1 Peter 1

¹Petero, olkipaaret le Yesu Kristo - enetii ilgelunot ooidapashakinote Ponto o Galatia o Kapodokia o Asia o Bitinia

²ootegeluaki apa neitaanya Enkai Papa te Nkiyang'et metoning'o Yesu Kristo te nkisuaakinoto o sarge lenye. Metoponari tiatua intae empiris o eseriani.

³Meisisi Enkai naa Papa lo Laitoriani lang Yesu Kristo! Ore te nkaraki olng'ur lenye sapuk eishoo iyiook metoini aaigil tiatua osiligi oishu te mpiunoto e Yesu Kristo aing'uaa lootuata,

⁴pee kitum enjung'ore nemerruoyo, nemeiduruk, nememusanu naiteng'elaki te keper te nkaraki intae.

⁵Kerripi ntae te ngolon e Nkai te nkaraki enkirukoto inyi, pee itumutumu enjeunoto nairragita ake pee eibalunyieki te nkolong e nkiting'oto.

⁶Entishipata te nkaraki ina, hoo ninye te naa aimeeta inchere pee mitumutumu intemat oo mpukunot kumok te nkiti kata,

⁷ore pee etiu inji, enkirukoto inyi eji pee etemi nenyorrarri aajo keeta tipat alang saabu narruoyo netetemaki te nkima nitumutumu enkisisa, o enkitoo o enkanyit te mbolunoto e Yesu Kristo.

⁸Oleitu idolidolo, ninyorrinyorro ninye, nirukuruku hoo nimidolitata ninye taata, nishipapa, enchipai nemeimakinoyu ebore enkisisa.

⁹Ning'amumu te nkiting'oto e nkirukoto inyi, enjeunoto oo ltauja linyi.

¹⁰Ena jeunoto apa eing'orutua, neikeni iloibonok le Nkai ooibonutuo empiris nalotu aaku eninyi.

¹¹Eikilikuanutua aajo kalo tung'ani naa kaa kata etuutua Enkiyang'et e Kristo natii atua ninche, ina kata apa namurutoo aalimu inkisilisilot e Kristo o enkitoo nasuju.

¹²Etabolokoki ninche metayiolo, inchere imme ate eisiaayiaki te nena kake intae, nena baa naainosakaki intae taata lelo oolikioo ilomon supati te ngolon e Nkiyang'et Sinyati nairriwuaki eing'uaa keper naa imbaa naang'uar apa ilmalaika pee edol.

¹³Ore naa entorrip indamunot inyi, eririki mbaa nipikipiki osiligi linyi pooki shumata empiris nayakini intae te mbolunoto e Yesu Kristo.

¹⁴Anaa inkera naaning'isho, eminturubare ate inapa ng'uarrat niaatata enapa kata imodada.

¹⁵Kake ore anaa sinyati ilo oipoto intae, entaa sii intae sinyat to lkuaak linyi pooki.

¹⁶Amu etisiraki aajo, “Entaa intae sinyat, amu kara Nanu Sinyati.”

¹⁷Naa te naa aimpotipoto ninye aajo Papa, ilo oiguanare pooki tung'ani metii enyorrakinoto eng'ura ate entotoni te nkuretisho tena rishata nitii ene anaa nkisikat.

¹⁸Iyiololo aajo, etalakuaki intae too rrekiei linyi lemeeta tipat litujung'utuo too loo papaai linyi, mme too ntokitin naaruoyo anaa enkosholai o saabu

¹⁹kake to sarge ogol enkinyiang'a le Kristo, otiu anaa olkuoo lemeeta entiyoto anaa entibili.

²⁰Oloitaanyitai apa eton eitu eitamanyuni enkop, kake keibalunyieki te nkiting'oto oo nkatitin te nkaraki intae,

²¹naa te ninye ing'idarere intae Enkai, ilo oitopiwuo Yesu aitung'uaa ilootuata, neisho ninye enkitoo paa ore enkirukoto o siligi linyi naa atua Enkai etii.

²²Ore te nkaraki nindipa aaitukuo iltauja linyi te nkibung'ata oo sipat, niaatata enyorrata nemetii esunkuroisho too lalashera linyi o nkanashera inyi, entonyorrata intae maate aakurraki too ltauja.

²³Etoiwuoki intae aaigil neme te mpeu narruoyo kake te nemerruoyo, eimu ororei le Nkai oishu nebik intarasi.

²⁴Amu “Etiu iseseni anaa nkujit, netiu enkitoo enye pooki anaa ene ntapukai oo nkujit. Ketoyu inkujit, nedoiyio entapukai;

²⁵kake kebik ororei lo Laitoriani intarasi.” Ore ilo rorei naa lelo omon supati ooinosakaki intae.