Luke 15

¹Abasoresha n'abandi banyabyaha bose bakundaga kwegera Yezu kugira ngo bamwumve.

²Abafarizayi n'abigishamategeko bābibona bakijujuta bavuga bati: “Uyu muntu yakira abanyabyaha ndetse agasangira na bo!”

³Yezu ni ko kubacira uyu mugani ati:

⁴“Ni nde muri mwe waba ufite intama ijana, maze imwe yazimira ntasige izindi mirongo cyenda n'icyenda mu gasozi, ngo ajye gushaka iyazimiye kugeza igihe ayibonye?

⁵Iyo ayibonye arishima akayiterera ku bitugu,

⁶akayitahana iwe. Nuko agakoranya incuti n'abaturanyi, akababwira ati: ‘Twishimane kuko nabonye intama yanjye yari yazimiye!’

⁷Reka mbabwire: ni na ko mu ijuru bishimira umunyabyaha umwe wihannye, kuruta uko bishimira abantu b'intungane mirongo cyenda n'icyenda badakeneye kwihana.

⁸“Cyangwa ni nde mugore waba afite ibikoroto icumi by'ifeza kimwe kigatakara, ntacane itara ngo akubure inzu, agishake yitonze kugeza igihe akibonye?

⁹Iyo akibonye akoranya incuti n'abaturanyi akavuga ati: ‘Twishimane kuko nabonye igikoroto nari natakaje.’

¹⁰Reka mbabwire: ni na ko mu ikoraniro ry'abamarayika b'Imana bishimira umunyabyaha umwe wihannye.”

¹¹Maze Yezu aravuga ati: “Habayeho umugabo akagira abahungu babiri.

¹²Umunsi umwe umutoya abwira se ati: ‘Data, mpa umunani wangeneye!’ Nuko bombi se abaha iminani yabo.

¹³Hashize iminsi mike, umutoya agurisha umunani we wose yigira mu gihugu cya kure. Ahageze yiyandarika mu maraha, ibye abipfusha ubusa.

¹⁴Byose amaze kubitsemba, inzara ikomeye itera muri icyo gihugu maze abura uko yigira.

¹⁵Nuko ajya gusaba akazi ku muturage wo muri icyo gihugu, amwohereza mu isambu ye kuragira ingurube.

¹⁶Yifuzaga kwicisha isari ibyo bagaburiraga ingurube, ariko ntihagire ubimuha.

¹⁷Nyuma aza kwisubiraho agira ati: ‘N'ukuntu abakozi ba data ari benshi bakarya bagasigaza! Nyamara jyewe inzara ikaba insinze hano!

¹⁸Reka mpaguruke njye kwa Data mubwire nti: “Data, nacumuye ku Mana nawe ngucumuraho,

¹⁹singikwiriye kwitwa umwana wawe. Ungire gusa nk'umwe mu bakozi bawe.” ’

²⁰Nuko arahaguruka ajya kwa se. “Se amurabutswe akiri kure yumva impuhwe ziramusābye, ariruka ajya kumusanganira, maze aramuhobera aramusoma.

²¹Uwo muhungu abwira se ati: ‘Data, nacumuye ku Mana nawe ngucumuraho. Singikwiye kwitwa umwana wawe…’

²²Ariko se abwira abagaragu be ati: ‘Nimubangukane ikanzu irusha izindi ubwiza muyimwambike. Mumwambike n'impeta ku rutoki n'inkweto mu birenge.

²³Muzane cya kimasa cy'umushishe mukibage, maze turye tunezerwe!

²⁴Uyu mwana wanjye yari yarapfuye none yazutse, yari yarabuze none yabonetse.’ Nuko batangira ibirori.

²⁵“Icyo gihe umuhungu mukuru w'uwo mubyeyi yari mu murima. Atashye agere hafi y'urugo, yumva urusaku rw'abaririmba n'ababyina.

²⁶Ahamagara umwe mu bagaragu aramubaza ati: ‘Mbese ibyo ni ibiki numva?’

²⁷Aramusubiza ati: ‘Ni murumuna wawe wagarutse none se yamubagiye cya kimasa cy'umushishe, kuko yongeye kumubona ari muzima.’

²⁸“Undi ararakara cyane yigumira hanze. Se ni ko gusohoka amwingingira kwinjira.

²⁹Nuko abwira se ati: ‘Reba nawe! Uzi imyaka yose maze ngukorera. Nta tegeko ryawe na rimwe narenzeho, nyamara ntiwigeze umpa n'agahene ngo nishimane n'incuti zanjye.

³⁰None uriya muhungu wawe wamaze ibyawe abisangira n'indaya, igihe abungutse uba ari we ubagira ikimasa cy'umushishe!’

³¹Se aramusubiza ati: ‘Mwana wanjye, wowe turahorana n'ibyo mfite byose ni ibyawe.

³²Ariko byari ngombwa rwose ko twishima tukanezerwa, kuko murumuna wawe uriya yari yarapfuye none yazutse, yari yarabuze none yabonetse.’ ”