James 5

¹Entoning taa lo karsisi, enchira nibuakibuaka amu kelotu shumata intae osina.

²Netupurdate imasaa inyi, neinosa oriri inkilani inyi.

³Ore saabu inyi o nkoshola inyi etodoro einosa enkop, ore ina doron e nkinosata e nkop neaku olmonekie te intae naa kenya inkiri oo seseni linyi anaa enkima. Irragie olchumati loo masaa too nkolong'i e nkiting'oto.

⁴Eng'ura ajo ore olekoisiaayio loo laisiaayiak ootudung'o inkurman, litomito too losekin, etabuaa aishir, netabaikia olkiyioi loo laisiaayiak inkiyiaa o Laitoriani loo lororani.

⁵Inosa intae olkar te nkop, nitonini ti atua inaaitiship osesen, nintotiti iltauja linyi te nkolong e yiang'are.

⁶Itudung'okito enkiguana niaariara metua oltung'ani supat lemeirish ninye intae.

⁷Enting'iria, intae ilalashera o nkanashera; o metabau elotunoto o Laitoriani. Eng'ura aajo keanyu olaturoni le nkurma ilng'anayio sidain le nkop. Neng'iri o metaba anaa netum enchan e dukuya o ene siadi.

⁸Enting'iria sii intae. Entagolo ltauja linyi, amu etinyikua elotunoto o Laitoriani.

⁹Eming'unyung'unyakino, ilalashera o nkanashera aainei pee meiguanareki ake intae, eng'ura eitashe Oladung'oni le nkiguana too nkutukie oo nkajijik.

¹⁰Entusuj, ilalashera o nkanashera aainei enkitanyaanyukoto o sina o eng'iriata oo loibonok le Nkai ooiroro te nkarna o Laitoriani.

¹¹Eng'ura, kijo emayiana lelo oongiri. Itoning'o eng'iriata e Yoab, nitoduaa enaitaasa Olaitoriani ninye te nkiting'oto, amu kenana Olaitoriani oshoke neeta olng'ur.

¹²Kake ore enalang pooki, ilalashera o nkanashera aainei eminya olmumai te shumata anaa te nkop, anaa ti ae ake ninye toki, enchoo “ee” inyi metaa “ee” ake, ore “A'a” neaku “A'a” ake, pee mijing'ijing'i ake abori enkiguana.

¹³Ketii obo ti atua intae oata enyamali? Inchoo eomon. Ketii oloshipa? Inchoo erany isinkolioitin le nkisisa.

¹⁴Ketii obo ti atua intae omuoi Inchoo eipot ninye ilpayiani le sirit pee eomonoki, neelie ninye eilata te nkarna o Laitoriani;

¹⁵naa keitajeu enkomono e nkirukoto ilo tung'ani omuoi, neinyeyie Olaitoriani ninye, naa te netaasa ng'ok, nepalakini.

¹⁶Neeku, embalakinoto ng'ok inyi maate, niomonokinono, pee eishiunyieki intae. Amu eeta enkomono o ltung'ani supat enkidimata sapuk.

¹⁷Ore Eliya, oltung'ani apake le mpukunoto ang. Netoomono akurraki pee mesha; neitu eshaiki enchan enkop too larin okuni o lapaitin ile.

¹⁸Neitoki ake aomon, neishoru shumata enchan, neiu enkop ilng'anayio lenyena.

¹⁹Ilalashera o nkanashera aainei te neibakibak obo linyi aing'uaa esipata, neshuku likae ninye,

²⁰nincho ninye metaiyiolo inchere ore pooki oshuku olaasani loo ng'ok aitung'uaa enkoitoi enye e marmalisho, eitajewuo oltau lenye te keeya neitoipoo olorora loo ng'ok.