2 Thessalonians 1

¹Paulo o Silvano o Timoteo, kingeroki esirit oo Lsesalonike e Nkai Papa lang o Laitoriani Yesu Kristo.

²Enoto empiris o eseriani naing'uaa Enkai Papa o Laitoriani Yesu Kristo.

³Meeta nchere pee mikincho Enkai enashe inkatitin pooki te nkaraki intae ilalashera o nkanashera, anaa enaishiaakino amu kegira enkirukoto inyi abulu oleng. Ore enyorrata e pooki ng'ae te intae to likae o likae neponari.

⁴Ina naa pee kiwuasare iyiook intae maate tiatua nena sirito e Nkai te nkitashoto inyi nemeiwuatiwuata o enkirukoto tiatua inkisilisilot inyi pooki, o tiatua isinaitin ling'iriri taata.

⁵Olmonekie ele le nkiguana nasipa e Nkai, pee etumi aaitaa intae ilooishiaakino enkitoria e Nkai naa te ninye eisilisilitoi intae.

⁶Ore te nkaraki natoduaa Enkai inchere esipata te nelaaki te nkisilisiloto lelo ooisilisilito intae,

⁷neisho intae ilooisilisiloki enkiyeng'iyeng te nebo iyiook, teina kata naibalunyeki Olaitoriani Yesu Kristo eing'uaa keper te nebo ilmalaika lenyena magil,

⁸tiatua enkima nayupuyup neyau enkitamioto e nkitalaata shumata kuldo lemeyiolo Enkai o shumata kuldo lemening Ilomon Supati lo Laitoriani lang Yesu.

⁹Keitamei te mutata oo ntarasi neorori aaitalam enetii Olaitoriani o enetii enkitoo e nkidimata enye.

¹⁰Ore te nelotu ninye teina olong pee eitaai kitok tiatua isinyat lenyena pee eing'asiakinoi ninye ti atua lelo pooki ooiruko nitii ntae, amu ore shakenisho ang te ntae neirukoki.

¹¹Ina pee kiomonoki oshiaake intae, pee eitaa intae Enkai ang ilooishiaakino te nkipototo enye, neitabaya pooki bae sidai o esiaai enkirukoto te ngolon enye.

¹²Paa ore enkarna o Laitoriani lang Yesu, neisisi tiatua intae, neisisi intae tiatua ninye, te risioroto e mpiris e Nkai ang o Laitoriani Yesu Kristo.