Psalms 79

¹Ĩ NGAI, andũ a ndũrĩrĩ nĩ atonyu igai-inĩ rĩaku; hekarũ yaku theru gũthahia nĩmamĩthahĩtie; Jerusalemu magũtuĩte o irũndo irũndo.

²Ciimba cia ndungata ciaku macitigĩire marera ma igũrũ, igatuĩka kandũ kamo, mĩĩrĩ ya andũ aku atheru magakĩmĩne nyamũ cia werũ-inĩ.

³Maitangĩte thakame yao ta maĩ mbarĩ ciothe cia Jerusalemu, na gũkaaga ũngĩhota kũmathika.

⁴Nĩ gũtuĩka tũtuĩkĩte kĩmene harĩ arĩa tũhakaine nao, tũgagĩtuĩka a gũthekererũo na kũnyũrũrio nĩ andũ arĩa matũthiũrũrũkĩirie.

⁵Ĩ Jehova, nĩ nginya rĩ ũgũtũũra ũtũrakarĩire ta ũtũrakarĩire nginya tene? ũiru waku ũgũtũũra wakanĩte o ta mwaki?

⁶Itũrũrĩra ndũrĩrĩ marũrũ maku arĩ cio, icio itakũũĩ, ũitũrũrĩre mothamaki macio matathathayagia rĩĩtwa rĩaku.

⁷Nĩ ũndũ Jakubu nĩ kũmũrambũra mamũrambũrĩte, na gwake magagũtua o iganjo.

⁸Ndũgatũririkanĩre mawaganu ma maithe maitũ; ta tũtũngie matha maku na ihenya, amu kũhinya tũrĩ ahinyu mũno.

⁹Tũteithie, wee Ngai mwene ũhonokio witũ, nĩ ũndũ wa riri wa rĩĩtwa rĩaku; tũteithũre, ningĩ ũtũhoroherie mehia maitũ, no ũndũ wa rĩĩtwa o rĩu rĩaku.

¹⁰Nĩ kĩ kĩngĩgĩtũma andũ a ndũrĩrĩ moragie, Ngai wao akĩrĩ ha? kũrĩhĩrio gwa thakame ĩrĩa ĩitĩtwo ya ndungata ciaku-rĩ, tũma kũmenyeke ndũrĩrĩ-inĩ o ithuĩ tũkĩonaga.

¹¹Gũcaya kwa mũgwate-rĩ, reke gũkinye mbere yaku; tondũ wa ũrĩa hinya wa guoko gwaku wĩ mũnene, kĩgitĩre arĩa matuĩrĩirũo gũkua;

¹²Nao andũ acio tũhakaine nao, ũmacokererie ithũri-inĩ ciao maita mũgwanja kĩnyenya kĩao kĩrĩa makũnyenyete, wee Mwathani.

¹³Weka ũguo-rĩ, ithuĩ kĩrĩndĩ gĩaku, o ithuĩ ng’ondu ciaku kwĩrĩithĩria, no tũtũũre tũgũcokagĩria ngatho nginya tene na tene, tũgĩtũũre tũganaga ũkumio waku o nginya njiarũa na njiarũa.