1 Timothy 1

¹Paulo, olkipaaret le Kristo Yesu te nkitanapata e Nkai Olaitajeunoni lang, o te Kristo Yesu osiligi lang.

²Aigeroki Timoteo, enkerai ai te sipata tiatua enkirukoto. Metaa enino empiris o lng'ur o eseriani eing'uaa Enkai Papa o Kristo Yesu Olaitoriani lang.

³Ore anaa enapa naaitanapa aloito Makedonia, tobiko te Efeso peyie intanap amitiki lelo kulikae elikioo pooki kiteng'enare napaashaa.

⁴Aashu eitanyamal ate too nkatinin o loo nkakuyiaa nemeeta enkiting'oto, neyau nkikilikuanat naapaashari neme enchetunoto e atua Enkai natii enkirukoto atua.

⁵Amu ore enaipirta enkitanapata ang naa enyorrata naing'uaa oltau owang o ltau sidai lemeeta nkibirribirrat torrok, enkirukoto nemetii esunkuroisho.

⁶Ore kulikae tung'ana netapaashari aapong kuna neidapashakino enchankar e pesho,

⁷eyieu ninche neaku ilaiteng'enak loo nkitanapat nemeyiolo nena naajoito aashu nena baa naaimaki aakurraki.

⁸Ore iyiook nikiyiolo aajo sidain inkitanapat te neasishore oltung'ani te sipata,

⁹kiyiolo ena nchere, ore nkitanapat, neitu eitanapisho te nkaraki lelo supati, kake te nkaraki lelo aasak loo ntorrok o loogolong'u o te nkaraki lelo lemeure Enkai o laing'okok o te nkaraki lelo lemesinya o loomorisho o te nkaraki lelo ooar iloo menye o looar inoo ng'otonye metuata o te nkaraki lelo ooitayu iloikop o

¹⁰loo loloito o loosokorisho o lapurrok loo ltung'ana o ilaimonkok, o loonya olmumai le lejare o lelo pooki oopaashare enkiteng'enare supat,

¹¹naipirare ilomon supati kituaak le Nkai namayiana, laaishooki nanu aaisiligie.

¹²Kaisho nanu Kristo Olaitoriani lang enashe, laa ninye laaishoo engolon naasishore nanu aatoduaa ajo kara olairukoni naagelaki ena kisiaayiare enye,

¹³hoo te natamoro apa enkarna enye naisilisil namor ninye: kake atang'amua olng'ur amu ataasa apa nena te modai maata enkirukoto,

¹⁴naaiputakini empiris o Laitoriani lang aaitadooyo te nebo o enkirukoto, o enyorrata natii atua Kristo Yesu.

¹⁵Ekesipa ena kiroroto, neishiaakino neng'amari nenyorrarri katukul inchere, eewuo Kristo enkop aitajeu ilooata ng'ok. Naa nanu oituruk too looata.

¹⁶Kake aatoduaka Enkai olng'ur paa ore tiatua nanu ara olaing'okoni torrono, neibalunye Yesu Kristo eng'iriata enye nalulunng'a, pee eaku enkitanyaanyukoto te lelo ooyooki aairuk ninye, netum enkishui nemeiting.

¹⁷Metaa eno Laiguanani loo lporori pooki, lemeye aekata, lemelioo, laa ninye ake Enkai, enkanyit o enkitoo intarasi o ntarasi, Eesai.

¹⁸Ena kitanapata aaishoo iyie, Timoteo, enkerai ai, te risioroto oo nkirorot e naibon nikimpirta iyie, pee kidumu ninche tijing'a ilo arrabal sidai.

¹⁹Imbung'a enkirukoto to ltau supat lemeeta nkibirribirrat torrok. Ore kulikae netanyaita enkikoo oo ltauja lenye neidaikie enkirukoto enye,

²⁰ore te lelo netii Hemanayo o Aleksanta laitarasaka Sheitani pee eiteng'eni meigil aamor Enkai.