Psalms 78

¹ATĨRĨRĨ, kĩrĩndĩ giitũ, ta tegai matũ mũigue kĩrĩra gĩakwa; inamĩrĩriai matũ manyu mũigue ciugo iria kanua gakwa gekwaria.

²Ngũtumũra kanua njarie na ngerekano; njitũrũre thimo cia maũndũ ma tene,

³Marĩa twanaigua na tũkamamenya, o marĩa maithe maitũ maanatwĩra.

⁴Tũtingĩmahitha ciana ciao, tiga twĩrage rũciaro rũrĩa rũĩ thutha ũkumio wa Jehova, kinya ũhoro wa hinya wake, na wa maũndũ ma magegania marĩa aaneka.

⁵Nĩ gũkorũo nĩ ũira aahandire harĩ mbarĩ ya Jakubu, akĩũtua kĩrĩra thĩinĩ wa Isiraeli; nĩ gwatha aathire maithe maitũ, atĩ maũndũ macio mamenyithie ciana ciao;

⁶Nĩguo rũciaro rũrĩa rũĩ thutha rũmamenye, o cio ciana iria irĩciaragwo; nacio ciarahũke kwĩra ciana ciacio:

⁷Nĩ getha itue Ngai mwĩhoko wacio, na imenye gũkariganĩrũo nĩ mawĩko ma Mũrungu, tiga o kũrũmia irũmagie maathani make;

⁸Na itikahaane ta maithe ma cio, rũciaro rũrĩa rũarĩ rũremi na rũa rũng’athio, rũciaro rũtenyitĩtie ngoro, namo maroho mao mataakindĩirie harĩ Mũrungu.

⁹Ariũ a Efiraimu-rĩ, o na me na mathaita mao na magwete mota, nĩmaahũndũkire mũthenya ũrĩa wa ndathano.

¹⁰Matiarũmirie kĩrĩkanĩro kĩa Ngai, nĩ kũrega maaregire gũtwarana na kĩrĩra gĩake;

¹¹Na nĩ kũriganĩrũo maariganĩirũo nĩ mĩĩkĩre yake, nginya o maũndũ make ma magegania marĩa aanamonia.

¹²We nĩ maũndũ ma kĩgeganio ekire maitho-inĩ ma maithe mao, me bũrũri wa Misiri, kũu gwetagwo werũ wa Zoani.

¹³Nĩ gwatũrania aatũranirie iria, akĩmaringia; maĩ agĩtũma marũgame ta kĩhumbu.

¹⁴Ningĩ mũthenya nĩaamatongoragia na itu, na ũtukũ wothe akamathiĩ mbere na ũtheri wa mwaki.

¹⁵Kũu werũ-inĩ nĩaatũranirie ndũmba cia mahiga, agĩkĩmahe maĩ maingĩ ma kũnyua o ta moimĩte na thĩ kũrĩa kũriku.

¹⁶Rũaro rũa ihiga o naruo agĩtũma ruume ithima cia maĩ, agĩikũrũkithia maikũrũki maigana ta njũĩ.

¹⁷Nao no gũkĩrĩrĩria o kũmwĩhia, o makĩng’athagĩria Ũrĩa-wĩ-Igũrũ-Mũno me bũrũri ũcio wa nyota.

¹⁸Ningĩ ngoro-inĩ ciao makĩgeria Mũrungu nĩ gwĩtia irio nĩ ũndũ wa njeme ĩrĩa maarĩ nayo.

¹⁹Ĩĩ-ni Ngai nĩ kwarĩrĩra maamwarĩrĩire; makĩũrania ũũ: Mũrungu-rĩ, aahota kwara metha werũ-inĩ?

²⁰Ndũmba ya ihiga, ĩĩ, nĩaamĩgũthire, maĩ magĩitũrũrũka boo!-- hakĩgwata gũikũrũka njũĩ: ĩ, irio o nacio, aahota kũheana? aakĩonera kĩrĩndĩ gĩake nyama?

²¹Jehova rĩrĩa aaiguire ũguo agĩtũkũya; mbarĩ ya Jakubu makĩgwatĩrio mwaki wa kũmehia, Isiraeli-rĩ, magĩgĩtogererũo nĩ marakara,

²²Nĩ ũndũ matietĩkirie Ngai, na matiigana kwĩhoka ũhonokania wake.

²³No we agĩatha kũrĩa matu-inĩ, agĩkĩhingũra mĩrango ya igũrũ;

²⁴Akĩmaitũrũrĩra mana ta mbura marĩe, ngano ya kũu igũrũ-rĩ, nĩyo aakĩmaheire.

