Luke 16

¹Yezu abwira abigishwa be ati: “Habayeho umuntu w'umukungu wari ufite umugaragu yashinze ibintu bye. Baza kumuregera uwo mugaragu ngo aramutagaguriza ibintu.

²Nuko aramuhamagara aramubaza ati: ‘Ibyo nkumvaho ni ibiki? Ngaho murikira ibyanjye kuko kuva ubu utagikomeje kumbera mu bintu.’

³Uwo munyabintu aribaza ati: ‘Ubu se mbigenje nte ko databuja agiye kunyaga? Guhinga sinabishobora! Gusabiriza byantera isoni!

⁴Yewe, mbonye uko nzabigenza kugira ngo nimara kunyagwa, abantu bazajye banyakira.’

⁵Nuko abari bafite imyenda ya shebuja, agenda abahamagara umwe umwe. Abaza uwa mbere ati: ‘Harya databuja akwishyuza ibingana iki?’

⁶Aramusubiza ati: ‘Amadebe ijana y'amavuta y'iminzenze.’ Umugaragu aramubwira ati: ‘Akira urupapuro rwawe, wicare vuba wandike ko ari amadebe mirongo itanu.’

⁷Hanyuma abaza undi ati: ‘Harya wowe wishyuzwa iki?’ Ati: ‘Imifuka magana atanu y'ingano.’ Umugaragu aramubwira ati: ‘Akira urupapuro rwawe wandike magana ane.’

⁸“Nuko shebuja ashima uwo munyabintu w'umuhemu, kuko yamenye kwiteganyiriza. Koko ab'iyi si mu mibanire yabo, barusha abamurikiwe n'Imana guteganya.”

⁹Yezu yungamo ati: “Reka mbabwire: amafaranga ni amatindi, nyamara mujye muyashakisha incuti kugira ngo igihe yabashizeho, izo ncuti zizabakire iyo muzibera iteka.

¹⁰Ugira umurava mu tuntu duto, no mu bikomeye azawugira. Naho uhemuka mu tuntu duto, no mu bikomeye azahemuka.

¹¹Niba rero mutagize umurava mu matindi y'amafaranga, ni nde uzabaragiza ibifite agaciro k'ukuri?

¹²Niba kandi mutagize umurava mugenga iby'abandi, ni nde uzabaha ibyo mwagenewe ubwanyu?

¹³“Nta mugaragu ushobora gukorera ba shebuja babiri. Iyo adakunze umwe ngo yange undi, ayoboka umwe agasuzugura undi. Nuko rero ntimushobora kuba abagaragu b'Imana ngo mube n'abagaragu b'amafaranga.”

¹⁴Abafarizayi bumvise ibyo byose bagira Yezu urw'amenyo, kuko bakundaga amafaranga.

¹⁵Yezu ni ko kubabwira ati: “Mwebwe mwigira intungane imbere y'abantu nyamara Imana izi imitima yanyu, kuko icyo abantu baha agaciro kiba kigayitse ku Mana.

¹⁶“Kuyoborwa n'Amategeko n'ibyanditswe n'abahanuzi byagarukiye kuri Yohani Mubatiza. Kuva ubwo hatangira gutangazwa Ubutumwa bwiza bwerekeye ubwami bw'Imana, kandi buri wese aharanira kubugeramo.

¹⁷Icyakora icyoroshye ni uko ijuru n'isi byashira, aho kugira ngo Amategeko aveho n'akadomo na kamwe.

¹⁸“Umuntu wese wirukana umugore we akazana undi aba asambanye, kandi ucyura umugore wirukanywe na we aba asambanye.

¹⁹“Habayeho umugabo w'umukungu wambaraga imyambaro myiza ihebuje y'ibitare n'iy'amabara, kandi iminsi yose agahora adamaraye.

²⁰Hakaba n'umutindi witwaga Lazaro wari waramazwe n'ibisebe. Yahoraga aryamye ku irembo ry'uwo mukungu.

²¹Yifuzaga guhazwa n'utuvungukira tuva ku meza y'uwo mukungu. Byongeye kandi, imbwa na zo zarazaga zikarigata ibisebe bye.

²²“Igihe kiza kugera uwo mutindi arapfa, maze abamarayika bamujyana aho Aburahamu ari, na we amwakira bya kibyeyi aramwiyegereza. Wa mukungu na we aza gupfa baramuhamba.

²³Ageze ikuzimu arababara cyane, yubuye amaso abonera kure Aburahamu ari kumwe na Lazaro.

²⁴Nuko arangurura ijwi ati: ‘Mubyeyi Aburahamu, mbabarira wohereze Lazaro akoze urutoki mu mazi, ambobereze ururimi kuko mbabazwa cyane n'uyu muriro.’

²⁵“Aburahamu aramusubiza ati: ‘Mwana wanjye, ibuka ko wabonye ibyiza ukiriho, Lazaro we akabona ingorane. Ubu rero yageze hano arahumurizwa, naho wowe urababazwa.

²⁶Uretse n'ibyo hagati yacu namwe hari imanga ndende, yashyiriweho gutanga imbere abari hano bashaka kujya aho, ikabuza n'abari aho kuza hano.’

²⁷Wa mukungu ni ko kuvuga ati: ‘Noneho mubyeyi, ndakwinginze rwose ohereza Lazaro iwacu,

²⁸asangeyo abavandimwe banjye batanu, ababurire kugira ngo na bo batazaza kubabarizwa aha hantu.’

²⁹“Aburahamu aramusubiza ati: ‘Abavandimwe bawe bafite Amategeko ya Musa n'ibyo abahanuzi banditse, nibite kuri ibyo ngibyo!’

³⁰Undi aravuga ati: ‘Ibyo ntibihagije mubyeyi Aburahamu! Ahubwo hagize uwapfuye uzuka akabasanga bazīhana.’

³¹Aburahamu aramusubiza ati: ‘Nibatita ku Mategeko ya Musa no ku byo abahanuzi banditse, n'ubwo hagira uwo mu bapfuye uzuka ntibyatuma bava ku izima.’ ”