Colossians 4

¹Ore intae ilooitoreisho, entaasa irrindiki linyi isipat o too nkiririkinot, iyiololo aajo iatata sii intae Olkitok linyi te keper.

²Entasheikinoto enkomono emingusugus, irripishosho nisholololo, niomonokiki sii ninche iyiook,

³metaboloki Enkai iyiook enkoitoi ele rorei, matolikioi enkisudoroto naipirta Kristo naa te nkaraki ninye pee atii nanu jila,

⁴peyie atum aibalunye enaaishiaakino nairo.

⁵Enteng'enuoto tialo ilelo leme ilairukok niasishorere irishat pooki.

⁶Enchoo nkirorot inyi nkatitin pooki eaku ine mborron neeta emunyan, pee itumutumu aatayiolo enijojo te niwalikiki pooki ng'ae.

⁷Tikikos olotu aliki intae mbaa aainei; olalashe lai lanyor naa olaisiaayiani oisiligayu naa osinka le ncholiek ai tiatua Olaitoriani.

⁸Nanu oirriwua enitii ajo pee, itumutumu aatayiolo enikitiu netum aitagolo iltauja linyi,

⁹neiriamunore Onesimas olalashe onyorri neisiligayu, laa obo linyi. Ninche oopuonu aainosaki intae mbaa pooki naataasate tene.

¹⁰Eiroroki intae Aristakos oena te nebo nanu, neiroroki intae Marko le nkanashe e Barnaba (Iindipa aanoto olkilikuai loo mbaa enyena - te neewuo ninye enitii, entang'amu),

¹¹neiroroki intae Yesu oji Yusto. Kulo tung'ana okuni ake loo lyahudi oora laisiaayiak le ncholiek aikisiaai enkitoria e Enkai, naataretutuo ninche.

¹²Eiroroki intae Epafras, laa obo linyi, osinka le Yesu Kristo, neiroroki intae, nedamu intae oshi ake oleng te nkomono enye, peyie intasheshe te mbulunoto neitisipi eyieunoto e Nkai tiatua intae.

¹³Kara shakeni lenye nchere etonyuaa aaisiaai intae naleng o lelo ootii Laodikea o lelo ootii Hierapolis.

¹⁴Eiroroki intae Luka oloshi abaani lanyor, neiroroki intae Demas.

¹⁵Enchoo lalashera laainei ootii Laodikea enkirorokino ai, ninchosho Nimfa o ina sirit natii enkaji enye.

¹⁶Naa ore pee eidipi aaisumaki intae ena palai enchoo sii eisumakini esirit oo Laodikea; naa entodol pee eisumakini sii ninche intae ina palai naing'uaa Laodikea.

¹⁷Naa entiaaki Arkipus, “Toduaa ake pee intabaya ina siaai nitang'amua tiatua Olaitoriani.”

¹⁸Nanu, Paulo oigero ena kirorokino te nkaina ai makewan. Entadamu ilpisia laainei. Metaa empiris e Nkai te nebo intae.