²⁵Andũ magĩkĩrĩa irio o iria cia ihoti; nĩ rĩĩgu mũingĩ aamarehithĩirie, wa kũmahũnia.

²⁶Aatũmire igũrũ gũũke rũhuho rũrĩa ruumaga na irathĩro, ningĩ rũa na gũthini o naruo akĩrũerekeria na hinya wake.

²⁷Akĩmaharũrũkĩria nyama nyingĩ ta rũkũngũ, nyamũ ii mathagu ciigana o ta mũthanga ũrĩa wĩ ndere-inĩ cia iria.

²⁸Agĩcigũithangia gatagatĩ-inĩ ga kambĩ yao, o kũu mĩena-inĩ ya iraaro ciao.

²⁹Magĩkĩrĩa, makĩhũna mũno; kũmahe nĩaamaheire kĩrĩa maacemekagĩra.

³⁰O mataanakĩiguĩra njeme yao kĩnyiria, irio icio o itaanakinya kuuma tũnua twao,

³¹Marakara ma Ngai magĩtogororoka nĩ ũndũ wao, makĩũraga arĩa atungu gĩkundi, kũirũra magĩkĩirũra aanake a Isiraeli.

³²O na gũtuĩkĩte ũguo, o no gũthiĩrĩrĩra maathiĩrĩire o kwĩhia, na mawĩko make ma magegania matimetĩkie.

³³Tondũ ũcio matukũ mao agĩtũma mathire o tũhũ, mĩaka yao akĩmĩninithia o na matebebe.

³⁴Rĩrĩa aamoraga-rĩ, hĩndĩ ĩo magacoka kũmũũrĩrĩria, magakĩhũndũka magacoka kũrongoria Mũrungu na kĩyo.

³⁵Na makaririkana atĩ Ngai nĩwe ndũmba yao ya ihiga, magakĩririkana atĩ Mũrungu Ũrĩa-wĩ-Igũrũ-Mũno nĩwe mũmakũũri.

³⁶No nĩ kũgathima maamũgathimagĩra kanua, nĩmĩ ciao nĩ kũmũhenia maamũhenagia nacio.

³⁷Nĩ gũtuĩka ngoro ciao itiakindĩirie harĩ we, na ha ũhoro wa kĩrĩkanĩro gĩake matiarĩ a kwĩhokeka.

³⁸Nake-rĩ, tondũ wa ũrĩa e wa matha maingĩ, nĩ kũhumbĩra aahumbagĩra waganu wao, akarega kũmanina; ĩĩ-ni, nĩ kaingĩ eheririe marakara make, akaaga kwarahũra marũrũ make mothe.

³⁹Akaririkana atĩ o no mwĩrĩ o ũguo, wa nyama; no rũhuho, ũrĩa rũhĩtũkaga na rũticoke rĩngĩ.

⁴⁰Nĩ kaingĩ atĩa maamũng’athĩirie me kũu werũ-inĩ, magakĩmũiguithia kĩeha me kũu rũng’ũrĩ-inĩ!

⁴¹No gũcoka maacokaga o kũgeria Mũrungu, o we Ũrĩa Mũtheru wa Isiraeli-rĩ, magakĩmũthirĩkia.

⁴²Matiaririkanaga guoko gwake, kana mũthenya ũrĩa aamakũũrire harĩ mũmaitha;

⁴³Makĩririkane ũrĩa aaringire ciama ciake thĩinĩ wa bũrũri wa Misiri, agĩkĩonania morirũ macio make kũu werũ-inĩ wa Zoani:

⁴⁴Akĩgarũrania njũĩ cia ene-kuo igĩtuĩka thakame, o gwata mĩtaro yao, magĩkĩremwo nĩ kũnyua maĩ mayo.

⁴⁵Agĩtũma ngi kũrĩ o, mĩrumbĩ mĩingĩ mĩingĩ, ikĩmarĩa; na ciũra, nacio ikĩmonũhanga;

⁴⁶Uumithio wao wa mĩgũnda naguo akĩũhe itono, ũrĩmi ũcio wao ũgĩkĩrekererio ngigĩ.

⁴⁷Mĩthabibu yao akĩmĩanangithia mbura ya mbembe, o nginya mĩkũyũ yao agĩkĩmĩanangithia mbembe iria ndungu.

⁴⁸Mahiũ mao o namo akĩmanenganĩra harĩ mbura ĩo ya mbembe, ndũru icio ciao agĩcitigĩra rũheni.

⁴⁹Agĩcoka akĩrekia marakara make marĩa maakanu mamagũĩre, matũkũya, na mathũgũta, na mathĩna, o mbũtũ ya araika arĩa arehi ũũru.

