3 John 1

¹Nanu Olpayian oigeroki olanyor Gayo, ilo lanyor te sipata.

²Olanyor lai, aaomonoki pee eitabari mbaa pooki te iyie niaku biyoto; kayiolo ajo aibiyoto oltau lino.

³Amu ating'ide oleng pee ebau kulikae alashera ootaa shakeni nchere inyok too sipat te nkishon ino, amu kesipa ajo isujita iyie esipata.

⁴Matum nanu ae ng'ida nalang ena, te naning eji kesujita inkera aainei esipata.

⁵Olanyor lai, itaa oloisiligayu too nintaasa ilalashera, neisul too ltung'ana omon, lelo ooishakenutuo,

⁶enyorrata ino te dukuya esirit. Embae sidai ina tenintobiraa ninche epuo anaa, enaishiaakino esiaai e Nkai.

⁷Amu te nkaraki ninye pee etudumunye nemeeta toki natang'amutua te lelo leitu eiruk.

⁸Metaa keishiakino te nikiretu iltung'ana laaijo lelo, pee kiaku ilaisiaayiak ti atua esipata.

⁹Kaata enaigeroko esirit; kake ore Diotrefes, ilo onyor aiturukie kewan, nemeyieu neening enajo.

¹⁰Metaa, te nalotu, naibalie nena naasita, nanu esukeny too rorei le nkarruoisho. Neitu doi eidip ina, etanya ninye makewan eng'amu ilalashera, nemitiki sii lelo ooyieu neitoomon nearaa ninche te sirit.

¹¹Olanyor lai, misuj iyie enkarruoisho kake isupati tusuja. Ore oloas isupati ninye ole Nkai; ore oloas enkarruoisho neitu edol Enkai.

¹²Keeta Demetrus shakenisho sidai te pooki ng'ae, o te sipata kewan, naitadedeyie sii nanu, nikira sii iyiook shakeni niyiolo ajo kesipa shakeni ang.

¹³Kaata nkumok naaigeroki paa ae mayieu naiger te nkalamu o to ranki le nkalamu;

¹⁴ekaisilig ajo etataana pee kitumo, nikiro te nebo enotote nkomomi.

¹⁵Metaa eseriani tenebo iyie. Kiroroki ilchoreta. Iroroki ilchoreta lang, pooki.