1 John 5

¹Ore pooki ng'ae ooiruk nchere ore Yesu ninye Kristo naa enkerai e Nkai. Ore pooki ng'ae onyor menye nenyor sii ninye enkerai enye.

²Ena kiyiolounye nchere kinyor inkera e Nkai te nikinyor Enkai nikimbung nkitanapat enyena.

³Ena enyorrata e Nkai, nchere maibung'a nkitanapat enyena. Naa ore nkitanapat enyena nemeekisho.

⁴Ore pooki toki naino te Nkai nemir enkop; naa ena emirata namir enkop, enkirukoto ang.

⁵Ai ng'ae doi omir enkop leme ilo oiruko nchere Enkerai e Nkai Yesu?

⁶Yesu Kristo doi ele oewuo te nkare o to sarge, neme te nkare ake eewuo kake te nebo enkare o sarge.

⁷Naa Enkiyang'et shakeni, amu ore Enkiyang'et naa esipata.

⁸Eetae shakeni nara uni Enkiyang'et, enkare, o sarge; nening'o pokira uni anaa nabo.

⁹Te naa eiking'amaa shakeni oo ltung'ana, shakeni e Nkai nalusoo; naa ena shakeni e Nkai nchere etaa ninye shakeni te Nkerai enye.

¹⁰Ore ilo oiruk Enkerai e Nkai neeta shakeni tiatua kewan. Ore ilo lemeiruk Enkai neitaa ninye olalejani, amu eitu eiruk shakenisho naitadedeyie Enkai te Nkerai enye.

¹¹Naa ena shakeni, nchere eishoo iyiook Enkai enkishui oo ntarasi, naa atua Enkerai enye etii ina kishui.

¹²Ore oloata Enkerai e Nkai neeta enkishui; ore olemeeta Enkerai e Nkai nemeeta enkishui.

¹³Intae lelo ooiruko Enkerai e Nkai aigeroki ena, pee iyiolouu intae aajo iatata enkishui oo ntarasi.

¹⁴Naa ena kitieunoto kiata iyiook tiatua ninye, nchere ti nikiomonu ake ninye entoki pooki te risioroto e yieunoto enye naa kening ninye iyiook.

¹⁵Naa ti nikiyiolo aajo kening ninye iyiook te pooki nikiomonu, ekiyiolo aajo kitang'amutua nena pooki nikitoomonutuo te ninye.

¹⁶Te neduaaki likae lang olalashe aashu enkanashe easita entorrono neme ene keeya, neomonoki, naa kening Enkai neisho enkishui lelo leme ine keeya ing'ok enye. Keetae ng'ok e keeya; eitu ajo metoomonokini oltung'ani teina.

¹⁷Ing'ok nkitarruorrot pooki, kake keetae ing'ok neme ne keeya.

¹⁸Kiyiolo iyiook aajo ore pooki ng'ae oino te Nkai nemeas ing'ok, kake Ilo oino te Nkai orrip ninye nemeiseyie ilo torrono ninye.

¹⁹Kiyiolo iyiook aajo kira ile Nkai, ore enkop pooki naa atua eng'olon e ilo torrono etii.

²⁰Nikiyiolo sii aajo eewuo Enkerai e Nkai neishoo iyiook enining'unoto, matayiolo olosipa; naa ilo osipa kitii iyiook atua, aatii atua Enkerai enye Yesu Kristo. Ninye doi Enkai nasipa naa ninye enkishui oo ntarasi.

²¹Nakera kutiti, entodol ate too nkitanyaanyukot naaitaae nkaitin.