Psalms 89

¹MOTUGI ma Jehova ngũtũũra ndĩmainagĩra o nginya tene, kanua gakwa ’menyithanagie kwĩhokeka gwaku nako nginya njiarũa na njiarũa.

²Nĩ amu njugĩte atĩrĩ, Ũtugi-rĩ, nĩ gwakwo ũrĩakagwo o nginya mĩndĩ na mĩndĩ; wee wĩhokeki waku ũgũtũũra ũũrũmĩtie o kũu igũrũ igũrũ.

³Niĩ-rĩ, nĩndĩkanĩire na mũthurũo wakwa, ndungata yakwa Daudi nĩ kwĩhĩta ndĩĩhĩtĩte ngamĩrĩkĩria atĩrĩ:

⁴Mbeũ yaku ngũmĩtũũria ĩĩ nũmu o nginya tene na tene, ngĩake gĩtĩ gĩaku kĩa ũnene gĩkinyagĩrĩre njiarũa na njiarũa.

⁵Narĩo igũrũ nĩrĩgathagĩrĩria maũndũ maku ũrĩa me kĩgeganio, wee Jehova; wĩhokeki waku-rĩ, ũkagathagĩrĩrio kĩũngano-inĩ gĩa acio atheru.

⁶Nĩ amu kũu matu-inĩ nũ ũngĩgerekanĩka na Jehova? nũ ũkĩhaana ta Jehova kũu thĩinĩ wa ariũ a Mũrungu,

⁷Akĩrĩ we Mũrungu ũrĩ itua-nda mũno arĩ ndundu-inĩ ya acio atheru, na wa gwĩtigĩrũo gũkĩra arĩa othe mamũthiũrũrũkĩirie?

⁸Ĩ Jehova Ngai mwene mbũtũ cia ita, nũ ũngĩ kĩhoti tawe, we JAHU? naguo wĩhokeki waku ũtũũraga ũkũrigicĩirie.

⁹Wee-rĩ, nĩwe wathaga mwĩgũgũmo wa iria rĩrĩa inene; makũmbĩ marĩo mokĩrania, wee nĩũmahoreragia.

¹⁰Wee-rĩ, nĩwe wathuthangire Rahabu, agĩtuĩka o ta ũyũ mũũrage; thũ ciaku ũgĩgĩcinyagania na guoko kũu kwa hinya waku.

¹¹Igũrũ nĩ rĩaku, thĩ nayo nowe mwene yo; mabũrũri mothe o gwata indo ciothe iria ciiyũire kuo, wee nowe wahandire gĩtina kĩamo.

¹²Gĩturi gĩa gathigathini o na gĩa gũthini nĩwe watũmire kũgĩe; Taboru na Herimoni nĩikũngũyagia nĩ ũndũ wa rĩĩtwa rĩaku.

¹³Gĩcoka gĩaku nĩ kĩrĩa kĩrĩ ũhoti; guoko gwaku-rĩ, kwĩ na hinya, guoko gwaku kwa ũrĩo gũtũire gwĩtambarairie na igũrũ.

¹⁴Ũthingu o na kĩhooto nĩcio gĩtina gĩa gĩtĩ gĩaku kĩa ũnene, ũtugi na ũhoro ũrĩa wa ma nĩcio itongoragia ũthiũ waku.

¹⁵Gũkena-rĩ, nĩ kĩrĩndĩ kĩrĩa kĩmenyete riugĩrĩrio rĩrĩa rĩa gĩkeno; kĩu nĩgĩthiaga o na ũtheri wa gĩthiithi gĩaku, wee Jehova.

¹⁶Gĩtindaga gĩcanjamũkĩte mũthenya wothe nĩ ũndũ wa rĩĩtwa rĩu rĩaku, na tondũ wa ũthingu waku gĩgagĩtũũgĩra.

¹⁷Nĩ gũkorũo wee nowe igema rĩa hinya wakĩo, na tondũ wa mĩtuganĩre yaku rũhĩa ruitũ no rũtũũre rũambaraire.

¹⁸Nĩ gũkorũo ngo iitũ mwene yo nĩ Jehova; mũthamaki witũ nĩ wa Ũrĩa Mũtheru wa Isiraeli.

¹⁹Hĩndĩ o ĩo nĩwaarĩirie acio maarĩ ũiguano nawe na njĩra ya kĩoneki, ũkiuga atĩrĩ, Ũteithio ndĩũigĩrĩire ũmwe njamba, ngagĩtũũgĩria ũmwe ’thurĩte thĩinĩ wa kĩrĩndĩ.

²⁰Nĩndĩĩoneire Daudi ndungata yakwa, ngamũitĩrĩria maguta marĩa makwa maamũre.

²¹Nĩwe guoko gwakwa kũrĩikaraga harĩ we kũmũrũmagie, ĩĩ-ni, gĩcoka gĩakwa gĩkĩmwĩkagĩre hinya.

²²Thũ gũtirĩ ĩkamwĩka naĩ; mwana wa ũgenyũ-rĩ, gũtirĩ ũkamũnyarira.

²³Arĩa me muku nake nĩndĩĩthiaga ngĩmathetherangaga magagĩthenga mbere yake, kũhũra ngakĩhũraga acio mamũthũire.

²⁴Nake-rĩ, wĩhokeki wakwa o na ũtugi wakwa nĩirĩikaraga harĩ we, na tondũ wa rĩĩtwa rĩakwa, rũhĩa rũake no rũtũũre rũambaraire.

