Luke 11

¹Igihe kimwe Yezu yari ahantu asenga. Arangije umwe mu bigishwa be aramubwira ati: “Nyagasani, Yohani Mubatiza yigishije abigishwa be gusenga, natwe twigishe gusenga.”

²Arababwira ati: “Igihe musenga mujye muvuga muti: ‘Data, izina ryawe niryubahwe, ubwami bwawe nibuze.

³Buri munsi ujye uduha ifunguro ridukwiriye.

⁴Utubabarire ibyaha byacu, kuko natwe ubwacu tubabarira abatugiriye nabi bose. Kandi ntutureke ngo tugwe mu byadushuka.’ ”

⁵Yezu yungamo ati: “Nk'umwe muri mwe afite incuti, akayigana mu gicuku akayibwira ati: ‘Mugenzi wanjye, nguriza imigati itatu,

⁶incuti yanjye igeze imuhira ivuye mu rugendo, none nta cyo mfite nyizimanira.’

⁷Nuko undi akamusubiza yibereye mu nzu ati: ‘Windushya! Dore twamaze gukinga jye n'abana banjye twaryamye, sinshobora kubyuka ngo nyiguhe.’

⁸Ndababwira ko naho uwo muntu atabyuka ngo agire icyo amuha kubera ubucuti, amaherezo yaza kumuha icyo ashaka cyose kuko yamurembeje amusaba.

⁹“Nuko rero musabe muzahabwa, mushake muzabona, mukomange muzakingurirwa.

¹⁰Usabye wese ni we uhabwa, ushatse ni we ubona, kandi n'ukomanze ni we ukingurirwa.

¹¹Mwa babyeyi mwe, ni nde muri mwe waha umwana we inzoka igihe amusabye ifi,

¹²cyangwa se akamuha ingonokera igihe amusabye igi?

¹³None se ko muzi guha abana banyu ibyiza kandi muri babi, So uri mu ijuru ntazarushaho guha Mwuka Muziranenge abamumusabye?”

¹⁴Igihe kimwe Yezu yameneshaga ingabo ya Satani yari yaragize umuntu ikiragi. Nuko iyo ngabo imuvuyemo uwo muntu aravuga. Rubanda baratangara cyane.

¹⁵Icyakora bamwe baravuga bati: “Ububasha bwo kumenesha ingabo za Satani abuhabwa na Bēlizebuli umutware wazo.”

¹⁶Abandi bo bamwakaga ikimenyetso kibemeza ko yatumwe n'Imana, ariko ari umutego bamutega.

¹⁷Yezu yari azi ibyo batekereza, ni ko kubabwira ati: “Iyo igihugu gisubiranyemo kirasenyuka, amazu yacyo akariduka akagwirirana.

¹⁸Ese niba Satani ubwe yirwanyije ubwami bwe bwakomera bute, ko muvuze ngo ni Bēlizebuli unshoboza kumenesha ingabo ze?

¹⁹Niba se ari Bēlizebuli umpa ububasha bwo kumenesha ingabo za Satani, bene wanyu bo ni nde ubaha ubwo bubasha? Ubwo babikora ni bo bazatuma mutsindwa n'urubanza.

²⁰Noneho kubera ko ari Imana impa ububasha bwo kumenesha ingabo za Satani, ni ukuvuga ko ubwami bwayo bubagezeho.

²¹“Umunyamaboko ufite intwaro iyo arinze urugo rwe, ibye biba amahoro.

²²Ariko umurusha amaboko iyo ahahingutse akamutsinda, amwambura intwaro yari yizeye maze ibyo amutwaye akabigabira abandi.

²³“Utari mu ruhande rwanjye aba andwanya, kandi udakoranyiriza hamwe nanjye aba atatanya.

²⁴“Igihe ingabo ya Satani ivuye mu muntu izerera ku gasi ishaka aho yaruhukira, yahabura ikibwira iti: ‘Reka nsubire mu nzu yanjye navuyemo.’

²⁵Yagerayo igasanga ikubuye, iteguye.

²⁶Nuko ikajya kuzana izindi ngabo ndwi ziyitambukije ubugome, zose zikinjirana zigatura muri uwo muntu. Bityo imibereho ye ya nyuma ikarusha iya mbere kuba mibi.”

²⁷Yezu akimara kuvuga, umugore wo muri iyo mbaga avuga cyane, aramubwira ati: “Hahirwa inda yakubyaye n'amabere yakonkeje!”

²⁸Yezu aramusubiza ati: “Ahubwo hahirwa abumva Ijambo ry'Imana bakarikurikiza.”

²⁹Abantu bamaze kugwira iruhande rwa Yezu, afata ijambo aravuga ati: “Abantu b'iki gihe ni babi. Banshakaho ikimenyetso gitangaje, nyamara nta kimenyetso kindi bazahabwa kitari icya Yonasi.

