Psalms 86

¹TA INAMĨRĨRIA gũtũ gwaku, Jehova, ũkĩnyamũkĩrie, nĩ gũkorũo ndĩ mũthĩnĩki, na ndĩ o mũnyamari.

²Menyagĩrĩra ngoro yakwa, nĩ gũkorũo niĩ ndĩ mũigua-Ngai; wee Ngai wakwa-rĩ, honokia ndungata yaku ĩno ĩkwĩhokete.

³Kĩnginyĩrie wega waku, Mwathani, amu ndindaga mũthenya wothe ngĩgũkaĩra.

⁴Ndungata yaku gĩkenie ngoro yayo, amu wee, Mwathani, ngoro yakwa no na kũu igũrũ kũrĩ wee ndĩmĩroretie.

⁵Nĩ gũkorũo wee, Mwathani, wĩ mwega, na ũikaraga wĩhaarĩirie kuohanĩra, ũtugi waku naguo ũkaũingĩhagĩria arĩa othe magũkayagĩra.

⁶Jehova, tega matũ ũigue ihoya rĩakwa; thikĩrĩria mũgambo wakwa ngĩgũthaitha.

⁷Mũthenya wa mĩnyamaro yakwa nowe ngũgĩkaĩra, nĩ ũndũ wee nĩũkũnyamũkĩria.

⁸Gatagatĩ-inĩ ka ngai iria ii kuo-rĩ, gũtirĩ ũngĩ ũhaana tawe, Mwathani; o namo mawĩko, gũtirĩ mahaana ta maku.

⁹Ndũrĩrĩ ciothe iria wombire nĩigoka igũthathaiye ii mbere-inĩ yaku, Mwathani, na igoocage rĩĩtwa rĩaku.

¹⁰Amu wee wĩ mũnene, na maũndũ marĩa wĩkaga nĩ ma magegania: wee wiki nowe Ngai.

¹¹Nyonagĩrĩria njĩra yaku, Jehova ĩo ya ũhoro waku wa ma noyo ndĩĩkĩgeraga: gwatania ngoro yakwa ĩtuĩke o ya gwĩtigagĩra rĩĩtwa rĩaku.

¹²Nĩ ngatho ndĩrĩgũcokagĩria na ngoro yakwa yothe, Mwathani, wee Ngai wakwa, ndũũre o ngoocaga rĩĩtwa rĩaku tene o na tene.

¹³Nĩ gũkorũo gũtuga kũrĩa ũndugaga nĩ kũnene ma; wee nĩũteithũrĩte muoyo wakwa kwa ngoma o kũu kũrĩ thĩ mũno.

¹⁴Ĩ Ngai, nĩ gũũkĩrĩrũo njũkĩrĩirũo nĩ arĩa egereri, muoyo wakwa nĩũragĩcario nĩ kĩng’ore kĩa andũ atoi, nawe-rĩ, nĩmakĩregete ũikare maitho-inĩ mao.

¹⁵No wee, Mwathani, nĩwe Mũrungu ũrĩa wĩ matha maingĩ na nĩ muumaandũ mũno, ũrĩa ũtahiũhaga kũrakara, na e na ũtugi mũingĩ o na ũhoro-wa-ma.

¹⁶Ta kĩĩ’hũgũrĩre, ũnginyĩrie wega waku; ndungata ĩno yaku ũmĩĩkĩre hinya waku, mwana wa ngombo yaku ya mũndũ mũka ũkĩmũhonokie.

¹⁷Nyonia kĩmenyithia kĩa wega waku, nĩguo arĩa ma’thũire makĩone, maconoke; nĩ gũkorũo wee, Jehova, nĩũndeithĩtie, o na kũ’nyamarũra ũka’nyamarũra.