1 John 4

¹Ilanyor laainei, emiiruk enkiyang'et ake pooki, kake entetem inkiyang'eta pee idolidolo te naa eine Nkai; amu etijing'a enkop iloibonok kumok le lejare.

²Ena iyiolounyenye Enkiyang'et e Nkai; ore enkiyang'et ake pooki naibalunye Yesu Kristo nchere eewuo to sesen naa ene Nkai.

³Ore enkiyang'et ake pooki nemeibalunye Yesu neme ene Nkai. Enkiyang'et o Loiba Kristo ina, naa ninye apa itoning'o aajo kelotu, neidipa taata atijing'a enkop.

⁴Nakera kutiti, irara intae ine Nkai, nindipa aatimir lelo oibonok le lejare; amu ore ilo otii atua intae naa eikitok alang ilo otii atua ena kop.

⁵Ile nkop ninche, metaa ore ina najo ninche naa ine nkop, naa ninche ening enkop.

⁶Kira iyiook ile Nkai, ore oloyiolo Enkai nening iyiook, ore ilo lemeyiolo Enkai nemening ninye iyiook. Ena kiyiolounye enkiyang'et e sipata o enkiyang'et e nkitadiaata.

⁷Ilanyor laainei, ematonyorrata maate amu ene Nkai enyorrata naa ore ilo onyorrisho neino te Nkai neyiolo Enkai.

⁸Ore ilo lemenyorrisho nemeyiolo Enkai; amu ore Enkai naa enyorrata.

⁹Inji eikuna Enkai pee eibalie enyorrata enye tiatua iyiook, nchere eirriwua Enkai Enkerai enye meeu enkop, metaa ninye kinchuyie.

¹⁰Ene doi etii enyorrata nchere, mme iyiook ootonyorra Enkai kake ninye natonyorra iyiook neirriu Enkerai enye metaa olkipoket loo ng'ok ang.

¹¹Ilanyor laainei, te netonyorra iyiook Enkai aiko nji, keishiaakino sii ninche iyiook te nikinyorruno olikae olikae.

¹²Meetae oltung'ani otoduaa Enkai aekata; te nikinyorra maate, nebik Enkai tiatua iyiook neitabari enyorrata enye tiatua iyiook.

¹³Ena kiyiolounye nchere ekitoni tiatua ninye, neton ninye tiatua iyiook, te nkaraki naishoo iyiook Enkiyang'et enye.

¹⁴Nikitoduaa iyiook nikinchakenoo nchere eirriwua Papa Enkerai enye metaa Olaitajeunoni le nkop.

¹⁵Ore pooki ng'ae oibalie nchere Enkerai e Nkai Yesu kebikito Enkai tiatua ninye, nebikito ninye tiatua Enkai.

¹⁶Metaa eikiyiolo iyiook nikiruko enyorrata naata Enkai te iyiook. Ore Enkai naa enyorrata, ore ilo obik tiatua enyorrata nebik tiatua Enkai, nebik Enkai tiatua ninye.

¹⁷Ena eitabarieki enyorrata tiatua iyiook, nchere eikiata enkitieunoto te nkolong e nkiguana, amu ore enatiu ninye naa nejia sii iyiook kitiu te na kop.

¹⁸Ore etii enyorrata nemetii enkuretisho, kake kemir enyorrata nadede enkuretisho. Amu ore enkuretisho naa enkitamioto eipirta, naa ore ilo oureisho nemedede enyorrata te ninye.

¹⁹Ekinyorisho iyiook amu Enkai natang'asa anyorru iyiook.

²⁰Te nejo likae, “Kanyor nanu Enkai,” neiba olalashe lenye, kelejisho amu ore olemenyor olalashe lenye otoduaa, nemeidim ninye atonyorra Enkai neitu aekata edol.

²¹Naa ena enkitanapata nikiata aa Kristo eing'uaa, nchere ore ilo onyor Enkai neishiakino nenyorru sii ninye olalashe lenye.