Psalms 96

¹Ĩ ITĨKAI kũinĩra Jehova rũĩmbo rũerũ! mũinĩre Jehova, inyuĩ andũ othe a thĩ.

²Inĩrai Jehova, gathai rĩĩtwa rĩake; hunjagiai ũhoro wa ũhonokania wake mũthenya o mũthenya.

³Ganai ũhoro wa riri wake ndũrĩrĩ-inĩ, mawĩko make ma magegania, mũkĩmaganĩre iruka ciothe cia andũ.

⁴Nĩ ũndũ Jehova nĩ mũnene, na nĩ wa kũgoocwo mũno: we nĩ wa gwĩtigĩrũo gũkĩra ngai ciothe.

⁵Thima-rĩ, ngai icio ciothe cia irĩndĩ no indo itarĩ kĩene, ĩndĩ Jehova nĩwe wombire igũrũ.

⁶Mbere-inĩ yake hatũũraga ũtĩĩku o na ũkaru; kũu gwake kwamũre gũgagĩtũũra hinya o na ũthaka.

⁷Rahai Jehova, inyuĩ mĩhĩrĩga yothe ya irĩndĩ, rahai Jehova atĩ nĩwe wĩ riri na e na hinya.

⁸Rahai Jehova nĩ kũgwetaga riri wa rĩĩtwa rĩake: ũkai na ihaki, mũgĩtonye nja-inĩ ciake.

⁹Ĩ gĩthathaiyei Jehova mũgemete ũgemu ũrĩa wa ũtheru; tetemekai mwĩ mbere yake, inyuĩ andũ othe a thĩ.

¹⁰Ugai ndũrĩrĩ-inĩ atĩrĩ, Nĩ hĩndĩ Jehova agwatĩte gũthamaka; ĩĩ-ni, thĩ nĩ kũrũmio ĩrũmĩtio, ũndũ ĩtangĩenyenyeka: arĩciragĩra irĩndĩ ciakuo o ũrĩa kwerekereire.

¹¹Igũrũ ta nĩrĩkene, thĩ nayo nĩĩcanjamũke; iria rĩrĩa inene nĩrĩrurume, gwata kĩrĩa gĩothe kĩrĩiyũire;

¹²Werũ-inĩ nakuo nĩgũkenũrũrũke, gwata indo ciothe iria ii kuo; hĩndĩ ĩo mĩtĩ yothe ya mũtitũ no yuge ngemi;

¹³Nĩgwĩkwo ũguo mbere-inĩ ya Jehova, tondũ nĩegũũka; gũũka nĩegũũka gũthamaka thĩ: arĩthamakaga mabũrũri na ũthingu, atuithanagie irĩndĩ na wĩhokeku wake.