, Ngai mwene mbũtũ cia ita, nĩ nginya rĩ ũgũtũũra ũtogerekagĩra ihoya rĩa kĩrĩndĩ gĩaku?

⁵Ũtũire ũkĩheaga irio o cia maithori, o na kũnyuithia ũgakĩnyuithagia maithori mageretwo na kĩgeri kĩrĩa kĩnene.

⁶Ũtũtuĩte kĩndũ gĩa kũrũagĩrũo nĩ arĩa tũhakaine nao; thũ ciitũ igagĩtũthekaga o gũtũtheka.

⁷Wee Ngai mwene mbũtũ cia ita, tũcokererie; tũma ũthiũ waku ware, na nĩtũkũhonoka.

⁸Warehire mũthabibu ũrutĩte Misiri, ũkĩrutũrũra ndũrĩrĩ, ũkĩũhanda arĩ guo.

⁹Nĩwaũthereirie handũ, naguo ũkĩgwata, ũkĩhamba ũkĩiyũra bũrũri wothe.

¹⁰Irĩma nĩciahumbĩirũo nĩ kĩĩgunyĩ kĩaguo, gwata mĩtarakwa ya Mũrungu ĩgĩkĩhumbĩrũo nĩ honge ciaguo.

¹¹Ũgĩtambia honge ciaguo kinya o iria-inĩ, na thuna ciaguo ũgĩikinyia o Rũũĩ.

¹²Nĩ ũndũ kĩ ũkiunangĩte njirigo ciaguo, ũgagĩĩtuagĩrũo nĩ arĩa othe ehĩtũkĩri na njĩra?

¹³Ngũrũe ĩrĩa yumaga kĩrĩti nĩĩũgũmagia, na nĩũrĩĩkaga nĩ nyamũ cia werũ.

¹⁴Tũcokerere, Ngai mwene mbũtũ cia ita, twagũthaitha: ikia maitho wĩ kũu igũrũ, wone, ũkĩroore mũthabibu ũyũ,

¹⁵O guo mũtĩ ũrĩa guoko gwaku kwa ũrĩo kwahandire, ruo rũhonge rũrĩa werereire nĩ bata waku mwene.

¹⁶Gũcinwo nĩ mũcine nĩ mwaki, gũtemwo nĩũtemetwo; andũ no gũtoma matomaga nĩ ũndũ wa irũithia rĩa gĩthiithi gĩaku.

¹⁷Mũndũ ũcio wahandirũo nĩ guoko gwaku kwa ũrĩo-rĩ, guoko gwaku kũrogĩa igũrũ rĩake, o igũrũ rĩa ũcio mũrũ wa mũndũ, ũcio werereire nĩ bata waku mwene.

¹⁸Na ithuĩ-rĩ, tũtikahũndũka tũtigane nawe: tũriũkie, na nĩtũgũtũũra tũthathayagia rĩĩtwa rĩaku.

¹⁹Jehova Ngai mwene mbũtũ cia ita, tũcokererie; tũma ũthiũ waku ware, na nĩtũkũhonoka.