Matthew 21

¹Begereye i Betifage ku Musozi w'Iminzenze uteganye na Yeruzalemu, Yezu atuma babiri mu bigishwa be

²ati: “Mujye muri ziriya ngo, nimuhagera murahita mubona indogobe iziritse hamwe n'iyayo, muziziture muzinzanire.

³Nihagira ubabaza impamvu mumubwire muti: ‘Ni Databuja uzikeneye kandi arazigarura vuba.’ ”

⁴Kwari ukugira ngo bibe nk'uko byavuzwe n'umuhanuzi ngo:

⁵“Nimubwire abaturage b'i Siyoni muti: ‘Dore umwami wanyu aje abasanga, yicishije bugufi ahetswe n'indogobe, ndetse ahetswe n'icyana cyayo.’ ”

⁶Abigishwa baragenda bakora uko Yezu yabategetse,

⁷bazana indogobe n'icyana cyayo, bazisasaho imyitero yabo maze Yezu ayicaraho.

⁸Imbaga nyamwinshi y'abantu bari aho barambura imyitero yabo mu nzira, abandi baharambika amashami y'ibiti baciye.

⁹Nuko imbaga y'abantu bari kumwe na we, bamwe imbere abandi inyuma, barangurura amajwi bati: “Hozana! Harakabaho Mwene Dawidi! Hasingizwe uje mu izina rya Nyagasani! Mu ijuru nibasingize Imana bati: ‘Hozana!’ ”

¹⁰Yezu yinjiye muri Yeruzalemu umujyi wose urakangarana, abantu bakabaza bati: “Mbese uyu ni nde?”

¹¹Rubanda bati: “Ni Yezu wa muhanuzi w'i Nazareti muri Galileya.”

¹²Nuko Yezu yinjira mu rugo rw'Ingoro y'Imana, amenesha abacuruzaga n'abaguraga ahasanze. Ahirika ameza y'abavunjaga amafaranga n'intebe z'abacuruzaga inuma.

¹³Nuko arababwira ati: “Ibyanditswe biravuga ngo ‘Inzu yanjye izitwa Inzu yo gusengeramo’, naho mwe mwayigize indiri y'abajura.”

¹⁴Nuko impumyi n'abacumbagira bamusanga mu rugo rw'Ingoro y'Imana maze arabakiza.

¹⁵Abakuru bo mu batambyi n'abigishamategeko bararakara babonye ibitangaza akoze, babonye n'abana basakuriza mu rugo rw'Ingoro y'Imana bavuga bati: “Hozana! Harakabaho Mwene Dawidi!”.

¹⁶Ni ko kubwira Yezu bati: “Aho ntiwiyumvira ibyo bavuga?” Arabasubiza ati: “Yee, ndabyumva. Ariko se ntimwasomye Ibyanditswe ngo ‘Wateganyije ko ibitambambuga n'abana bonka bagusingiza’ ”

¹⁷Nuko abasiga aho ava mu mujyi, yerekeza i Betaniya ararayo.

¹⁸Kare mu gitondo Yezu ari mu nzira asubira mu mujyi arasonza.

¹⁹Arabukwa igiti cy'umutini kiri ku nzira. Akigeze iruhande asanga ari amababi masa maze arakibwira ati: “Ntukere imbuto ukundi!” Ako kanya icyo giti kiruma.

²⁰Abigishwa be babibonye baratangara baramubaza bati: “Kiriya giti cyumye gite aka kanya?”

²¹Yezu arabasubiza ati: “Ndababwira nkomeje. Mwizeye Imana mudashidikanya ntimwakora ibyo nkoreye uyu mutini gusa ahubwo mwashobora no kubwira uriya musozi muti: ‘Shyiguka aho wirohe mu nyanja’, maze bikaba bityo.

²²Rwose nimusenga mwizeye Imana, icyo muzasaba cyose muzagihabwa.”

²³Nuko Yezu yinjira mu rugo rw'Ingoro y'Imana. Abakuru bo mu batambyi n'abakuru b'imiryango y'Abayahudi bajya aho yari ari yigisha, baramubaza bati: “Uvana he ubushobozi bwo gukora ibyo ukora? Ni nde wabuguhaye?”

