Hebrews 11

¹Ore enkirukoto naa ninye naitadedeyie intokitin naaisiliguni, naa ninye enkitisipata e nena tokitin nemelioo.

²Amu te nkirukoto etonyorrarrie Enkai iltung'ana li apa.

³Te nkirukoto kiyiolo aajo eitayioki enkop te nkiroroto e Nkai, neaku ore kuna naadolitai naa too nemelioo eitobiraki.

⁴Te nkirukoto eyaka Abel Enkai olasar ong'amaroyu alang ole Kain, laa ninye etonyorrarrie Enkai ninye ajo eisupat. Etaa Enkai shakeni amu etang'amayie olasar lenye; etua ninye Abel kake ore te nkirukoto enye neton eirorita.

⁵Te nkirukoto ewaki Enok aailepie pee medol keeya; neitu etumi, amu Enkai naawa ninye. Naa ore eton eitu eilepieki neitisipaki nchere eitishipa ninye Enkai.

⁶Naa ore metii enkirukoto nemeidimayu peyie eitishipi Enkai. Amu ore pooki ng'ae oyieu nenyikaki Enkai keishiaa neiruk inchere keetae Enkai naa ninye oisho inkishoorot lelo ooing'oru ninye.

⁷Te nkirukoto eitoduaa Enkai Noa nena baa apa neton melioo, nening ninye neitobir esafina pee esaru enkaji enye; tena bae etudung'oko Noa enkop enkiguana neaku ninye olajung'oni le supatisho natumi te nkirukoto.

⁸Te nkirukoto etoning'ishe Abraham pee eipoti metupuku alo ewueji nelotu atum nejung; nepuku ninye nelo, nemeyiolo enelo.

⁹Te nkirukoto etobiko aa omoni teina kop naisiligieki, anaa te nkop eeiking'a naa ilng'oborri emany o Isaak o Yakobo, oora sii ninche ilajung'ok le ina kisiligata te nebo ninye.

¹⁰Amu ina anasa apa eanyita naata olkitamanyunoto, enaa ore oloshetu o loitobir naa Enkai.

¹¹Te nkirukoto enoto Sara enkidimata e ishoi hoo netaa moruo, netulusoitie ilarin lenyena, etoduaa ninye ajo keisiligayu ilo oishoo enkisiligata.

¹²Te nkaraki ena paa ore eimu oltung'ani obo, hoo netiu apa ninye anaa olotua enotoki eishoi naba te nkumoi anaa ilakir le shumata nemeikenayu, etiu anaa osinyai le mbata e naiposha.

¹³Etuata kulo pooki etii atua enkirukoto, neitu eng'amu ninche enapa naisiligieki, kake etoduaa neirorokito te nelakua, netolimutuo inchere ilomon ninche naa yararot ninche te nkop.

¹⁴Amu ore lelo tung'ana oojo neijia neibalunye inchere enkop apa nabikie eing'oru.

¹⁵Te naa kenkop apa natung'uaitie edamu ninche, anaata apa enoto erishata nashukore.

¹⁶Kake ore anaa enatiu, ae kop eyieu sidai teina, naa ene Keper, te nkaraki e ina pee mekurru Enkai te neji ninye Enkai enye, amu eitobiraka ninye ninche enkanasa.

¹⁷Te nkirukoto eitayio Abraham, Isaak, enapa kata pee etemi, aishooyo oinoti lenye obo,

¹⁸oloimakaki aajo, “Isaak eipotieki eishoi ino.”

¹⁹Etoduaa Abraham ajo keidim Enkai aitopiu iltung'ana ebaiki ilootuata; neaku ore teina kitanyaanyukoto, etushukoko Enkai Isaak Abraham too lootuata.

²⁰Te nkirukoto etamayiana Isaak Yakobo o Esau too naapuonu.

²¹Te nkirukoto, etaa keye, etamayiana Yakobo ilayiok le Yosef, eigarakino ninye elukunya e ntirma enye eirrugo aseremisho.

²²Te nkirukoto etaa keye Yosef, eimaka enaidurra oo Siraeli neutaki eneikunaa enukaroto enye.

²³Te nkirukoto, pee eini Musa, eisudoyioki lapaitin okuni intoiwuo enyena, amu etoduaa ninche aajo aisidai ina kerai; neitu eureyu ninche ina naitanapishe olaiguanani.

²⁴Te nkirukoto, etanya Musa, etubulua, eipoti aajo ole ntito e Farao,

²⁵nedutaa meinosieki osina te nebo iltung'ana le Nkai alang te neton aitumurru olkar loo ng'ok.

²⁶Etoduaa ajo emoroto namori te nkaraki Kristo naikash alang enkarsisisho o masaa kiroteti e Misiri, amu keanyita idia kishorunoto.

²⁷Te nkirukoto eshomo aing'uaa Misiri, neitu eiureyu engoro e ilo aiguanani; amu eting'iria anaa olodolita ilo lemelioo.

²⁸Te nkirukoto, eitayio Pasaka neisuaaya osarge, pee, mear ninche ilo Arani loo lkikaunot.

²⁹Te nkirukoto etalang'a lelo tung'ana enaiposha nanyokie anaa enkop natoyio; kake ore Ilmisiri pee etem aajo matalang, neya enkare.

³⁰Te nkirukoto etuurori isunta e Yeriko etamanaki too nkolong'i naapishana.

³¹Te nkirukoto pee eitu eari Rahab ina mulayoi, te nebo lelo apa kulikae lemening'isho, amu etang'amua ninye lelo aikitalak to sotua.

³²Naa kakua kulie naitoki ajo? Amu maata enkata naimakinye Gideon, Barak, Samson, Yepta, Daudi o Samuel o lelo oibonok le Nkai

³³ilaa te nkirukoto etimira inkitoriat, neitabaya te ngolon enkiguana oo sipat, neng'amu nkisiligat, neibooyo nkutukie oo lng'atunyo,

³⁴near olkutati le nkima, neilany enepi o lalem, netum enkidimata tiatua enchalan, neaku magil te njore, nemir injoreitin oo lmang'ati.

³⁵Etang'amutua inkituaak ilootuata lenye eitopiwuoki, Einosieki kulikae osina etanyaita elakuni, ejo pee eyooki aapiu te mpuaan nalang ina.

³⁶Eting'iria kulikae imorot o oshot, o metabaiki ilpisia o jila.

³⁷Eirruyaki too soito, nedung'i te musumeno aitaa are, neari to lalem nepuaya eishopito ndapan oo nkerra oo noo nkineji, ilaisinak o looisilisili neinyali,

³⁸ilemeishiakino enkop te netii nepuaya too lpurkel o too ldoinyio, o too rrumati o too nkapuniaa e nkop.

³⁹Ore kulo pooki, hoo neitadedeyieki te nkirukoto enye, neitu eng'amu ina kisiligata,

⁴⁰amu etasioko apa Enkai adol embae naikash te iyiook, inchere ore mikitii iyiook nemeitabari ninche.