1 Thessalonians 2

¹Iyiololo intae maate, ilalashera o nkanashera inchere mme ene pesho elotunoto ang nikietuo enitii intae.

²Amu iyiololo, olosilisili o morot nikinoto te Filipi, neme toki amu eishoo iyiook Enkai empijan nikilikinye intae Ilomon Supati, hoo netii enkesha sapuk.

³Amu ore esayiakinoto ang nemepuku eing'uaa enkitapong'oroto anaa ilduruki neme to losek eitobiruaki.

⁴Kake ore anaa enatonyorrayie iyiook Enkai neisiligaki iyiook Ilomon Supati, neijia kijo iyiook neme pee kintiship iltung'ana, kake pee kintiship Enkai naineneng indamunot ang.

⁵Amu ore iyiook neitu aekata kiasishore irorei le nkilelemare, anaa eniyiololo, aashu kiaata imbaa naisudoo eului naa Enkai shakeni.

⁶Neitu king'oru enkisisa too ltung'ana, aa te intae, aashu te kulikae, hoo naa anaata kinkuna neijia anaa ilkipaareta le Kristo.

⁷Kake aikibor apa tiatua intae anaa enkaibung'ani naing'or inkera enyena.

⁸Neaku ore te nkaripo kiyieu intae kiterretenate pee king'ar te nebo intae neme ilomon ake Supati le Nkai maate, kake o yiook sii maate amu itaa intae kiroteti oleng te iyiook.

⁹Amu idamumu intae enyamali ang o esiaai nagol, ilalashera o nkanashera, kitaasishote dama o kewarie, pee mikiek hoo likae te intae, kiliki intae Ilomon Supati le Nkai.

¹⁰Irara intae shakeni, naa neijia sii etiu Enkai, te sinyatisho o te supatisho nimikiaata entiyoto to lkuaak lang tialo intae ilairukok.

¹¹Iyiololo aajo kintaasa intae anaa enaitaas menye inkera enyena, kinkoo pooki ng'ae te ntae nikintagol oishuaa, nikintanapa intae.

¹²Pee ipuopuo te nkishon naishiaakino te Nkai, ilo oipotoki intae atua enkitoria enye makewan e nkitoo.

¹³Nikincho sii iyiook oshiaake Enkai enashe te nkaraki ena, inchere pee ing'amumu ororei le Nkai litoning'o te iyiook, eitu intae ing'amumu anaa ororei loo ltung'ana, kake anaa enatiu te dede ororei le Enkai tiatua intae ilairukok.

¹⁴Amu ore intae ilalashera o nkanashera intoduaarie ate isirito e Nkai tiatua Kristo Yesu naatii atua Yudea. Amu inoto sii intae olosilisili too ltung'ana lo lorere linyi anaa enanoto sii ninche too Lyahudi,

¹⁵laa ninche ootaara ndung'ot pokira metuata, Olaitoriani Yesu o loibonok le Nkai, nearaa iyiook ong'ata, nemeitiship Enkai neibooyo ltung'ana pooki

¹⁶emitiki iyiook kiliki Iloreren enaiko pee eitajeuni, ejo pee etum aaiputu emborei o ng'ok enye pooki. Kake eewuo engoro e Nkai te nkiting'oto shumata ninche.

¹⁷Kake ore naa ilalashera o nkanashera, anaa neorieki iyiook intae te nkiti kata, too seseni neme too ltauja, kitonyuaa te yieuna sapuk o te nyorrata kitok pee kintoki aadua.

¹⁸Amu kitayieutua nikipuonu enitii intae, atetema nanu Paulo enkata neme nabo kake eibooyie iyiook Sheitani.

¹⁹Amu kainyoo osiligi lang aashu eng'ida aashu entoki naisul nikiwuasare te dukuya Olaitoriani lang Yesu te lotunoto enye? Aime intae?

²⁰Amu irara intae enkitoo ang o eng'ida ang.