Psalms 85

¹Ĩ JEHOVA, nĩwakeneire bũrũri waku; gũtahwo kwa Jakubu nĩwakũgarũrĩte.

²Kuohera nĩwoheire kĩrĩndĩ gĩaku waganu wakĩo, ũhĩtia wakĩo wothe ũgakĩũhumbĩra.

³Matũkũya maku nĩ gũthengia wamathengetie mothe, mwaki wa marakara maku ũgakĩũhutatĩra.

⁴Gĩtũcokererie, wee Ngai mwene ũhonokio witũ, na mathirĩka macio wĩ namo nĩ ũndũ witũ ũtũme magĩthire.

⁵Kaĩ ũgũtũũra ũtũrakarĩire o kinya tene? nĩ gũtambia ũgũtambia marakara maku nginya njiarũa na njiarũa?

⁶Githĩ wee ndũngĩĩtĩkĩra gũcoka kũrurumũkia ngoro ciitũ, kĩrĩndĩ gĩaku gĩgĩgũkenere?

⁷Tuonie ũtugi waku, Jehova, ũgĩtwĩtĩkĩrie ũhonokio waku.

⁸Nĩngũthikĩrĩria njigue ũrĩa Mũrungu, o we Jehova, ekuuga, amu kĩrĩndĩ gĩake, o acio marĩ ũiguano nake, no ũhoro wa thayũ angĩkĩhe, nakĩo nĩkĩmenye gĩgacokerera ũrimũ wa mwĩĩro.

⁹Gũtirĩ nganja ũhonokania wake ũikaraga hakuhĩ na arĩa amwĩtigĩri, nĩ getha riri ũtũũre bũrũri witũ:

¹⁰Ũtugi na ũhoro-wa-ma ituĩke nĩicemainie, ũthingu na thayũ-rĩ, igakĩmumunyana;

¹¹Ũhoro-wa-ma ũtuĩke nĩũramera ũgĩkunũkaga thĩ, naguo ũthingu ũgũcũthagĩrĩrie ũrĩ igũrũ matu-inĩ.

¹²Ĩĩ-ni, Jehova no aheanage kĩndũ o gĩothe kĩega, naguo bũrũri ũyũ witũ ũrutage uumithio waguo.

¹³Ũthingu-rĩ, nĩguo ũrĩmũthiaga mbere, ũtũmage makinya make matuĩke njĩra ya gũthiagĩrũo.