2 Thessalonians 2

¹Ore tialo elotunoto o Laitoriani lang Yesu Kristo o enkiturrurroto ang pee kinang'are ninye, kisai iyiook intae, ilalashera o nkanashera

²eminchosho eirrirrani indamunot inyi aasioki aashu eituria neme te nkiyang'et to rorei aashu te mpalai naji iyiook eing'uaa eji etabawua Enkolong o Laitoriani.

³Eminchosho ake oltung'ani elej intae te pooki oitoi, amu melotu ina olong eitu elotu eserserisho, neibalunyieki ilo tung'ani le ngogong'i, enkerai e nkiminata,

⁴okeshisho neilepie kewan eiba pooki toki ake ninye naji Enkai aashu ina naseremi, neitoton kewan to lorika te nkaji e Nkai, nelikioo kewan eitaa kewan Enkai.

⁵Aimidamumu intae aajo ore apa aboitare intae atolikio intae ena?

⁶Niyiololo intae entoki neton eibokito taata pee etumi aaibalunye ninye te nkata enye.

⁷Ore ina kisudoroto e ngogong'i neasisho taata, ore ilo oibooyo ninye neiko neijia o metaba anaa neiwuang'ieki ninye.

⁸Ore ina kata neibalunyieki ilo torrono, naa kear Olaitoriani Yesu te ntooma e nkutuk enye, naa keidaikie ninye ninye te liooto enye o te lotunoto enye.

⁹Ore te lotunoto e ilo torrono te ngolon e Sheitani, neasi te nkidimata pooki ilmonek le lejare o ne nking'asia,

¹⁰neleji lelo ooimin te monkoi e ntorroni amu etanyaita ninche enyorru esipata naidim aitajeu ninche.

¹¹Neaku eirriwaka ninche Enkai enkitarruorroto nagol, meiruko enda e monkoi,

¹²pee etumi aaiguanare lelo pooki lemeiruk esipata kake keshipakino entorroni.

¹³Kincho oshiaake Enkai enashe te nkaraki intae ilalashera oonyorri to Laitoriani, amu etegelua apa intae Enkai ebaiki enkiterunoto pee eitajeuni te nkoitoi e nkitisinyata te Nkiyang'et o te nkirukoto tiatua esipata.

¹⁴Eipotoko Enkai intae ena kirukoto te nkaraki Ilomon Supati likiyakita iyiook intae pee itumutumu enkitoo e nkisisa o Laitoriani lang Yesu Kristo.

¹⁵Ore naa ilalashera o nkanashera, entashoito emingusugus, embung'a entukurraki olkerreti likituutakita iyiook intae to rorei le nkutuk aashu te mpalai.

¹⁶Ore ninye Olaitoriani lang Yesu Kristo makewan, o Enkai Papa lang otonyorra iyiook, neisho iyiook enkilejilej oo ntarasi o siligi sidai oing'uaa empiris,

¹⁷meilejileja iltauja linyi neitasheiyie ninche tiatua enkiaas pooki sidai o to rorei.