Matthew 22

¹Yezu yongera kuvugana n'abantu akoresheje imigani agira ati:

²“Iby'ubwami bw'ijuru wabigereranya n'umwami wacyuje ubukwe bw'umuhungu we.

³Nuko atuma abagaragu be guhamagara abatumiwe mu bukwe, maze banga kuza.

⁴Arongera atuma abandi bagaragu kubwira abatumiwe ngo: ‘Dore nateguye amazimano, nabagishije ibimasa byanjye n'andi matungo y'imishishe. Byose byateguwe nimuze mu bukwe.’

⁵Ariko bo ntibabyitaho barigendera, umwe ajya mu murima we undi mu bucuruzi bwe.

⁶Abasigaye basumira abagaragu b'umwami, babagirira nabi barabica.

⁷Noneho umwami ararakara atuma ingabo ze zitsemba abo bicanyi, zitwika ibigo byabo.

⁸“Nyuma abwira abagaragu be ati: ‘Iby'ubukwe byateguwe, ariko abatumiwe ntibari babikwiye.

⁹Nuko rero nimujye amayira ahurira, mutumire mu bukwe abantu bose muri bubone.’

¹⁰Abagaragu bahita bagenda bakwira amayira, bakoranya abo babonye bose ari abeza ari ababi. Nuko inzu y'ubukwe yuzura abatumirwa.

¹¹“Umwami aherako arinjira agira ngo arebe abatumirwa be, maze ahabona umuntu utambaye umwambaro w'ubukwe.

¹²Aramubaza ati: ‘Mugenzi wanjye, waje hano ute udafite umwambaro w'ubukwe?’ Undi araceceka.

¹³Nuko umwami abwira abahereza ati: ‘Nimumubohe amaboko n'amaguru mumujugunye hanze mu mwijima, ni ho bazaririra bagahekenya amenyo.’ ”

¹⁴Yezu yungamo ati: “Erega hahamagarwa benshi hagatoranywa bake!”

¹⁵Nuko Abafarizayi baragenda, bajya inama y'uburyo bari bufatire Yezu mu byo avuga.

¹⁶Bamutumaho abigishwa babo hamwe n'abo mu ishyaka rya Herodi bati: “Mwigisha, tuzi ko uri umunyakuri kandi ko wigisha abantu inzira y'Imana mu kuri nta cyo utinya, kuko ufata abantu bose kimwe.

¹⁷Ngaho rero tubwire rero: mbese ibi ubyumva ute? Ese ni ngombwa ko dutanga umusoro w'umwami w'i Roma, cyangwa si ngombwa?”

¹⁸Nuko Yezu wari uzi ubugome bwabo arababaza ati: “Mwa ndyarya mwe, kuki muntega iyo mitego?

¹⁹Nimunyereke igiceri mutanga ho umusoro.” Bakimuzaniye,

²⁰arababaza ati: “Iyi shusho n'iri zina biriho ni ibya nde?”

²¹Baramusubiza bati: “Ni iby'umwami w'i Roma.” Yezu arababwira ati: “Nuko rero iby'umwami w'i Roma mubihe umwami w'i Roma, n'iby'Imana mubihe Imana.”

²²Babyumvise batyo baratangara, bamusiga aho barigendera.

²³Uwo munsi Abasaduseyi (abo ni bo bavuga ko kuzuka bitabaho) basanga Yezu baramubwira bati:

²⁴“Mwigisha, Musa yaravuze ngo niba umuntu apfuye agasiga umugore batarabyarana, umugabo wabo ajye amucyura acikure nyakwigendera.

²⁵Iwacu rero habayeho abavandimwe barindwi. Uwa mbere ashaka umugore apfa nta mwana babyaranye, maze murumuna we acyura uwo mugore.

²⁶Uwa kabiri na we biba bityo, n'uwa gatatu kugeza ku wa karindwi, bose bapfa ntawe umubyayeho umwana.

²⁷Amaherezo umugore na we arapfa.

²⁸Mbese igihe abantu bazazuka uwo mugore azaba muka nde, ko bose uko ari barindwi bazaba baramutunze?”

²⁹Yezu arabasubiza ati: “Mwarayobye, kuko mutamenye Ibyanditswe ntimumenye n'ububasha bw'Imana.

³⁰Erega mu gihe cy'izuka ntawe uzagira umugore, nta n'uzagira umugabo. Ahubwo bazamera nk'abamarayika bo mu ijuru.

³¹Ku byerekeye izuka ry'abapfuye, mbese ntimwasomye ijambo Imana yababwiye iti:

³²‘Ndi Imana ya Aburahamu n'Imana ya Izaki n'Imana ya Yakobo?’ Erega Imana si iy'abapfuye, ahubwo ni iy'abazima!”

³³Nuko rubanda babyumvise batangarira izo nyigisho ze.

³⁴Abafarizayi bumvise ko Abasaduseyi babuze icyo basubiza Yezu, bahita bakoranira aho ari.

³⁵Umwe muri bo wari umuhanga mu by'Amategeko ashatse kumutegera mu byo avuga, aramubaza ati:

³⁶“Mwigisha, mu Mategeko yose iry'ingenzi ni irihe?”

³⁷Yezu aramusubiza ati: “ ‘Ukunde Nyagasani Imana yawe n'umutima wawe wose n'ubuzima bwawe bwose, n'ubwenge bwawe bwose.’

³⁸Iryo ni ryo tegeko ry'ingenzi riruta ayandi yose.

³⁹Irya kabiri rimeze nka ryo ni iri: ‘Ujye ukunda mugenzi wawe nk'uko wikunda.’

⁴⁰Ayo mategeko yombi ni yo shingiro ry'Amategeko yose n'ibyanditswe n'abahanuzi.”

⁴¹Abafarizayi bamaze gukorana, Yezu arababaza ati:

⁴²“Ibya Kristo mubyumva mute? Ni mwene nde?” Baramusubiza bati: “Ni mwene Dawidi.”

⁴³Yezu ati: “Bishoboka bite, kandi Dawidi ubwe abihishuriwe na Mwuka w'Imana, yaravuze ko Kristo ari umwami we igihe yagiraga ati:

⁴⁴‘Nyagasani yabwiye Umwami wanjye ati: “Icara ku ntebe ya cyami iburyo bwanjye, nanjye nzashyira abanzi bawe munsi y'ibirenge byawe.” ’

⁴⁵None se ubwo Dawidi yita Kristo umwami we, Kristo yaba ate kandi umwana we?”

⁴⁶Nuko ntihagira ubasha kugira icyo amusubiza, ndetse kuva uwo munsi nta wongeye kumuhangara agira icyo amubaza.