Luke 10

¹Nyuma y'ibyo Nyagasani Yezu atoranya abandi bigishwa mirongo irindwi na babiri, abatuma babiri babiri kumubanziriza mu mijyi yose n'ahantu hose yari agiye kujya.

²Arababwira ati: “Imyaka yeze ari myinshi nyamara abasaruzi ni bake. Nuko rero nimusabe Nyir'imyaka yohereze abasaruzi mu murima we.

³Nimugende! Dore mbatumye nk'abana b'intama hagati y'impyisi.

⁴Muramenye ntimugire icyo mujyana, cyaba agasaho k'amafaranga cyangwa umufuka cyangwa inkweto, kandi mwirinde guhera muri hobe hobe.

⁵Inzu yose muzinjiramo mujye mubanza muvuge muti: ‘Amahoro y'Imana abe muri uru rugo!’

⁶Niba muri rwo hari umunyamahoro, amahoro mubifurije azagumana na we, bitabaye bityo ayo mahoro azabagarukire.

⁷Mugume muri iyo nzu murye kandi munywe ibyo babafunguriye, kuko umukozi akwiye guhemberwa umurimo we. Ntimugahore muva mu icumbi mujya mu rindi.

⁸Umujyi muzinjiramo bakabakira mujye mufungura ibyo babahereje.

⁹Mukize abarwayi baho kandi mubabwire muti: ‘Ubwami bw'Imana burabegereye.’

¹⁰Umujyi muzinjiramo ntibabakīre, muzawuvemo munyure mu mihanda yawo muvuga muti

¹¹‘Umukungugu wo mu mujyi wanyu wafashe mu birenge byacu, turawuhunguye ngo tuwubasigire ube ari wo uzabashinja. Ibyo ari byo byose mumenye ko ubwami bw'Imana bwegereje.’

¹²Reka mbabwire: ku munsi Imana izaca imanza, ab'i Sodoma bazahanishwa igihano kidakaze nk'icy'abatuye uwo mujyi.

¹³“Mwa bantu b'i Korazini mwe, muzabona ishyano! Namwe bantu b'i Betsayida, muzabona ishyano! Ibitangaza Imana yakoreye muri mwe iyo bikorerwa i Tiri n'i Sidoni, kuva kera abaho baba barambaye imyambaro igaragaza akababaro kandi bakicara mu ivu, bagaragaza ko bihannye.

¹⁴Ni cyo gituma ku munsi Imana izaca imanza, ab'i Tiri n'i Sidoni bazahanishwa igihano kidakaze nk'icyanyu.

¹⁵Namwe bantu b'i Kafarinawumu, ese muragira ngo muzashyirwa hejuru mugere ku ijuru? Reka da! Ahubwo muzamanurwa mugere ikuzimu.”

¹⁶Yezu yungamo ati: “Bigishwa banjye, umuntu wese ubumva ni jye aba yumvise, kandi ubamagana ni jye aba yamaganye, n'unyamagana aba yamaganye Uwantumye.”

¹⁷Nuko abo mirongo irindwi na babiri bagarukana ibyishimo, baravuga bati: “Nyagasani, n'ingabo za Satani ziratwumvira iyo tuzitegetse mu izina ryawe.”

¹⁸Yezu arababwira ati: “Nabonye Satani ahanuka mu ijuru nk'umurabyo.

¹⁹Dore nabahaye ubushobozi bwo kuribata inzoka kimwe n'indyanishamurizo, no gutsinda ububasha bwose bwa Satani kandi nta kizagira icyo kibatwara.

²⁰Ibyo ari byo byose ntimwishimire ko ingabo za Satani zibumvira, ahubwo mwishimire ko amazina yanyu yanditswe mu ijuru.”