²⁴Yezu arabasubiza ati: “Nanjye reka ngire icyo mbibariza kimwe gusa, nimunsubiza ndabona kubabwira aho nkura ubushobozi bwo kubikora.

²⁵Mbese Yohani yatumwe na nde kubatiza? Ni Imana cyangwa se ni abantu?” Bajya inama bati: “Nituvuga ko yatumwe n'Imana, aratubaza ati: ‘Kuki mutamwemeye?’

²⁶Na none kandi nituvuga ko yatumwe n'abantu, ntidukira rubanda kuko bose bemera ko Yohani yari umuhanuzi.”

²⁷Nuko basubiza Yezu bati: “Ntitubizi.” Yezu ni ko kubabwira ati: “Nanjye rero simbabwiye aho nkura ubushobozi bwo gukora ibyo nkora.”

²⁸“Mbese iby'uyu mugani mubivugaho iki? Habayeho umugabo akagira abahungu babiri. Asanga uwa mbere aramubwira ati: ‘Mwana wanjye, uyu munsi ujye gukorera ibiti by'imizabibu.’

²⁹Nuko aramusubiza ati: ‘Ndanze’, nyuma yisubiraho ajyayo.

³⁰Wa mubyeyi asanga n'uwa kabiri na we amubwira atyo. Uwo we ahita amusubiza ati: ‘Ndajyayo mubyeyi’, nyamara ntiyagenda.

³¹Mbese muri abo bombi ni nde wakoze ibyo se ashaka?” Baramusubiza bati: “Ni uwa mbere.” Yezu arababwira ati: “Ndababwira nkomeje ko abasoresha n'indaya bazabatanga kwinjira mu bwami bw'Imana.

³²Yohani yazanywe no kubayobora inzira y'ubutungane ntimwamwemera. Abasoresha n'indaya bo baramwemera naho mwe murabireba, ariko ntimwihana ngo mumwemere.

³³“Nimwumve n'undi mugani. Habayeho umugabo wari afite umurima, awuteramo ibiti by'imizabibu awuzengurutsa uruzitiro, acukuramo urwengero yubakamo n'umunara w'abarinzi, maze uwo murima awātira abahinzi. Birangiye ajya mu rugendo.

³⁴Igihe cy'isarura kigeze atuma abagaragu kuri ba bahinzi, kugira ngo bamuhe icyatamurima ku mbuto basaruye.

³⁵Nuko abahinzi basumira abo bagaragu, umwe baramukubita undi baramwica, undi bamutera amabuye.

³⁶Arongera yohereza abandi bagaragu baruta aba mbere ubwinshi, na bo babagenza batyo.

³⁷Ubwa nyuma abatumaho umuhungu we yibwira ati: ‘Umwana wanjye ntibazamwubahuka.’

³⁸Abahinzi babonye uwo mwana baravugana bati: ‘Dore uwarazwe ibintu araje! Nimuze tumwice maze ibye byose bibe ibyacu.’

³⁹Baramusumira, bamukurubana inyuma y'uruzitiro baramwica.

⁴⁰“Mbese nk'ubwo igihe nyir'imizabibu azagarukira, mubona azagenza ate abo bahinzi?”

⁴¹Baramubwira bati: “Abo bagome azabatsemba, maze imizabibu ayishyiremo abandi bazajya bamuha ibye uko isarura rigeze.”

⁴²Yezu arababaza ati: “Mbese ntimwasomye Ibyanditswe? Biravuga ngo ‘Ibuye abubatsi banze, ni ryo ryabaye insanganyarukuta. Ibyo ni Nyagasani wabikoze, none bitubereye igitangaza!’

⁴³Ni cyo gituma mbabwira ko muzanyagwa ubwami bw'Imana, bugahabwa abandi bakora imirimo ikwiranye n'ubwo bwami. [

⁴⁴Umuntu wese uzagwa kuri iryo buye azavunagurika, ariko uwo rizagwira rizamujanjagura.”]

⁴⁵Abakuru bo mu batambyi n'Abafarizayi bumvise imigani ye, bamenya ko ari bo avuga.

⁴⁶Nuko bashaka uburyo bamufata ariko batinya rubanda, kuko bo bemezaga ko ari umuhanuzi.