³⁰Nk'uko Yonasi yabereye ab'i Ninive ikimenyetso, ni ko n'Umwana w'umuntu azabera ab'iki gihe ikimenyetso.

³¹Ku munsi Imana izaca imanza, wa mwamikazi waturutse mu majyepfo azahagurukira ab'iki gihe maze ababuranye abatsinde, kuko we yavuye iyo bigwa akaza kumva amagambo y'ubwenge bwa Salomo, kandi rero hano hari uruta Salomo.

³²Ku munsi Imana izaca imanza, ab'i Ninive bazahagurukira ab'iki gihe maze bababuranye babatsinde, kuko bitaye ku byo Yonasi yabatangarije bakihana, kandi rero hano hari uruta Yonasi.

³³“Ntawe ucanira itara kurihisha [cyangwa ngo aryubikeho akabindi], ahubwo aritereka ahirengeye kugira ngo rimurikire abaje mu nzu.

³⁴Itara ry'umubiri ni ijisho ryawe. Igihe ijisho ryawe ari rizima, umubiri wawe wose uba umurikiwe. Ariko igihe ijisho ryawe rirwaye, umubiri wawe uba ucuze umwijima.

³⁵Nuko wirinde, urumuri rwawe rutazima.

³⁶Niba rero umubiri wawe wose umurikiwe ntihabe n'agace kawo kari mu mwijima, uzaba uri mu mucyo rwose nk'umurikiwe n'itara.”

³⁷Yezu akivuga atyo Umufarizayi aramutumira ngo basangire. Yinjira iwe ajya ku meza.

³⁸Uwo Mufarizayi atangazwa n'uko Yezu afungura atabanje gukaraba nk'uko umuhango wabo uri.

³⁹Nyagasani Yezu aramubwira ati: “Mwebwe Bafarizayi dore uko muteye: mumeze nk'ibikombe n'amasahane boza inyuma gusa, kuko imbere mwuzuye ubwambuzi n'ubugizi bwa nabi.

⁴⁰Mwa bapfu mwe, ese iyaremye inyuma si na yo yaremye imbere?

⁴¹Mujye muha abakene ku biri mu bikombe no ku masahane, ni bwo ibyanyu byose bizaba bisukuye.

⁴²“Muzabona ishyano Bafarizayi, mwe mutanga na kimwe cya cumi cy'isogi n'icy'inyabutongo, n'icy'utundi tuboga twose duhumuza ibyokurya, nyamara mugacisha ukubiri n'ubutabera n'urukundo rw'Imana. Ibyo ni byo mwagombaga gukora mutaretse n'ibyo bindi.

⁴³“Muzabona ishyano Bafarizayi, mwe mukunda kwicazwa mu myanya y'icyubahiro mu nsengero no kuramukirizwa ku karubanda.

⁴⁴Muzabona ishyano mwe mumeze nk'imva zitagira ikiziranga, abantu bakazinyura hejuru batabizi bagahumana.”

⁴⁵Umwe mu bahanga mu by'Amategeko aramubwira ati: “Mwigisha, igihe uvuze utyo natwe uba udututse.”

⁴⁶Yezu ati: “Muzabona ishyano namwe bahanga mu by'Amategeko, mwe mukorera abantu imitwaro iremereye, nyamara ntimuyikoze n'urutoki ngo mubafashe.

⁴⁷Muzabona ishyano kuko mwubakira imva z'abahanuzi, kandi ari ba sokuruza babishe.

⁴⁸Bityo muba mwemeje ko mushima ibyo ba sokuruza bakoze. Bo bishe abahanuzi, naho mwe mububakira imva.

⁴⁹Ni cyo cyatumye Imana izi byose ivuga iti: ‘Nzabatumaho abahanuzi n'Intumwa zanjye, nyamara bazica bamwe batoteze abandi.’

⁵⁰Ni yo mpamvu ab'iki gihe bazaryozwa amaraso y'abahanuzi bose bishwe kuva isi yaremwa kugeza ubu,

⁵¹uhereye ku maraso y'Abeli kugeza ku ya Zakariya, batsinze hagati y'urutambiro n'Ingoro y'Imana. Ni ukuri, ndababwira ko ab'iki gihe ari bo bazayaryozwa.

⁵²“Muzabona ishyano mwebwe bahanga mu by'Amategeko, kuko mwatwaye urufunguzo rwo kumenya, ubwanyu ntimwinjira n'abashaka kwinjira mukabakumīra.”

⁵³Yezu akiva aho ngaho, abigishamategeko n'Abafarizayi bamugirira inzika, batangira kumuvugisha menshi,

⁵⁴bamwinja ngo babone uko bamufatira mu byo avuga.