Luke 8

¹Nyuma y'ibyo Yezu anyura mu mijyi no mu byaro, atangaza Ubutumwa bwiza bwerekeye ubwami bw'Imana. Ba bigishwa be cumi na babiri bagendanaga na we,

²hamwe n'abagore bamwe yari yarakijije indwara, abandi akabameneshamo ingabo za Satani. Abo ni Mariya w'i Magadala wari wameneshejwemo ingabo ndwi za Satani,

³na Yowana muka Shuza umunyabintu wa Herodi, na Suzana n'abandi benshi, batangaga ku byabo ngo bafashe Yezu n'abigishwa be.

⁴Imbaga nyamwinshi y'abantu irakorana, bari baturutse muri buri mujyi bagana aho Yezu ari. Nuko abacira uyu mugani ati:

⁵“Habayeho umuntu wagiye kubiba, igihe abiba imbuto zimwe zigenda zigwa ku nzira, hanyuma abantu barazikandagira n'inyoni zirazitoragura.

⁶Izindi zigwa ku gasi, ngo zimare kumera ziruma kuko zabuze amazi.

⁷Izindi zigwa mu mahwa, amahwa azirengaho ziragwingira.

⁸Izindi zigwa mu butaka bwiza, zirakura zera imbuto ijana rumwe rumwe.” Yezu amaze kuvuga atyo avuga cyane ati: “Ufite amatwi yumva ngaho niyumve!”

⁹Abigishwa be bamubaza icyo uwo mugani ushaka kuvuga.

¹⁰Arabasubiza ati: “Mwebwe mwahawe kumenya amabanga y'ubwami bw'Imana, naho abandi babimenyeshwa n'imigani kugira ngo ‘Kureba barebe ariko be kubona, kumva bumve ariko be gusobanukirwa.’

¹¹“Dore icyo uwo mugani uvuga: imbuto zibibwa ni Ijambo ry'Imana.

¹²Imbuto zaguye ku nzira zigereranywa n'abantu bumva iryo Jambo, nyuma Satani akaza akarikura mu mitima yabo, kugira ngo bataryemera ngo bakizwe.

¹³Izaguye ku gasi ni nk'abantu bumva Ijambo ry'Imana, bakaryakirana ubwuzu ariko ntibashinge imizi. Baryemera igihe gito, nyuma bahura n'ibibagerageza bakarireka.

¹⁴Izaguye mu mahwa ni nk'abumva iryo Jambo, maze guhagarika umutima no kwishakira ubukungu, no kwishimisha mu by'ubuzima bikarirengaho, bakamera nk'imbuto zarumbye.

¹⁵Naho izaguye mu butaka bwiza ni nk'abumva iryo Jambo n'umutima mwiza uboneye, bakarikomeza ntibacogore, bakera imbuto.

¹⁶“Ntawe ucana itara ngo aryubikeho akabindi cyangwa ngo arishyire munsi y'igitanda. Ahubwo aritereka ahirengeye kugira ngo abinjira bose basange habona.

¹⁷Nta gihishwe kitazahishurwa, nta n'ibanga ritazamenyekana ngo rishyirwe ahagaragara.

¹⁸“Murajye mwitondera uburyo mwumva ibyo mbabwira. Ufite azongererwa, naho udafite na busa azakwa n'utwo yaririragaho.”

¹⁹Abavandimwe ba Yezu na nyina bajya aho ari, ariko ntibabasha kumugeraho kubera ikivunge cy'abantu.

²⁰Bamwe babimenyesha Yezu bati: “Nyoko n'abavandimwe bawe bahagaze hanze kandi baragushaka.”

²¹Arabasubiza ati: “Mama n'abavandimwe banjye ni abumva Ijambo ry'Imana bakarikurikiza.”

²²Igihe kimwe Yezu yajyanye mu bwato n'abigishwa be, arababwira ati: “Twambuke dufate hakurya.” Nuko baragenda.

²³Bacyambuka ikiyaga Yezu arisinzirira. Nuko haza inkubi y'umuyaga, ubwato bwuzura amazi ku buryo bendaga kurohama.

²⁴Begera Yezu baramukangura bati: “Mwigisha, mwigisha, turashize!” Nuko arakanguka, maze acyaha umuyaga n'umuhengeri w'amazi, byose birahosha haba ituze.

²⁵Hanyuma arababaza ati: “Mbese ntimunyizera?” Bagira ubwoba barumirwa, barabazanya bati: “Uyu ni muntu ki, utegeka n'imiyaga n'amazi bikamwumvira?”

²⁶Bomokera mu ntara y'Abanyagerasa, hakurya y'ikiyaga cya Galileya.

²⁷Yezu akigera imusozi, umuntu wahanzweho ava mu mujyi aza amusanga. Hari hashize igihe atacyikoza umwambaro, atagitaha no mu rugo ahubwo yibera mu irimbi.

