Psalms 97

¹NĨ HĨNDĨ Jehova agwatĩte gũthamaka; thĩ ta nĩĩcanjamũke; mabũrũri marĩa ma iria-inĩ o namo nĩmagĩkene o ũguo maingĩhĩte.

²Matu o na nduma nĩcio imũthiũrũrũkĩirie; gĩtĩ gĩake kĩa ũnene, gĩtina kĩrĩa gĩikarĩire, nĩ ũthingu o na kĩhooto.

³Kwĩ mwaki ũmũthiaga mbere, ũkĩrĩrĩmbũraga a-muku ake na mĩena yothe.

⁴Heni ciake nĩciamũrĩkire mabũrũri, thĩ ikĩona, ĩgĩkĩinaina.

⁵Ithuri nĩciaringũkire o ta mũhũra mbere ya Jehova, mbere-inĩ ya Mwathani ũrĩa wathaga thĩ yothe.

⁶Igũrũ nĩrĩraanĩrĩra ũthingu wake, riri wake nĩ muoneku nĩ irĩndĩ ciothe cia thĩ.

⁷Arĩa othe matungatagĩra mĩhianano mĩacũhie-rĩ, gũconoka nĩmaconoke, o acio merahagĩra indo ta icio cia tũhũ: inyuĩ ngai ici-rĩ, mũinamĩrĩrei we, inyuothe.

⁸A Zayuni nĩmaaiguire, magĩkena, aa mwarĩ wa Juda nĩmaacanjamũkire, nĩ ũndũ wa matuĩro macio maku, Jehova.

⁹Nĩ gũkorũo wee, Jehova, nowe wĩ igũrũ mũno igũrũ rĩa thĩ yothe; wee ũrĩ mũtũũgĩru mũno gũkĩra ngai ciothe.

¹⁰Inyuĩ endi Jehova, thũũrai ũũru o gũthũũra: arĩa marĩ ũiguano nake, nĩagitagĩra mĩoyo yao; gũteithũra nĩamateithũraga moko-inĩ ma arĩa aaganu.

¹¹Mũndũ ũrĩa mũthingu nĩahurĩirũo ũtheri, arĩa a ngoro nũngĩrĩru-rĩ, nĩ ahurĩre gĩkeno.

¹²No gĩkenerei Jehova, inyuĩ athingu, rĩĩtwa rĩake rĩamũre mũkĩrĩcokerie ngatho.