²⁵Na nĩngaigĩrĩra guoko gwake iria-inĩ rĩrĩa inene, guoko gwake kwa ũrĩo ndĩkũigĩrĩre o kũrĩa njũĩ-inĩ.

²⁶We arĩĩtanaga na kũrĩ niĩ ta uũ: Wee nĩwe awa, nowe Mũrungu wakwa, o na ndũmba ya ihiga ĩrĩa nyene ũhonokio wakwa.

²⁷Niĩ na niĩ ndĩmũtue mwana wakwa wa irigithathi, atuĩke wa igũrũ mũno gũkĩra athamaki arĩa angĩ a thĩ.

²⁸Ũtugi wakwa ngũtũũra ndĩmũrũmĩirie kinya o tene na tene, nakĩo kĩrĩkanĩro gĩakwa gĩtũũre kĩrĩ o gĩa kwĩhokeka nĩwe.

²⁹Mbeũ yake nayo nĩngatũma ĩtũũre nginya hingo itagathira, gĩtĩ gĩake kĩa ũnene gĩtũũre matukũ o ta marĩa igũrũ rĩgũtũũra.

³⁰Ciana ciake ingĩgatigana na kĩrĩra gĩakwa, matuĩro makwa itige kũmarũmĩrĩra;

³¹Ingĩgathahia mĩtugo yakwa ĩrĩa nduĩte, maathani makwa ikĩage kũmarũmagia-rĩ,

³²Hĩndĩ ĩo nĩngaciherithia na rũthanju nĩ ũndũ wa ũremi wacio, waganu wacio ndĩciherithĩrie guo na mahiũkangia.

³³No rĩrĩ, ndirĩ hingo ngamwehereria ũtugi wakwa kũna, na wĩhokeki wakwa ndingĩũthahia.

³⁴Niĩ kĩrĩkanĩro gĩakwa ndigagĩthũkia, kana ngarũrĩre ũhoro ũrĩa ũrĩkĩtie kuuma mĩromo-inĩ yakwa.

³⁵Ũndũ ũyũ nĩndĩĩhĩtĩte na ndingĩũcoka, ngagweta ũtheru wakwa, atĩ, Daudi-rĩ, ndirĩ hĩndĩ ingĩmũhenia;

³⁶Mbeũ yake ĩgũtũũra o nginya tene na tene, gĩtĩ gĩake kĩa ũnene gĩtũũre kĩĩ mbere yakwa ta riũa.

³⁷Gĩgũtũũra kĩrũmĩtio kinya tene o ta mweri, naguo ũira ũrĩa wĩ matu-inĩ nĩ mwĩhokeku.

³⁸No rĩrĩ, wee, o wee, nĩ gũikania ũikanĩtie ũcio waku mũitĩrĩrie-maguta, ũgakĩmũrega; nĩ kũmũtũkũĩra ũmũtũkũĩire.

³⁹Kĩrĩkanĩro kĩu kĩrĩkanĩre na ndungata yaku nĩ gwĩthamba ũgĩĩthambĩte; gũthahia nĩũthahĩtie thũmbĩ yake ya ũnene nĩ kũmĩgũithia o thĩ.

⁴⁰Njirigo ciake ciothe nĩũcimomorete; ihingo ciake iria njirige mũno ũtũmĩte ituĩke o mĩomokanĩro.

⁴¹Arĩa othe ehĩtũkĩri na njĩra nĩ kũmũthara mamũtharaga; atuĩkĩte o kĩmene harĩ arĩa mahakaine nao.

⁴²Nĩũtũũgĩrĩtie guoko kwa ũrĩo kwa arĩa me muku nake; ũtũmĩte thũ ciake ciothe ikene.

⁴³Ĩĩ-ni, ũũgĩ wa rũhiũ rũake nĩ kũhũndũra ũũhũndũraga, na ndũtũmĩte ahote gwĩtiirĩrĩria ndathano-inĩ.

⁴⁴Ũkengi wake nĩũũninĩte ũgathira, nakĩo gĩtĩ gĩake kĩa ũnene ũgakĩrekania na thĩ.

⁴⁵Nĩũkuhĩhĩtie matukũ ma ũnyinyi wake; nĩ kũmũhumba ũmũhumbĩte o thoni.

⁴⁶Ĩ Jehova, nĩ hingo ĩigana atĩa ũgũtũũra wĩhithĩte ta wĩhithĩte kinya tene? nĩ nginya rĩ marũrũ maku megũikara magĩakanaga ta mwaki?

⁴⁷Ta ririkana ũrĩa ndĩ wa ihinda inyinyi: ciana ciothe cia kĩrĩndĩ, kaĩ nĩ ũhoro wa tũhũ ũciũmbĩire-ĩ!

⁴⁸Nĩ mũndũ ũrĩkũ ũgatũũra o gũtũũra na ndonane na gĩkuũ? nĩ ta ũrĩkũ ũngĩĩhatũra muoyo harĩ hinya wa kwa-ngoma?

⁴⁹Motugi maku marĩa ma tene maagĩire kũ, Mwathani, marĩa wehĩtire ũkĩĩrĩra Daudi na kwĩhokeka gwaku?

⁵⁰Ririkana, Mwathani, ũrĩa ndungata ciaku itũire icukagwo; ũkĩririkane ũrĩa nditikaga na gĩthũri gĩakwa njukũ cia irĩndĩ ciothe iria ii hinya,

⁵¹Marĩa thũ ciaku cianacukana namo, Jehova, marĩa itũire ithingatagia makinya ma ũrĩa waku mũitĩrĩrie-maguta.

⁵²Jehova arogathagwo tene o na tene. Amen, na ningĩ, Amen.