Psalms 77

¹NĨ NGAI ngũkaĩra, ndĩmũiguithie mũgambo wakwa; ĩĩ-ni, mũgambo wakwa nĩ Ngai ngũiguithia, nake no akĩndegere gũtũ.

²Mũthenya wa mĩnyamaro yakwa nĩ Mwathani ndakĩrongoririe; guoko gwakwa kwaraire kwarĩtwo na gũtiregere; ngoro yakwa ĩgakĩrega kũhorereka.

³Ndenda kũririkana Ngai, ngaigua ngĩtangĩka; ndageria kwĩheeha na ngoro, roho wakwa ũgakĩaga hinya.

⁴Wee wagiragia imone cia maitho makwa ihingĩke; ndanyamarĩkaga o mũno ngakĩremwo nĩ kwaria.

⁵Ngĩgĩtarania ũhoro wa matukũ marĩa mahĩtũku, mĩaka o ĩrĩa yarĩ ya tene.

⁶Ngĩĩririkania ningĩ ũrĩa ndainaga ũtukũ, na ngĩikara o ngĩĩhehaga na ngoro; roho wakwa ũgĩgĩcũrania mũno.

⁷Ngĩkĩũria, Ĩ Mwathani-rĩ, aahota gũteana mĩndĩ na mĩndĩ? githĩ ndarĩ hingo agacoka gũkenanĩra rĩngĩ?

⁸Ũtugi wake nĩ mũhuku o kũhuka kinya tene na tene? uuge wake anga ũgũtũũra ũtahingĩte nginya njiarũa na njiarũa?

⁹Mũrungu-rĩ, nĩ kũriganĩrũo ariganĩirũo nĩ uuma-andũ wake? nĩ kũhingĩrĩria ahingĩrĩirie matha make nĩ ũndũ wa kũrakara?

¹⁰Ngĩya kuuga atĩrĩ, Ũyũ nĩ waga-hinya ndĩ naguo; ngũcoka kũririkana mĩaka ĩrĩa ya guoko kwa ũrĩo kwa Ũcio-wĩ-Igũrũ-Mũno.

¹¹Kwĩririkania nĩngwĩririkania mawĩko ma Jehova; amu ngũkĩĩririkania maũndũ maku ma kĩgeganio marĩa wekaga tene.

¹²Ngwĩrurumia ũhoro wa wĩra ũcio waku wothe, mĩĩkĩre ĩo yaku ndĩkĩĩheehe ũhoro wa ũrĩa ĩtariĩ.

¹³Njĩra ĩrĩa ũgeraga, wee Ngai, no ya ũtheru-inĩ: nĩ mũrungu ũrĩkũ ũkĩrĩ, mũnene ta Ngai?

¹⁴Wee-rĩ, nĩwe Mũrungu ũrĩa wĩkaga maũndũ ma kĩgeganio; nĩũmenyithanĩtie hinya waku thĩinĩ wa irĩndĩ cia thĩ.

¹⁵Guoko gwaku nĩ gũkũũra wakũũrire kĩrĩndĩ gĩaku nakuo, o cio ciana cia Jakubu na Jusufu.

¹⁶Maĩ ma iria-inĩ nĩmaakuonire, wee Ngai; maĩ macio nĩmaakuonire, makĩigua guoya; kũu kũrikĩru gũgĩkĩinaina.

¹⁷Matu namo magĩiturũra maĩ o boo! kũu igũrũ nĩ kũruruma kwarurumaga; mĩguĩ yaku nayo ĩkĩrathũkanga.

¹⁸Mũgambo wa ngwa ciaku nĩ kĩhuhũkanio-inĩ wagambagĩra; heni igakĩmũrĩkaga mabũrũri; thĩ ĩkĩrika gũthingitha o na gũtetema ĩgagĩtetema.

¹⁹Njĩra yaku nĩ iria-inĩ yagereire, mĩirigo yaku ĩgathiĩra o kũu maĩ-inĩ macio maingĩ, namo makinya maku matingĩatuĩrĩkire.

²⁰Watongoririe kĩrĩndĩ gĩaku ta ũrĩa rũũru rũtongoragio, ũgĩgĩtwara na moko ma Musa na Haruni.