1 Thessalonians 1

¹Nanu Paulo o Silvano o Timoteo, ooigeroki esirit oo Lsesalonike, tiatua Enkai Papa o Laitoriani Yesu Kristo. Enoto empiris o eseriani.

²Kincho oshiaake Enkai enashe te nkaraki intae pooki nikidamu ntae anaake tiatua enkomono ang.

³Kidamu intae te dukuya Enkai ang Papa o esiaai inyi e nkirukoto o enyamali e nyorrata o enkitaushoto o siligi tiatua Olaitoriani lang Yesu Kristo.

⁴Amu irara nkanashera o lalashera oonyor Enkai kiyiolo aajo etegelua ninye intae,

⁵amu aime to rorei ake etabaikia intae ororei supat, kake te ngolon sii o te Nkiyang'et Sinyati o te sipunoto nalulung'a. Iyiololo empukunoto ang enaikununo apa kitii atua intae naa te nkaraki intae.

⁶Nitaa intae ilooduaaya iyiook o Laitoriani amu, itang'amutua ilo rorei te nkaripo sapuk, te ng'ida naing'uaa Enkiyang'et Sinyati.

⁷Itaa intae enkitanyaanyukoto too lairukok pooki tiatua Makedonia o tiatua Akaia.

⁸Amu mme taa ake tiatua Makedonia o Akaia etoning'e ele rorei lo Laitoriani naa intae eing'uaa kake ore enkirukoto inyi tiatua Enkai neshomo aibulaa pooki wueji, neaku meeta tipat pee kijo ae.

⁹Amu ore ninche maate netolimutuo tialo iyiook eneba enkitoomono nikinoto te intae o eninkuna pee imbelekenyakinono Enkai aaing'uaa inkitanyaanyukot, aaisiaai Enkai naishu nasipa,

¹⁰nianyunyu Oinoti lenye eing'uaa keper, ilo oitopiwuo ninye aitung'uaa ilootuata, Yesu laa ninye olaku iyiook aitung'uaa engoro e Nkai nalotu.