Song of Solomon 4

¹Ĩ ndũkĩrĩ mũthaka, mũrata wakwa! anga ndũkĩrĩ mwega o mũno! maitho maku mahaanaine na ma ndutura makĩonerũo hau tama-inĩ ũcio wĩhumbĩte ũthiũ naguo: njuĩrĩ ciaku no ta rũũru rũa mbũri ikomete ciĩaraganĩtie hũgũrũrũ-inĩ cia kĩrĩma kĩa Gileadi.

²Magego maku namo mahaana karũũru ka mĩatĩ ĩrĩa mĩmure guoya, rĩrĩa yumĩte kĩanda gũthambio; nayo-rĩ, gũtirĩ ũtarĩ wa mahatha, na gũtirĩ o na ũmwe ũkuĩrĩirũo nĩ mũiruwe.

³Mĩromo yaku ĩtariĩ ta kauuthi gatune, kanua gaku gagakĩagĩra mũno: naguo thiithi waku ũkahaana o ta gĩatũ gĩa itunda rĩĩtagwo ikomamanga ũkĩonerũo hau tama-inĩ ũcio wĩhumbĩte ũthiũ naguo.

⁴Ngingo yaku ĩtariĩ ta nyũmba ya Daudi ĩrĩa yakĩtwo mũthiringo ya kũigagwo mathaita, nakuo gũgacuurio ngo ngiri ng’ima, na ciothe no ngo cia njamba cia ita.

⁵Nyondo ciaku cierĩ ihaanaine na ciana igĩrĩ cia thiya, cia mahatha, irarĩa mahũa-inĩ.

⁶Nĩngwĩtwara kĩrĩma-inĩ kĩrĩa kĩa manemane, ngĩkinye gĩthũngũri-inĩ kĩrĩa kĩa ubani, njikare kuo nginya rĩrĩa kũrĩrura, nacio ciĩruru ciirĩrie.

⁷Wee ũrĩ mũthaka guothe, mũrata wakwa; ndũrĩ na kĩmeni o na kanini.

⁸Ndũũke tũthiĩ nawe, mũhiki wakwa, tuume Lebanoni, niĩ tũthiĩ nawe tũkiume Lebanoni: uma kũu gacũmbĩrĩ ka Amana, uume gacũmbĩrĩ ga Seniru na ka Herimoni, wĩumĩre kũu ciemo-inĩ cia mĩrũthi, ũkiume irĩma-inĩ icio cia ngarĩ!

⁹Kairĩtu gaka ka maitũ, o wee mũhiki wakwa, ngoro yakwa nĩ gũtwarĩrĩria ũmĩtwarĩrĩirie; nĩũtwarĩrĩirie ngoro yakwa na irora o rĩmwe rĩa riitho, ũkamĩhoota na karengeri o kamwe gaku ka ngingo.

¹⁰Kairĩtu ka maitũ, o wee mũhiki wakwa, wendani waku kaĩ nĩ mũthaka-ĩ! mĩendere yaku-rĩ, nĩ mĩega mũno o na gũkĩra ndibei! naguo mũtararĩko wa maguta maku macio wĩhakaga-rĩ, nĩ mwega kũrĩ wa mahuti mothe marĩa manungi wega!

¹¹Mĩromo yaku, wee mũhiki wakwa, nĩ ta magua magĩtaatia ũũkĩ: nguruĩ ya rũrĩmĩ rũaku nĩ ũũkĩ harĩ, o na iria; naguo mũnungĩre wa nguo ciaku no ta mũnungĩre wa Lebanoni.

¹²Mwarĩ ũyũ wa maitũ, o wee mũhiki wakwa, ahuana ta mũgũnda mũirigĩre; ningĩ ta gĩthima kĩirigĩre, itherũkĩro rĩa maĩ ihinge na rĩgathingĩrĩrũo.

¹³Thuna ciaku no ta kamũtitũ ka mĩtĩ ya matunda ĩrĩa ĩĩtagwo mĩkomamanga, ĩrĩ maciaro mendeku mũno; ningĩ mĩhanuni, na mĩtĩ ĩrĩa yumaga uundi,

¹⁴Uundi o na manjano, ningĩ irago na mĩndarathini, hamwe na mĩtĩ yothe ĩrĩa yumaga ubani; ningĩ manemane na thubiri, hamwe na mahuti mothe marĩa makĩrĩtie mangĩ kũnunga wega.

¹⁵Wee-rĩ, ũtariĩ ta itherũkĩro rĩa maĩ rĩĩ mũgũnda, gĩthima kĩa maĩ marĩ muoyo; na ta tũrũũĩ tũrĩa tũthereraga tuumĩte Lebanoni.

¹⁶Ĩ wee rũhuho rũa gathigathini-rĩ, ĩribaribe! nawe rũa gũthini-rĩ, o nawe, ũka! hurutai mũgũnda ũyũ wakwa, nĩguo mĩtararĩko yaguo ĩhunje. Mwendwa wakwa nĩatonye mũgũnda wake, akĩrĩe matunda make o macio mendeku mũno!