Matthew 6

¹“Ibikorwa byiza byanyu murajye mwirinda kubikorera imbere y'abantu kugira ngo babarebe, mutazivutsa ingororano ya So uri mu ijuru.

²“Igihe uhaye umukene imfashanyo ntukabyamamaze nk'uko abantu b'indyarya babigenza, bari mu nsengero no mu mayira kugira ngo abantu babashime. Ndababwira nkomeje ko ingororano yabo baba bamaze kuyishyikira.

³Ahubwo wowe igihe uhaye umukene imfashanyo, ntihakagire n'inyoni ibimenya.

⁴Bityo ibyo umuhaye bizabe ibanga. Nuko So we umenya ibiri mu ibanga azakwitura.

⁵“Igihe musenga ntimukamere nk'abantu b'indyarya, bakunda gusenga bahagaze mu nsengero no mu mahuriro y'inzira kugira ngo abantu bababone. Ndababwira nkomeje ko ingororano yabo baba bamaze kuyishyikira.

⁶Ahubwo wowe igihe usenga ujye winjira mu cyumba cyawe ukinge, maze usenge So uba ahatagaragara. Nuko So we umenya ibiri mu ibanga azakwitura.

⁷“Igihe musenga ntimugatondagure amagambo atagira icyo avuga, nk'uko abatazi Imana babigenza bibwira ko bazasubizwa kubera amagambo menshi.

⁸Ntimukagenze nka bo, kuko So aba azi icyo mukeneye mutarakimusaba.

⁹Nuko rero mujye musenga muti: ‘Data uri mu ijuru, izina ryawe niryubahwe,

¹⁰ubwami bwawe nibuze. Ibyo ushaka bibe ari byo bikorwa ku isi, nk'uko bikorwa mu ijuru.

¹¹Uduhe none ifunguro ridukwiriye.

¹²Utubabarire ibyo twagucumuyeho, nk'uko natwe tubabarira abaducumuyeho.

¹³Ntutureke ngo tugwe mu byadushuka, ahubwo udukize ikibi, [kuko ubwami n'ubushobozi n'ikuzo ari ibyawe iteka ryose. Amina.]’

¹⁴“Nimubabarira abandi ibyo babacumuyeho, So uri mu ijuru na we azabababarira ibyo mumucumuraho.

¹⁵Ariko nimutababarira abandi, So uri mu ijuru na we ntazabababarira ibyo mumucumuraho.

¹⁶“Igihe mwigomwe kurya ntimukijime mu maso nk'abantu b'indyarya bakambya agahanga, kugira ngo abantu bamenye ko bigomwe kurya. Ndababwira nkomeje ko ingororano yabo baba bamaze kuyishyikira.

¹⁷Naho wowe niwigomwa kurya, wiyuhagire mu maso kandi usokoze,

¹⁸kugira ngo abantu batamenya ko wigomwe kurya, keretse So uba ahatagaragara. Nuko So we umenya ibiri mu ibanga azakwitura.

¹⁹“Ntimukirundanyirize ubukungu ku isi aho inyenzi n'ingese bibwangiza, n'abajura bakahaca ibyuho bakiba.

²⁰Ahubwo mubwirundanyirize mu ijuru aho inyenzi n'ingese bitabwangiza, n'abajura ntibahace ibyuho ngo bibe.

²¹Aho ubukungu bwawe buri ni ho uzahoza umutima.

²²“Itara ry'umubiri ni ijisho. Nuko rero ijisho ryawe niriba rizima, umubiri wawe wose uzaba umurikiwe.

²³Ariko ijisho ryawe niriba rirwaye, umubiri wawe wose uzaba ucuze umwijima. Niba rero urumuri rwawe ruzimye, mbega ukuntu umwijima ukurimo uba mwinshi!

²⁴“Nta mugaragu ushobora gukorera ba shebuja babiri. Iyo adakunze umwe ngo yange undi, ayoboka umwe agasuzugura undi. Nuko rero ntimushobora kuba abagaragu b'Imana ngo mube n'abagaragu b'amafaranga.

²⁵“Reka mbabwire rero ku byerekeye ubuzima: ntimukabunze imitima mwibaza icyo muzarya [cyangwa icyo muzanywa] cyangwa icyo muzambara. Mbese ubuzima ntiburuta ibyokurya, n'umubiri ukaruta imyambaro?

²⁶Nimurebe inyoni: ntizibiba, ntizinasarura, ntizihunika, nyamara So uri mu ijuru arazigaburira. Mbese ntimuzirusha agaciro cyane?

²⁷Ni nde muri mwe wakongēra nibura akanya na gato ku gihe azamara, kubera ko yabungije imitima?

²⁸“Ni iki gituma rero mubunza imitima mwibaza icyo muzambara? Mwitegereze ukuntu indabyo zo mu gasozi zikura: nta murimo zikora, nta n'imyenda ziboha.

²⁹Nyamara mbabwiye ko na Salomo mu bukire bwe bwose, atigeze arimba nka rumwe muri zo.

³⁰None se mwa bantu bafite ukwizera guke mwe, ubwo Imana yambika ityo ibyatsi byo ku gasozi biba biriho none ejo bakabicana, ntizabarushirizaho cyane?

³¹“Ntimukabunze imitima rero mwibaza muti: ‘Tuzarya iki?’ cyangwa muti: ‘Tuzanywa iki?’ cyangwa muti: ‘Tuzambara iki?’

³²Ibyo byose abanyamahanga batazi Imana ni byo baharanira, nyamara So uri mu ijuru azi ko mubikeneye uko bingana.

³³Ahubwo mbere ya byose muharanire ubwami bw'Imana no kuyitunganira, bityo n'ibyo bindi byose na byo muzabihabwa.

³⁴Nuko rero ntimukabunze imitima mwibaza iby'ejo, kuko ‘iby'ejo bibara ab'ejo’. Ingorane za buri munsi zirahagije ku bwawo!