Hebrews 10

¹Ore amu oloip ake le nena sidain naapuonu eeta nena kitanapat neme nekua tokitin naasipa naara, meidim aekata lelo asarri ooitaini te pooki ari, aaitaa bayarot lelo tung'ana oonyikaki.

²Amu te naa keidim anaata apa meekure eitaini. Te naa keitukuoki lelo aseremak, anaata meitoki aayioloiki ate ng'ok.

³Kake ore tiatua lelo asarri netii enkitadamunoto oo ng'ok anaake te pooki ari.

⁴Amu meidimayu metaa osarge loo loing'ok o lkineji ooya ng'ok.

⁵Naa ina paa, ore apa pee elotu Kristo enkop, nejo, “Ore ilasarri o nkishoorot nimiyieu kake kintobiraka iyie nanu osesen.

⁶Ore ilasarri oopeji o nkishorunot oo ng'ok neitu ishipakino iyie.

⁷Ina pee atejo, ‘Ng'ura nele nanu, oewuo pee aas eniyieu, eyieunoto ino, Na Ai ai!’ Anaa enatisiraki tialo nanu tiatua olpiyayati le mbuku.”

⁸Ore pee ejo te ine te shumata, “Eitu iyieu iyie neitu ishipakino ilasarri o nkishoorot naapeji o nkishoorot oo ng'ok.” (Neishooyioki kuna te risioroto anaa enajo nkitanapat),

⁹nenyaaka aponaa ajo, “Nele nanu, aewuo pee aas eyieunoto ino.” Keiwuang'ie ninye idia e dukuya peyie etum aitasheyie eniare.

¹⁰Naa ina eitukuyieki iyiook te nkishorunoto o sesen le Yesu Kristo nabo kata ake te rishata e pooki.

¹¹Neitashe olapolosani ake pooki anaake te siaai enye, neigil aitayu iloshi ake asarri, lemeidim aekata aawaita ng'ok.

¹²Kake ore pee eidip Kristo aitayu olasar loo ng'ok obo ake loo nkatitin pooki, neton ninye te nkaina e tatene e Nkai.

¹³Paa teine eton o metaba anaa neitaae ilmang'ati lenyena olorika loo nkejek enyena.

¹⁴Amu to lasar obo eitabayie ninye te nkata pooki lelo ooitukuoki.

¹⁵Neitaiki sii ninye iyiook enkiyang'et Sinyati shakeni; te nkata nasuju ejo,

¹⁶“Nele osotua laitayu nanu o ninche te siadi nena olong'i, Olaitoriani ojo, naa kapik inkitanapat aainei iltauja lenye, naiger ninche too ndamunot enye.”

¹⁷Neitoki aponaa nejo, “Ore ing'ok o nkitarruorrot enye nemaitoki adamu aekata.”

¹⁸Ore enetii empalakinoto e kuna, nemeitoki atii olasar loo ng'ok.

¹⁹Ore te nkaraki nena, ilalashera, ore naa amu eikiaata iyiook enkitieunoto nikijing'ie ine wueji sinyati to sarge le Yesu,

²⁰teina oitoi ng'ejuk naishu nataboloko ninye iyiook te ilo karasha, aa taa to sesen lenye,

²¹nikiaata sii olapolosani kitok oitore enkaji e Nkai.

²²Ematinyikaki to ltau osipa tiatua emborei e nkirukoto, neisuaakaki iyiook aaisuj ltauja lang metaa mikiaata nkibirribirrat torrok too ltauja lang neisujaki iseseni lang te nkare nasila.

²³Emaibung'a aakurraki elimunoto o siligi lang mikingusugus, amu keisiligayu ilo oishorua ina kisiligata;

²⁴naa ematadamu enikinkunakino olikae olikae enkisusunkat o enyorrata o siaaitin sidain.

²⁵Nimikipalaa entumo, anaa enatiu olkuaak le kulikae, kake intagolo olikae olikae neisul idolitata aajo etinyikua ina Olong.

²⁶Amu ti nikiaas ing'ok aaotiki kindipa aatang'amu eyiolounoto e sipata, nemeitokini aata olasar loo ng'ok,

²⁷kake enkuretisho e anyunoto e ndung'okinoto e nkiguana, o engoro e nkima namut lelo mang'ati.

²⁸Ore apa oltung'ani ogil nena kitanapat e Musa neye metii olng'ur te neetae shakenisho oo ltung'ana aare aashu okuni.

²⁹Ijo kebaa elusoo enkitamioto nayaki kewan oltung'ani oany Oinoti le Nkai, neisarkionie osarge lo sotua laa ninye eitukuyieki neitagor ina Kiyang'et e mpiris?

³⁰Amu eikiyiolo ilo otejo, “Enaai elap, nanu oitalaku.” Nejo sii, “Olaitoriani oiguanare iltung'ana lenyena.”

³¹Entoki naitureisho ti nibatatakino inkaik e Nkai naishu.

³²Kake entadamu sii intae napa olong'i e dukuya ina kata apa eidipaki aaitawang'aki intae, ning'iriri enkitirrishakinoto nagol te nebo o emion,

³³neaku kebolori intae metamori te dukuya olorere neisilisili intae, nitaa ti aekata encholiek e lelo ooikunaki neijia.

³⁴Amu iatata apa olng'ur too looena, nitonyorraitie te nchipai meishang'itieki masaa inyi, amu iyiololo apa aajo iatata intae maate entoki nalang naa enabikoo.

³⁵Ore te nkaraki ina, eminturraa naa empijan inyi, amu keeta olerrinyore kitok.

³⁶Amu meeta nchere pee ming'iriri, pee itumutumu aataas enayieu Enkai, ning'amumu ina kisiligata natolimuoki,

³⁷“Amu keng'or enkiti kata, pee elotu ilo olotu nemeimutie;

³⁸Kake enkirukoto eishuyie osinyati lai, naa te nerrinyo siadi, nemeshipakino oltau lai ninye.”

³⁹Kake mikira iyiook ile lelo oorrinyo siadi nemuti, kake kira ile lelo ooata enkirukoto negolie iltauja lenye.