Romans 10

¹ARIŨ a Ithe witũ, andũ acio-rĩ, ũndũ ũrĩa nyendete mũno na ngoro yakwa, na nĩguo ’hoyaga Ngai mũno nĩ ũndũ wao, no atĩ mahonoke.

²Amu niĩ nĩ niĩ mũira wao wa atĩ me na kĩyo ũhoro-inĩ wa Ngai, no rĩrĩ, kĩyo kĩu me nakĩo gĩkaaga ũmenyi.

³Amu-rĩ, tondũ wa ũrĩa maagĩte kũmenya ũhoro wa ũthingu ũrĩa wa Ngai, na makageragia kwĩhandĩra ũthingu wao ene, matiigana gwathĩkĩra ũhoro wa ũthingu ũcio wa Ngai.

⁴Nĩ gũkorũo Kristo nĩwe kĩrigĩrĩria kĩa ũhoro wa watho harĩ mũndũ o wothe wĩtĩkĩtie agatũmaga atuwo mũthingu.

⁵Amu Musa aandĩkire atĩ mũndũ wa gwĩkaga maũndũ ma ũthingu ũrĩa uumanaga na watho arĩtũũragio muoyo nĩ ũthingu ũcio.

⁶No rĩrĩ, ũthingu ũrĩa ũgĩagwo naguo nĩ ũndũ wa gwĩtĩkia-rĩ, ũhoro waguo uugaga ũũ: Tiga kwĩũria na ngoro atĩ, Nũ ũkũhaica akinye Igũrũ? (ũguo nĩ ta kuuga Kristo agĩĩrũo aikũrũkio gũkũ thĩ:)

⁷o na ũtige kwĩũria atĩ, Nũ ũkũharũrũka irima rĩrĩa rĩtarĩ gĩturi? (ũguo nĩ ta kuuga Kristo aambatio acoke oime kũrĩ arĩa akuũ.)

⁸No rĩrĩ, ũhoro ũcio uugaga atĩa? Uugaga atĩrĩ, atĩ uuge ũrĩa mũreheirũo-rĩ, ũrĩ o hakuhĩ nawe, o kanua-inĩ gaku na ngoro-inĩ yaku. Naguo uuge ũcio nĩ ũrĩa wa wĩtĩkio, o ũrĩa ithuĩ tũhunjagia.

⁹Tondũ-rĩ, ũngiumbũra na kanua gaku atĩ Jesu nĩwe Mwathani, o na gwĩtĩkia wĩtĩkie na ngoro yaku atĩ Ngai nĩaamũriũkirie oime kũrĩ arĩa akuũ, no ũhonoke:

¹⁰nĩ gũkorũo nĩ ngoro mũndũ etĩkagia nayo agagĩtuwo mũthingu, na nĩ kanua oimbũraga nako agakĩhonoka.

¹¹Tondũ Maandĩko mekuuga atĩrĩ, Mũndũ o wothe ũmwĩhokete-rĩ, ndarĩ hĩndĩ agaconorithio.

¹²Amu ũhoro wa gũthurania Mũyahudi na Mũyunani gũtirĩ: nĩ gũkorũo Mwathani o ro ũcio nowe Mwathani wa andũ othe, na aikaraga o agĩtanahagĩra othe arĩa mamũkayagĩra.

¹³Nĩ ũndũ nĩ haandĩke atĩrĩ, Mũndũ o wothe ũgakaĩra rĩĩtwa rĩa Mwathani nĩakahonoka.

¹⁴No rĩrĩ, mangĩkĩmũkaĩra atĩa matamwĩhokete? Na kũmwĩhoka mangĩkĩmwĩhoka atĩa matarĩ maaigua ũhoro wake? Na kũigua-rĩ, mangĩkĩigua atĩa gũtarĩ na mũhunjia?

¹⁵Ningĩ andũ maahota atĩa kũhunjia ũhoro matarĩ atũme?--o ta ũrĩa haandĩkĩtwo atĩrĩ, Magũrũ ma andũ arĩa mahunjagia ũhoro wĩ gĩkeno ũrĩa wa maũndũ mega, kaĩ nĩmaagĩrĩire-ĩ!

¹⁶No rĩrĩ, andũ matiathikĩrĩirie ũhoro ũcio mwega othe. Nĩ ũndũ Isaia oririe atĩrĩ, Mwathani, nũ wĩtĩkĩtie ũhoro ũrĩa aaiguire na ithuĩ?

¹⁷Gũgakĩoneka atĩ gwĩtĩkia kuumanaga na ũhoro ũrĩa ũiguĩtwo, nakuo kũigua gũũkaga nĩ ũndũ wa uuge wa Kristo.

¹⁸No rĩrĩ, nguuga atĩrĩ, Githĩ kũigua matianaigua? Hĩ, nĩmaiguĩte! Nĩ haandĩke atĩrĩ: Mũgambo wao nĩwahunjire thĩ yothe, ciugo ciao igĩgĩkinya o ituri cia kũrĩa guothe andũ matũũraga.

¹⁹Na ningĩ ngũũria atĩrĩ, A Isiraeli-rĩ, githĩ matiamenyete ũguo? Atĩrĩ, o mbere nĩ Musa woigire ũũ, Nĩngamũiguithia ũiru nĩ ũndũ wa rũrĩrĩ hatarĩ, Rũrĩrĩ rũagĩte ũũgĩ-rĩ, nĩruo ngatũma mũrakarage nĩruo.

²⁰Nake Isaia nĩomĩrĩirie mũno, akiuga ũũ: Ndonirũo nĩ arĩa mataanjaragia, Ngĩkĩonekera arĩa mataanjũragĩrĩria.

²¹No rĩrĩ, ha ũhoro wa andũ a Isiraeli-rĩ, akiuga atĩrĩ, Ndatindire mũthenya wothe ndambũrũkĩtie moko makwa kũrĩ kĩrĩndĩ kĩremi o kĩrĩa kĩa ngarari.