Matthew 5

¹Yezu abonye ya mbaga y'abantu benshi azamuka umusozi, amaze kwicara abigishwa be baramwegera.

²Atangira kubigisha agira ati:

³“Hahirwa abafite imitima ikeneye Imana, kuko ubwami bw'ijuru ari ubwabo.

⁴Hahirwa abashavuye, kuko ari bo bazahozwa.

⁵Hahirwa abagwaneza, kuko ari bo bazaragwa isi.

⁶Hahirwa abafite inzara n'inyota byo gutunganira Imana, kuko ari bo bazahazwa.

⁷Hahirwa abanyambabazi, kuko ari bo bazazigirirwa.

⁸Hahirwa abafite imitima iboneye, kuko ari bo bazabona Imana.

⁹Hahirwa abazana amahoro mu bantu, kuko ari bo bazitwa abana b'Imana.

¹⁰Hahirwa abatotezwa bahōrwa gukora ibyo Imana ishaka, kuko ubwami bw'ijuru ari ubwabo.

¹¹“Murahirwa iyo babatuka, bakabatoteza, bakababeshyera ibibi byinshi ari jye babahōra.

¹²Mujye mwishima kandi munezerwe, kuko muzabona ingororano ishyitse mu ijuru. Ni ko batotezaga abahanuzi b'Imana bababanjirije.

¹³“Muri umunyu w'isi. Ariko se iyo umunyu wamaze gukayuka wakongera kuryoshywa n'iki? Nta cyo uba ukimaze, ahubwo ujugunywa hanze abantu bakawukandagira.

¹⁴“Muri urumuri rw'isi. Umujyi wubatse mu mpinga y'umusozi ntushobora kwihisha,

¹⁵kandi nta wacana itara ngo aryubikeho akabindi, ahubwo aritereka ahirengeye maze rikamurikira abari mu nzu bose.

¹⁶Mube ari ko mumurikira abantu, kugira ngo barebe ibyiza mukora bahimbaze So uri mu ijuru.

¹⁷“Ntimwibwire ko nazanywe no kuvanaho Amategeko cyangwa ibyanditswe n'abahanuzi. Sinazanywe no kubivanaho, ahubwo nazanywe no kubisohoza.

¹⁸Ndababwira nkomeje ko nta kanyuguti habe n'akadomo na kamwe ko mu Mategeko kazavaho, kugeza ubwo byose bizaba birangiye, ijuru n'isi bigashira.

¹⁹Umuntu wese uzaca ku itegeko rimwe, naho ryaba rito muri ayo yose, akigisha abantu kugenza nka we, azagirwa uwa nyuma mu bwami bw'ijuru. Ariko uzayumvira akayigisha abandi, azitwa mukuru mu bwami bw'ijuru.

²⁰Reka mbabwire, nimudatunganira Imana kurenza abigishamategeko n'Abafarizayi, ntabwo muzinjira mu bwami bw'ijuru.

²¹“Mwumvise ko aba kera babwiwe ngo: ‘Ntukice’, kuko uwishe umuntu azashyirwa mu rubanza.

²²Ariko jyewe ndababwira ko umuntu wese urakarira mugenzi we azashyirwa mu rubanza. Kandi umuntu wese ubwira mugenzi we ati: ‘Uri igicucu’, aba akwiye kubibarizwa mu rukiko rw'ikirenga, naho ubwira mugenzi we ati: ‘Wa kigoryi we!’ aba ari uwo gushyirwa mu nyenga y'umuriro.

²³Noneho nujyana ituro ryawe ku rutambiro kuritura Imana, wahagera ukibuka ko mugenzi wawe afite icyo apfa nawe,

²⁴uzasige ituro ryawe aho imbere y'urutambiro, maze ubanze ugende wigorore na we, ubone kuza utange ituro ryawe.

²⁵“Nujyana mu rukiko n'uwo muburana, wigorore na we mukiri mu nzira kugira ngo atagushyikiriza umucamanza, na we akaguha umuporisi akagushyira muri gereza.