²⁸Akibona Yezu induru ayiha umunwa, yikubita hasi imbere ye avuga aranguruye ati: “Uranshakaho iki Yezu Mwana w'Imana Isumbabyose? Ndakwinginze we kunyica urubozo.”

²⁹Ibyo byatewe n'uko Yezu yari ategetse ingabo ya Satani kumuvamo. Iyo ngabo yamuhangagaho kenshi, bigatuma bamurinda bamubohesheje iminyururu amaguru n'amaboko, ariko izo ngoyi akazituritsa maze ikamubuyereza ahantu hadatuwe.

³⁰Yezu aramubaza ati: “Witwa nde?” Aramusubiza ati: “Nitwa Giteronyamwinshi.” Ibyo abivugira ko yari yarahanzweho n'ingabo za Satani nyinshi.

³¹Zinginga Yezu ngo atazohereza ikuzimu.

³²Hafi aho ku musozi hari umugana w'ingurube nyinshi zarishaga. Izo ngabo za Satani zinginga Yezu ngo azireke zinjire mu ngurube, arazemerera.

³³Nuko ziva muri uwo muntu zinjira mu ngurube, maze umukumbi wose ucuncumuka ku gacuri, wiroha mu kiyaga urarohama.

³⁴Abashumba bazo babonye ibibaye barahunga, iyo nkuru bayikwiza mu mujyi no mu byaro.

³⁵Abaturage bajya kwirebera ibyabaye. Bageze aho Yezu ari babona wa muntu ingabo za Satani zavuyemo, yicaye hasi iruhande rwa Yezu, yambaye yagaruye ubwenge bibatera ubwoba.

³⁶Abari babyiboneye babatekerereza ukuntu uwo wari wahanzweho yakize.

³⁷Noneho abaturage bose b'iyo ntara y'Abanyagerasa basaba Yezu kubavira aho, kubera ko ubwoba bwari bwabatashye. Yezu ajya mu bwato ngo agende,

³⁸uwameneshejwemo ingabo za Satani asaba Yezu ngo bigumanire. Ariko Yezu aramusezerera agira ati:

³⁹“Subira iwanyu ubatekerereze ibyo Imana yagukoreye byose.” Nuko uwo muntu aragenda, yamamaza mu mujyi wose ibyo Yezu yamukoreye.

⁴⁰Yezu agarutse imbaga y'abantu iramwakira, kuko bose bari bamutegereje.

⁴¹Haza umugabo witwaga Yayiro, wari umutware w'urusengero rw'Abayahudi. Yikubita imbere ya Yezu amusaba kuza iwe.

⁴²Amubwira ko umukobwa we w'ikinege w'imyaka nka cumi n'ibiri asamba. Akigenda rubanda nyamwinshi bamuniganagaho.

⁴³Muri abo bantu harimo umugore wari urwaye indwara yo kuva, ayimaranye imyaka cumi n'ibiri. [Yari yaratagaguje utwe twose mu baganga, ariko] nta wari warashoboye kumukiza.

⁴⁴Yegera Yezu amuturutse inyuma maze akora ku ncunda z'umwitero we. Ako kanya amaraso arakama.

⁴⁵Yezu arabaza ati: “Ni nde unkozeho?” Bose barahakana maze Petero aravuga ati: “Mwigisha, ese ntubona ko abantu benshi bagukikije bakaba bakubyiga?”

⁴⁶Ariko Yezu aravuga ati: “Hari uwankozeho kuko numvise hari ububasha bumvuyemo.”

⁴⁷Wa mugore abonye ko yamenyekanye, ni ko kuza ahinda umushyitsi yikubita imbere ya Yezu, amutekerereza icyatumye amukoraho n'ukuntu yahise akira, abari aho bose barabyumva.

⁴⁸Yezu ni ko kumubwira ati: “Mwana wanjye, ukwizera kwawe kuragukijije, genda amahoro.”

⁴⁹Akivuga atyo haza intumwa ibwira wa mutware w'urusengero iti: “Umukobwa wawe amaze gupfa, ntiwirirwe urushya umwigisha.”

⁵⁰Yezu abyumvise abwira Yayiro ati: “Witinya, nyizera gusa arakira.”

⁵¹Ageze mu rugo ntiyareka hari uwinjirana na we, uretse Petero na Yohani na Yakobo, na se na nyina b'umwana.

⁵²Bose barariraga bashavujwe n'uwo mwana. Yezu ni ko kubabwira ati: “Mwirira, ntiyapfuye ahubwo arasinziriye.”

⁵³Baramuseka, kuko bari bazi ko umwana yapfuye.

⁵⁴Nuko Yezu amufata ukuboko aramuhamagara ati: “Mwana, byuka!”

⁵⁵Umukobwa agarura akuka aba muzima, maze ahita abyuka. Yezu ategeka ko bamugaburira.

⁵⁶Ababyeyi ibyishimo birabasāba, nyamara Yezu arabihanangiriza ngo be kugira uwo bamenyesha ibibaye.