Luke 9

¹Yezu akoranya ba bandi cumi na babiri, abaha ububasha n'ubushobozi bwo kumenesha ingabo zose za Satani, no gukiza indwara.

²Abatuma gutangaza iby'ubwami bw'Imana no gukiza abarwayi.

³Nuko arababwira ati: “Ntimugire icyo mujyana yaba inkoni cyangwa umufuka, yaba impamba cyangwa amafaranga, ndetse ntimugomba no kujyana amakanzu abiri.

⁴Urugo muzabonamo icumbi muzarugumemo kugeza igihe muzahavira.

⁵Umujyi muzageramo ntibabakire muzawuvemo muhunguye umukungugu wo mu birenge byanyu, kugira ngo bibabere icyemezo cy'icyaha cyabo.”

⁶Bafata urugendo banyura mu mirenge yose, bahageza Ubutumwa bwiza kandi bakiza abarwayi.

⁷Herodi umutegetsi w'intara ya Galileya yumvise ibyabaye byose, biramuyobera kuko bamwe bavugaga ko ari Yohani wazutse,

⁸abandi bakavuga ko ari Eliya wagarutse, naho abandi ngo ni umwe mu bahanuzi ba kera wazutse.

⁹Herodi we akavuga ati: “Ko Yohani namuciye igihanga, uwo ni nde kandi numva bavugaho ibyo ngibyo?” Bituma Herodi yifuza kubona Yezu.

¹⁰Intumwa za Yezu zigarutse zimutekerereza ibyo zari zakoze. Nuko Yezu arazijyana yihererana na zo ahagana mu mujyi witwa Betsayida.

¹¹Imbaga y'abantu imenye ko yagiyeyo baramukurikira, Yezu arabakira ababwira iby'ubwami bw'Imana, kandi n'abarwayi arabakiza.

¹²Ba bandi cumi na babiri babonye ko umunsi uciye ikibu, baramwegera baramubwira bati: “Sezerera abantu kugira ngo bajye mu nsisiro no mu mihana ya bugufi bacumbikeyo, kandi bashakeyo icyo bafungura kuko aha hantu turi hadatuwe.”

¹³Yezu arabasubiza ati: “Ahubwo mube ari mwe mubafungurira.” Baramubwira bati: “Dufite imigati itarenga itanu n'amafi abiri, keretse ahari twajya guhahira aba bantu bose ibyokurya!”

¹⁴Abagabo bonyine bari aho bari nk'ibihumbi bitanu. Yezu ni ko kubwira abigishwa be ati: “Mubicaze mu byiciro, buri cyiciro kigizwe n'abantu nka mirongo itanu.”

¹⁵Abigishwa babigenza batyo bose barabicaza.

¹⁶Yezu afata iyo migati itanu n'amafi abiri, areba ku ijuru, ashimira Imana, arabimanyura abiha abigishwa be, na bo babikwiza iyo mbaga.

¹⁷Nuko bose bararya barahaga, maze bateranya utumanyu dusagutse twuzura inkangara cumi n'ebyiri.

¹⁸Igihe kimwe Yezu yari ahiherereye asenga, abigishwa bari kumwe na we maze arababaza ati: “Abantu bavuga ko ndi nde?”

¹⁹Baramusubiza bati: “Bamwe bavuga ko uri Yohani Mubatiza, abandi ngo uri Eliya, naho abandi ngo uri umwe mu bahanuzi ba kera wazutse.”

²⁰Nuko Yezu arababaza ati: “Mwebwe se muvuga ko ndi nde?” Petero aramusubiza ati: “Uri Kristo wavuye ku Mana.”

²¹Yezu arabihanangiriza ngo ntibagire uwo babihingukiriza.

²²Yezu arababwira ati: “Ni ngombwa ko Umwana w'umuntu ababazwa cyane, akangwa n'abakuru b'imiryango n'abakuru bo mu batambyi n'abigishamategeko, bakamwica maze ku munsi wa gatatu akazuka.”

²³Nuko bose arababwira ati: “Ushaka kunyoboka wese nareke kwiyitaho, ahubwo atware umusaraba we uko bukeye ankurikire.

²⁴Ushaka gukiza ubuzima bwe azabubura, naho uhara ubuzima bwe ari jye ahōrwa azaba abukijije.

²⁵Mbese umuntu byamumarira iki kwigarurira isi yose, ariko akaba yivukije ubugingo bwe akarimbuka?

²⁶Umuntu wese ugira isoni zo kunyemera no kwemera inyigisho zanjye, Umwana w'umuntu na we azagira isoni zo kumwemera, igihe azaba aje afite ikuzo rye n'irya se n'iry'abamarayika baziranenge.

²⁷Ndababwiza ukuri, bamwe mu bari aha ntibazapfa batabonye ubwami bw'Imana.”

²⁸Hashize nk'iminsi umunani Yezu avuze ibyo, ajyana Petero na Yohani na Yakobo mu mpinga y'umusozi gusenga.

²⁹Nuko agisenga mu maso he hahinduka ukundi, imyambaro ye iba urwererane rumena amaso.

³⁰Bagiye kubona babona abagabo babiri ari bo Musa na Eliya baganira na Yezu.