²⁶Ndakubwira nkomeje ko utazavamo utabanje gutanga amafaranga baguciye yose, hatabuze na rimwe.

²⁷“Mwumvise ko byavuzwe ngo: ‘Ntugasambane.’

²⁸Ariko jyewe ndababwira yuko umuntu wese ureba umugore akamurarikira, mu bitekerezo bye aba amaze gusambana na we.

²⁹Nuko rero ijisho ryawe ry'iburyo niba ryakugusha mu cyaha, urinogore urite. Icyakubera cyiza ni ukubura rumwe mu ngingo zawe, aho kugira ngo umubiri wawe wose utabwe mu nyenga y'umuriro.

³⁰Niba ikiganza cyawe cy'iburyo cyakugusha mu cyaha, ugice ugite. Icyakubera cyiza ni ukubura rumwe mu ngingo zawe, aho kugira ngo umubiri wawe wose utabwe mu nyenga y'umuriro.

³¹“Byavuzwe kandi ko ‘Ushaka kwirukana umugore we agomba kumuha urwandiko rwemeza ko amusenze.’

³²Ariko jyewe ndababwira ko umuntu wese wirukana umugore we, bitavuye ku kubana kutemewe n'Amategeko, nyuma agacyurwa n'undi mugabo, aba amugize umusambanyi. Byongeye kandi ucyura umugore wirukanywe, na we aba asambanye.

³³“Mwumvise ko aba kera babwiwe ngo ‘Ntukarahire ibinyoma, ahubwo uzajye uhigura imihigo wahigiye Nyagasani.’

³⁴Ariko jyewe ndababwira kutarahira rwose, kwaba kurahira mushingiye ku ijuru kuko ari intebe ya cyami y'Imana,

³⁵cyangwa ku isi kuko ari yo kabaho ikandagizaho ibirenge, cyangwa kuri Yeruzalemu kuko ari umurwa w'Umwami ukomeye.

³⁶Ndetse ntuzanarahire ushingiye indahiro ku mutwe wawe, kuko utabasha guhindura agasatsi kawe na kamwe ngo kabe umweru cyangwa kirabure.

³⁷Mujye muvuga gusa muti: ‘Yego, ni byo’, cyangwa se muhakane muti: ‘Oya, si byo’. Ibindi umuntu agerekaho byose biba biturutse kuri Sekibi.

³⁸“Mwumvise ko byavuzwe ngo: ‘Umennye undi ijisho na we barimumene’, kandi ngo: ‘Ukuye undi iryinyo na we barimukure.’

³⁹Ariko jyewe ndababwira kutitura inabi mwagiriwe. Ahubwo umuntu nagukubita urushyi mu musaya w'iburyo, umuhe n'undi musaya.

⁴⁰Byongeye kandi umuntu nashaka kuguhuguza ishati uyimuhe, ugerekeho n'ikote.

⁴¹Nihagira uguhata kumwakira umutwaro ngo uwutware kirometero imwe, uzongereho n'iya kabiri.

⁴²Ugusabye umuhe, kandi ushaka kugira icyo agutira ntukamwiyame.

⁴³“Mwumvise ko byavuzwe ngo: ‘Ujye ukunda mugenzi wawe, kandi wange umwanzi wawe.’

⁴⁴Ariko jyewe ndababwira nti: ‘Mukunde n'abanzi banyu kandi musabire ababatoteza.’

⁴⁵Ibyo mubikorere kugira ngo mube abana nyakuri ba So uri mu ijuru, kuko avusha izuba rye ku beza no ku babi, kandi akagusha n'imvura ye ku ntungane no ku bagome.

⁴⁶Niba mukunda ababakunda gusa, ubwo se mukwiriye ngororano ki? Mbese abasoresha bo ntibabigenza batyo?

⁴⁷Kandi niba muramutsa incuti zanyu gusa, muba murushije iki abandi bantu? Mbese abatazi Imana bo ntibabigenza batyo?

⁴⁸Mube intungane nk'uko So uri mu ijuru ari intungane.