⁵⁰Agĩkĩnyorokeria marakara macio make njĩra; agĩtiga kũriganĩrĩria ngoro ciao na gĩkuũ, mĩoyo yao agĩkĩmĩnenganĩra harĩ mũthiro;

⁵¹Akĩringa marigithathi mothe ma andũ a Misiri, nĩmo mũtũrio wa hinya wa hema-inĩ cia Hamu.

⁵²Nakĩo kĩrĩndĩ gĩake agĩkiumagaria ta ng’ondu, agĩikara agĩkĩerekagĩria o ta rũũru kũu werũ-inĩ.

⁵³Akĩmatwara o megangarĩte, hatarĩ ũndũ megwĩtigĩra, nacio thũ ciao-rĩ, ikĩhubĩkanio nĩ iria.

⁵⁴Akĩya gũkamakinyia rũtere-inĩ rũa kũndũ gwake kwamũre, kĩrĩma-inĩ gĩkĩ guoko gwake kwa ũrĩo kwegũrĩire.

⁵⁵Ningĩ akĩrutũrũra ndũrĩrĩ ithenge mbere yao, agĩkĩmagayania kũu gwacio na mũkanda gũtuĩke magai mao, agĩtũma mĩhĩrĩga ya Isiraeli ĩtũũre hema ciacio.

⁵⁶Ĩndĩ o, Ngai Ũrĩa-wĩ-Igũrũ-Mũno no kũgeria maamũgeragia, o na kũng’athia makamũng’athĩria, makĩaga gũtũũra marũmĩtie maũira marĩa make;

⁵⁷Nĩ gũcoka maacokire na thutha, makĩmũgarũka o ta maithe mao; nĩ kwera merire ta ũta ũrĩa ũhĩtithagia.

⁵⁸Amu nĩmaamũthirĩkagia nĩ kũgĩa na marutĩro mao ma igongona matĩri-inĩ ma kũndũ gũtũũgĩru, na magĩtũma aigue ũiru nĩ ũndũ wa mĩhianano yao ya gwacũhio.

⁵⁹Ũhoro ũcio Ngai nĩaaũiguire, agĩgĩtũkũya, agĩĩthamba Isiraeli o gwĩthamba;

⁶⁰Agĩthama gĩikaro gĩake kĩrĩa kĩarĩ Shilo, o hema ĩrĩa aahandĩte atũũranagie na andũ,

⁶¹Akĩneana kĩrĩa kĩo hinya wake gĩtahwo, o kĩu kĩo igema rĩake agĩkĩneana moko-inĩ ma mũmaitha.

⁶²Kĩrĩndĩ gĩake nakĩo agĩkĩnenganĩra harĩ rũhiũ rũa njora; igai rĩu rĩake-rĩ, agĩkĩrĩtũkũĩra.

⁶³Aanake ao makĩrambio nĩ mwaki; airĩtu ao magikĩaga kũinagĩrũo rũĩmbo rũa ũhiki.

⁶⁴Athĩnjĩri-Ngai ao makĩirũrũo nĩ njomo, na atumia ao a ndigwa makĩaga kũgĩa na kĩgirĩko.

⁶⁵Hĩndĩ ĩo Mwathani akĩhindũka ta mũndũ uuma toro, ningĩ ta njamba ĩgĩkayũrũrũka nĩ ũndũ wa ndibei.

⁶⁶Akĩhũra a-muku ake akĩmacokia na thutha; akĩmatua imene cia tene na tene.

⁶⁷Agĩcoka ningĩ akĩrega hema ya Jusufu, mũhĩrĩga wa Efiraimu-rĩ, agĩkĩaga kũũthura;

⁶⁸Agĩthura mũhĩrĩga wa Juda; nĩ kĩrĩma gĩa Zayuni aathurire, o kĩu endete.

⁶⁹Agĩaka nyũmba yake nyamũre ĩhaana ta irĩma iria ndaya, ningĩ ĩkahaana ta thĩ, ũguo amĩrũmĩtie ĩtũũre kinya tene.

⁷⁰Ningĩ agĩthura Daudi ndungata yake, akĩmũruta ciugũ-inĩ cia ng’ondu;

⁷¹Agĩkĩmũruta kũu aarũmagĩrĩra ng’ondu iria njiairĩ, akarĩithagie mbarĩ ya Jakubu, nĩo kĩrĩndĩ gĩake, akĩrĩithagie Isiraeli, o-o igai rĩake.

⁷²Nake agĩtũũra amarĩithagia kũringana na wagĩrĩru wa ngoro yake; agĩkĩmerekagĩria na wara wa moko make.