²¹Uwo mwanya Yezu asābwa n'ibyishimo bivuye kuri Mwuka Muziranenge, aravuga ati: “Ndagushimye Data Nyir'ijuru n'isi, kuko ibyo wabihishe abanyabwenge n'abahanga, ukabihishurira abaciye bugufi. Yego Data, uko ni ko biri kuko ari byo wishimiye.”

²²“Ibintu byose nabyeguriwe na Data. Ntawe uzi Umwana w'Imana uwo ari we keretse Se, kandi ntawe uzi Se keretse Umwana we n'abo uwo Mwana we ashatse kumuhishurira.”

²³Nuko Yezu yihererana n'abigishwa be arababwira ati: “Hahirwa abareba ibyo mureba!

²⁴Ndababwira ko abahanuzi n'abami benshi bashatse kureba ibyo mureba ntibabibona, kandi bashatse kumva ibyo mwumva ntibabyumva.”

²⁵Nuko umwe mu bahanga mu by'Amategeko ahagurutswa no kumutegera mu byo avuga, aramubaza ati: “Mwigisha, nakora iki kugira ngo mpabwe ubugingo buhoraho?”

²⁶Yezu aramubaza ati: “Mu Mategeko handitswe iki? Wasomyemo iki?”

²⁷Undi aramusubiza ati: “Ukunde Nyagasani Imana yawe n'umutima wawe wose, n'ubuzima bwawe bwose n'imbaraga zawe zose n'ubwenge bwawe bwose, kandi ujye ukunda mugenzi wawe nk'uko wikunda.”

²⁸Yezu aramubwira ati: “Usubije neza, nugenza utyo uzabaho.”

²⁹Uwo muhanga mu by'Amategeko ashatse kwikura mu isoni abaza Yezu ati: “Ariko se, mugenzi wanjye ni uwuhe?”

³⁰Yezu aramusubiza ati: “Umugabo yakuviriye i Yeruzalemu amanuka ajya i Yeriko, agwa mu gico cy'abajura baramwambura, baramuhondagura barigendera, bamusiga ari intere.

³¹Umutambyi aza kumanuka anyura aho ngaho, abonye uwo muntu yicira hirya.

³²Haza kunyura n'Umulevi, na we amubonye biba bityo.

³³Ariko Umunyasamariya wari ku rugendo anyuze aho, aramubona amugirira impuhwe.

³⁴Ni ko kumwegera amupfuka ibikomere, amwomoza amavuta na divayi. Hanyuma amushyira ku ndogobe yagenderagaho, amujyana mu icumbi aramurwaza.

³⁵Bukeye aha nyir'icumbi ibikoroto bibiri by'ifeza, aramubwira ati: ‘Uyu muntu umurwaze, maze ibindi uzamutangaho na byo nzabikwishyura ngarutse.’ ”

³⁶Nuko Yezu abaza wa muhanga mu by'Amategeko ati: “None se muri abo bantu uko ari batatu, uratekereza ko ari uwuhe wabaye mugenzi w'uwo muntu waguye mu gico cy'abajura?”

³⁷Aramusubiza ati: “Ni uwamugiriye neza.” Yezu ni ko kumubwira ati: “Genda nawe ujye ugenza utyo!”

³⁸Yezu yari mu rugendo hamwe n'abigishwa be agera ahantu ku murenge, maze umukobwa witwa Marita amwakira imuhira.

³⁹Murumuna we witwaga Mariya yari yicaye hasi, yegereye Nyagasani yumva ibyo avuga.

⁴⁰Marita we yari ahugiye mu mirimo myinshi. Nuko asanga Yezu aramubwira ati: “Mbese ntibikubabaje kubona murumuna wanjye amparira imirimo? Mubwire aze amfashe.”

⁴¹Nyagasani aramusubiza ati: “Marita! Marita! Uhagaritse umutima kandi urahihibikana muri byinshi,

⁴²nyamara ikintu cya ngombwa ni kimwe gusa, Mariya ni cyo yahisemo kandi ntazacyamburwa.”