Romans 11

¹TONDŨ ũcio-rĩ, ngũũria atĩrĩ, Githĩ Ngai nĩ gwĩthamba ethambire kĩrĩndĩ gĩake? Hĩ, kũroaga gũtuĩka ũguo! Amu niĩ o na niĩ ndĩ Mũisiraeli, wa mbeũ ĩo ya Iburahimu, na wa mũhĩrĩga wa Benjamini.

²Aca-ni, Ngai ndaigana gwĩthamba kĩrĩndĩ kĩu gĩake o kĩrĩa emenyeire o tene. Kana hihi mũtiũĩ ũrĩa Maandĩko mekuuga harĩa haandĩkĩtwo ũhoro wa Elija? Ũrĩa aathaithire Ngai agĩcuka Isiraeli,

³akiuga, Mwathani, nĩ kũũraga moragĩte anabii aku, o na makenjera igongona iria waakĩirũo magacigũithia thĩ; na no niĩ nyiki ndigaire, nao nĩ kũnjaria maranjaria manjũrage o na niĩ.

⁴No rĩrĩ, icokio rĩrĩa aacokeirio nĩ Ngai rĩkuuga atĩa? Rĩkuuga atĩrĩ: Nĩndĩĩtigĩirie andũ ngiri mũgwanja matarĩ maaturĩria Baali ndu.

⁵Na rĩrĩ, o na rĩu hĩndĩ ĩno tũrĩ, o ũndũ ũmwe, nĩgũtũire matigari, kũringana na ũrĩa Ngai ethurĩire andũ na Wega wake.

⁶No rĩrĩ, gwagĩtuĩka atĩ nĩ Wega wake watũmire amathure, gũtingĩtuĩka atĩ mathurĩtwo nĩ ũndũ wa ciĩko ciao: kũngĩkorũo ti ũguo-rĩ, Wega ũcio wake ndũngĩtuĩka atĩ nĩ Wega kũrĩ.

⁷Rĩu ũhoro ũtariĩ atĩa? Ũtariĩ atĩrĩ, atĩ ũndũ ũrĩa Aisiraeli matũire marongoragia, matiigana kũwona; ĩndĩ gĩkundi kĩrĩa gĩthure rĩ, kĩo nĩkĩawonire, nao arĩa angĩ othe, ngoro ciao ikĩũmio;

⁸o ta ũrĩa kwandĩkĩtwo, atĩrĩ, Ngai akĩmekĩra ngoro ta ya andũ magonetio nĩ toro, maitho mao matũũre matonaga, na matũ mao maagage kũigua, o nginya mũthenya ũyũ tũrĩ.

⁹Daudi o nake ekuuga atĩrĩ, Metha yao ya kũrĩĩra ĩrotuĩka mũtego, ĩgĩtuĩke o kĩndũ gĩa kũmagwatia; O na ta mũhĩnga wa kũmahĩnga, ĩgĩtuĩke o irĩhi rĩa ũũru wao:

¹⁰Maitho mao marogĩa nduma, matige kuona; na ũtũme hingo ciothe mathiage o mainamĩrĩire.

¹¹Tondũ ũcio-rĩ, ngũkĩũria atĩrĩ, Nĩ kũhĩngwo maakĩhĩngirũo ihĩnga rĩa gũtũma magũe o kũgũa? Hĩ, kũroaga gũtuĩka ũguo! Ũrĩa kũrĩ, nĩ atĩ tondũ wa ihĩtia rĩu rĩao, ũhoro wa kũhonokania nĩũkinyĩrĩire andũ a Ndũrĩrĩ iria ingĩ, nĩ getha ũndũ ũcio ũiguithie a Isiraeli ũiru.

¹²Na atĩrĩrĩ, gwagĩkorũo ihĩtia rĩu rĩao nĩrĩtũmĩte andũ arĩa angĩ a thĩ mone ũtonga ũcio, ũtingiaru wao ũgagĩtuĩka ũtonga wa andũ a Ndũrĩrĩ-rĩ, ĩ rĩrĩa mũigana wao ũkahinga, githĩ ndũngĩgatũma kuoneke wega mũnene o makĩria?

¹³Na rĩrĩ, nĩ inyuĩ mũrĩ a Ndũrĩrĩ ndĩraariria. Tondũ wa ũrĩa ndĩ mũtũmwo ũtũmĩtwo kũrĩ andũ a Ndũrĩrĩ-rĩ, wĩra ũcio ndũmĩtwo nĩndĩwĩkagĩrĩra mũno;

¹⁴ngageragia kana hihi ndahota gũtũma acio a rũruka ruitũ maigue ũiru, ngĩtũme amwe ao mahonoke.

¹⁵Amu-rĩ, kũngĩkorũo gũteo kwao nĩkuo gwa gũtũma andũ a thĩ maiguithanio na Ngai, ĩ gwĩtĩkĩrũo kwao nakuo-rĩ, kũngĩkĩrehe ũhoro ũrĩkũ, tiga o ũhoro wa gũcokwo muoyo nĩ arĩa akuũ?

¹⁶Na rĩrĩ, kũngĩkorũo kĩenyũ kĩa mũtu mũkime nĩ gĩtheru-rĩ, kĩmere gĩothe nakĩo no gĩtheru; o nakĩo gĩtina kĩa mũtĩ kĩgĩkorũo nĩ gĩtheru, honge o nacio no theru.