³¹Baboneka bafite ikuzo, bavugana na we ibyerekeye uko agiye kujya i Yeruzalemu ngo agweyo, asohoze umurimo wamuzanye.

³²Petero n'abari kumwe na we bari batwawe n'ibitotsi. Bakangutse babona ikuzo rya Yezu n'abo bombi bari kumwe na we.

³³Abo bagabo bagiye gutandukana na Yezu, Petero aramubwira ati: “Mwigisha, ko ari nta ko bisa kwibera hano! Reka twubake utuzu dutatu tw'ingando, kamwe kabe akawe, akandi aka Musa, naho akandi kabe aka Eliya.” Icyakora ntiyari azi icyo avuga.

³⁴Akivuga atyo igicu kirabatwikīra. Abigishwa babibonye bagira ubwoba.

³⁵Ako kanya bumva ijwi ry'uvugira muri icyo gicu ati: “Uyu ni Umwana wanjye nitoranyirije, nimumutege amatwi!”

³⁶Iryo jwi rimaze kuvuga, abigishwa babona Yezu wenyine. Muri iyo minsi baryumaho, ntibagira icyo bahingutsa ku byo bari babonye.

³⁷Bukeye bwaho Yezu n'abigishwa be bamanuka wa musozi, imbaga nyamwinshi y'abantu iramusanganira.

³⁸Nuko umuntu mu bari aho avuga cyane aramubwira ati: “Mwigisha, ndakwinginze ngo undebere uyu muhungu wanjye w'ikinege.

³⁹Haba ubwo ingabo ya Satani imwegura akavuza induru, maze ikamutigisa cyane ikamuzanisha ifuro, ikamuvamo biruhanyije imaze kumuvunagura.

⁴⁰Nasabye abigishwa bawe kuyimenesha ntibabishobora.”

⁴¹Yezu arasubiza ati: “Yemwe bantu b'iki gihe mutizera Imana kandi mugoryamye, nzabana namwe ngeze ryari? Nzabihanganira ngeze ryari? Ngaho zana uwo mwana wawe hano.”

⁴²Igihe uwo mwana acyegera Yezu ahangwaho. Ingabo ya Satani imutura hasi iramutigisa. Yezu aherako arayicyaha, akiza uwo mwana maze amusubiza se.

⁴³Nuko bose babonye ububasha buhebuje bw'Imana barumirwa. Mu gihe bose bagitangarira ibyo byose Yezu yakoraga, abwira abigishwa be ati:

⁴⁴“Nimutege amatwi ibyo ngiye kubabwira. Dore Umwana w'umuntu agiye kuzagabizwa abantu.”

⁴⁵Abigishwa be ntibumva iryo jambo, bari barihishwe ngo batavaho barisobanukirwa kandi ntibatinyuka kumusobanuza icyo rivuga.

⁴⁶Nyuma batangira kujya impaka bibaza umukuru muri bo.

⁴⁷Yezu amenye ibyo batekereza azana umwana amuhagarika iruhande rwe,

⁴⁸maze arababwira ati: “Umuntu wese wakira uyu mwana kubera jye ni jye aba yakiriye, kandi unyakiriye aba yakiriye Uwantumye. Umuto muri mwe mwese ni we mukuru.”

⁴⁹Nuko Yohani abwira Yezu ati: “Mwigisha, twabonye umuntu umenesha ingabo za Satani mu izina ryawe, turamubuza kuko atari uwo muri twe.”

⁵⁰Yezu aramusubiza ati: “Ntimukamubuze, burya utabarwanya aba ari uwanyu.”

⁵¹Igihe cya Yezu cyo kujyanwa agasubira mu ijuru cyari cyegereje, maze agambirira bidakuka kujya i Yeruzalemu.

⁵²Yohereza integuza ngo zimubanzirize kuri umwe mu mirenge y'Abanyasamariya, zimwitegure.

⁵³Ariko abaho babonye ko yerekeje i Yeruzalemu banga kumwakira.

⁵⁴Abigishwa be Yakobo na Yohani, babibonye baramubaza bati: “Nyagasani, urashaka ko dutegeka umuriro ngo uve mu ijuru ubatsembe?”

⁵⁵Yezu arabahindukirana arabatwama.

⁵⁶Bava aho berekeza ku wundi murenge.

⁵⁷Nuko bakigenda umuntu umwe abwira Yezu ati: “Nzagukurikira aho uzajya hose.”

⁵⁸Yezu aramubwira ati: “Za nyiramuhari zigira amasenga zibamo, n'inyoni zigira ibyari, nyamara Umwana w'umuntu ntagira aho aruhukira.”

⁵⁹Abwira undi ati: “Nkurikira.” Na we aramusubiza ati: “Reka mbanze njye gushyingura data.”

⁶⁰Yezu aramubwira ati: “Reka abapfu bahambe abapfu babo, naho wowe jya gutangaza iby'ubwami bw'Imana.”

⁶¹Undi muntu aramubwira ati: “Databuja, ndaza kugukurikira, ariko reka mbanze njye gusezera ku b'imuhira.”

⁶²Yezu aramubwira ati: “Ufashe isuka nyuma akarangara, ntabwo akwiye ubwami bw'Imana.”