2 John 1

¹Nanu olpayian oigeroki enkitok nageluno o nkera enyena nanyor ti atua sipat, neme nanu ake, kake nejia etiu lelo pooki ooyiolo esipata,

²te nkaraki esipata nebikito ti atua iyiook naa keton te nebo iyiook ntarasi.

³Metaa te nebo iyiook empiris o lng'ur, o eseriani naing'uaa Enkai Papa neing'uaa Yesu Kristo Oinoti le Papa, te sipata o te nyorrata.

⁴Kang'ida naleng tenadol kulie kera inono esujita esipata anaa ina ake naitanapa iyiook Papa.

⁵Naasai naa taata nakitok, neme taa kaata ae kitanapata ng'ejuk naaigeroki, kake enapa ake nikiaata te nkiterunoto, nchere matonyorrata maate.

⁶Naa inji eikununo enyorrata te nikisuj iyiook inkitanapat enyena, naa ena enkitanapata anaa enikitoning'o apake te nkiterunoto, nchere enchomie enyorrata.

⁷Etijing'a lalejak kumok enkop, iltung'ana lemenyorraa elotunoto e Yesu Kristo to sesen, ore oltung'ani laaijo ilo naa olalejani, oloiba Kristo.

⁸Entodol ate pee minturraa ina nikisiaayutua, kake pee itumutumu olekoisiaayio linyi ebore.

⁹Ore pooki olo dukuya nemebik te nkiteng'enare e Kristo nemeeta ilo Enkai; ore ilo obik teina kiteng'enare neeta pokira aare Papa o Enkerai.

¹⁰Ore ake ololotu enitii lemeyau ena kiteng'enare eming'amu aaitijing aji aashu irorokiki;

¹¹amu ore oloiroroki netang'arie esiaai enye torrono.

¹²Ore hoo naata nkumok naaigeroki, mayieu naiger te nkardasi o ranki le nkalamu, kake kaisilig ajo kalotu adol intae nairorie intae enotote iyiok nkomomi, pee elulung'ayu eng'ida ang.

¹³Eiroroki intae nkera e nkanashe ino nageluno.