¹⁷Na rĩrĩ, kũngĩtuĩka atĩ honge imwe cia mũtamaiyũ-wa-mũgũnda nĩ gũkahũrũo ciakahũrirũo, nawe, ũrĩ o rũhonge rũa mũtamaiyũ-wa-kĩrĩti, ũgacoka ũgaciarithanio na mũtĩ ũcio gatagatĩ-inĩ ka honge ciaguo, ũgakĩgwatanĩra nacio gĩtina kĩa mũtamaiyũ-wa-mũgũnda, ũkagaĩrũo ũnoru waguo-rĩ;

¹⁸menya wĩgathe ũkĩmenaga honge icio. Ũngĩenda kwĩgatha-rĩ, ririkana atĩ tiwe ũkuuaga gĩtina kĩa mũtĩ, nĩ gĩtina kĩu gĩgũkuuaga wee.

¹⁹Wee no gũkiuga atĩrĩ, Githĩ honge imwe itiakahũrirũo nĩ getha niĩ njoke njiarithanio na mũtĩ?

²⁰Ũguo noguo: gũkahũrũo nĩcĩakahũrirũo nĩ ũndũ wa ũrĩa ciagĩte gwĩtĩkia, wee nawe nĩ gũikara ũikarĩte ho no ũndũ wa ũrĩa wĩtĩkĩtie. Ndũgagĩĩtĩe, tiga o gwĩtigĩra wĩtigĩre,

²¹amu Ngai angĩkorũo ndaigana gũcaĩra honge icio cia ndũire-rĩ, o nawe ndangĩgũcaĩra.

²²No kĩone wega ũtugi wa Ngai, o naguo wĩĩ wake: arĩa maagũire, nĩ gũthũkĩrũo maathũkĩirũo; no wee-rĩ, Ngai nĩ gũgũtuga agũtugaga, waikara o ũrũmĩtie ũtugi ũcio wake: na waaga gwĩka ũguo, wee o nawe no ũtinio.

²³Andũ acio o nao, mangĩtiga kũrũmia ũhoro ũcio wao wa kwaga gwĩtĩkia, no macoke gũciarithanio na mũtĩ wao guo mwene, nĩ gũkorũo Ngai aahota kũmaciarithania naguo rĩngĩ.

²⁴Amu-rĩ, ũngĩkorũo wee niwatemirũo ũkĩrutwo mũtamaiyũ-inĩ wa mũthemba wa kĩrĩti, ũgĩcoka ũgĩciarithanio na mũtamaiyũ mwega wa mũgũnda, na ũcio nĩ ũhoro ũtarĩ wa ndũire-rĩ, andũ acio marĩ o honge ciaguo cia ndũire kaĩ matangĩkĩria mũno gũciarithanio na mũtamaiyũ-wa-mũgũnda, o ũcio warĩ wao kĩũmbe?

²⁵Amu rĩrĩ, ariũ a Ithe witũ, nĩguo mũtikae kwĩona ta mũrĩ ogĩ-rĩ, ndikwenda mwage kũmenya ũhoro ũyũ wa hitho, atĩrĩ, atĩ andũ a Isiraeli, amwe nĩ anyite nĩ ũhoro wa kũũma ngoro, maikare naguo o nginya andũ a Ndũrĩrĩ magakorũo maingĩrĩte, mũigana wao ũkahinga.

²⁶Na noguo a Isiraeli makahonoka othe, o ta ũrĩa haandĩkĩtwo, atĩrĩ: Ũrĩa ũkahonokania akoima Zayuni; Nĩagathengia maũndũ ma kũregana na Ngai mathire kwa Jakubu.

²⁷Na nĩ ũguo kĩrĩkanĩro kĩrĩa ngarĩkanĩra nao gĩkahingio, Rĩrĩa ngamehereria mehia mao.

²⁸Ha ũhoro wa kũhunjanĩrio kwa Ũhoro-ũrĩa-Mwega-rĩ, andũ acio nĩ atue thũ nĩ getha inyuĩ mũgunwo; no rĩrĩ, ha ũhoro wa gũthurũo kũrĩa maathurirũo, nĩ kwendwo mendetwo mũno nĩ ũndũ wa maithe mao.

²⁹Nĩ gũkorũo iheo iria Ngai aheanaga na Wega wake, o na gwĩtana kũrĩa etanaga nakuo, ndacokaga kwĩricũkwo.

³⁰Nĩ ũndũ-rĩ, o ta ũrĩa inyuĩ tene mwaregete gwĩtĩkia Ngai, na rĩu mũkaiguĩrũo tha nĩ ũndũ wa kũrega gwĩtĩkia kwa andũ acio-rĩ,

³¹rĩu no taguo andũ acio ningĩ maregete gwĩtĩkia, nĩ getha o nao macoke rĩu kũiguĩrũo tha, nĩ ũndũ wa ũrĩa inyuĩ mũiguĩrĩirũo tha.

³²Nĩ gũkorũo Ngai aanahingĩra andũ othe ũhoro-inĩ wa kũrega gwĩtĩkia, nĩ getha acoke kũmaiguĩra tha othe.

³³Ĩ ũũgĩ wa Ngai, o naguo ũmenyi wake-rĩ, matikĩrĩ maingĩ na mariku! Matuĩro make, kaĩ matingĩcarĩka gĩtũmi kĩamo; mĩgendere yake nayo, kaĩ ndĩngĩtuĩrĩka-ĩ!

³⁴Amu nĩ mũndũ ũrĩkũ wanamenya meciria ma Mwathani? kana nĩ ũrĩkũ wanatuĩka wa ndundu yake?

³⁵Kana rĩrĩ, nũ wanaamba kũmũhe kĩndũ, nake acoke akarĩhwo kĩndũ kĩu?

³⁶Amu-rĩ, maũndũ mothe no harĩ we moimire, na gũtũũrio matũũragio no we, na no kũrĩ we merekeire. Nake arogoocagwo tene na tene. Amen.