Hebrews 4

¹Ore te nkaraki ina eton eetae enkisiligata najing'ieki enkiyeng'iyeng'ata e Nkai, emaing'ura ake pee meiguanareki ake likae linyi neji eturua ebaiki.

²Amu etabaikitia iyiook lelo omon supati anaa enatabaikitia sii ninche; kake ore ilo kilikuai otoning'o ninche neitu eret, amu eitu einepu enkirukoto tiatua lelo ootoning'o.

³Amu iyiook ilooiruko oojing ina kiyeng'iyeng'ata, anaa ina natejo Enkai nchere, “Ore anaa enainosa olmumai tiatua engoro ai nchere, ‘Mejing ae kata ninche enkiyeng'iyeng'ata ai ntarasi,’ ” hoo neidipate isiaaitin enyena ebaiki apake pee eitamanyuni enkop.

⁴Amu eimakaki enkolong e naapishana te dikae nejo nji, “Neyeng'iyeng'a Enkai te nkolong e naapishana eidipa isiaaitin enyena pooki.”

⁵Nenyaaka ake ajo teine wueji, “Mejing aekata ninche enkiyeng'iyeng'ata ai.”

⁶Ore naa amu ketiooyo pee ejing kulikae ine, ore lelo ootang'amutua lelo omon supati neitu ninche ejing te nkaraki neitu eiruk.

⁷Enyaaka naa Enkai apik ae olong, “Taata ena olong”, etejo te Daudi etulusoyie enkata naado, te lelo rorei ooidipaki aairoro, “Ore taata ena olong ti nining'ining'i oltoilo le Nkai, emintagol iltauja linyi.”

⁸Amu tenaa keidipa apa Yoshua aishoo ninche enkiyeng'iyeng'ata anaata eitu eitoki Enkai aimaki ae olong.

⁹Neaku eton ake eetae enkiyeng'iyeng'ata e Sabato oo ltung'ana le Nkai;

¹⁰amu ore pooki ng'ae, ojing enkiyeng'iyeng'ata e Nkai nepal sii ninye isiaaitin enyena anaa enatapala Enkai inenyena.

¹¹Ematonyok naa pee kijing ina kiyeng'iyeng'ata, pee mebatata hoo obo te ngolong'u naaijo ina apa enye.

¹²Amu keishu ororei le Nkai neeta engolon, nepi ninye alang olalem ake pooki opi mbat pokira, neimisho enarish oltau o enkiyang'et, neim irubat o ntolo, neyiolou indamunot o nkiguanat o ltau.

¹³Naa ore te dukuya Enkai, meetae hoo toki te nena naaitayioki naisudoro kake keibala pooki neboluno te dukuya inkonyek e ilo likiyaki imbaa ang.

¹⁴Ore naa amu kiaata olapolosani kitok oilepa keper, Yesu, Oinoti le Nkai, ematukurraki aaibung elimunoto ang.

¹⁵Amu mme olapolosani likiaata olemeidim atayiolo enchalan ang, kake ore ilo obo likiata naa oloidipaki apa aatetem anaa enatemitae iyiook, kake eitu eas ninye ng'ok.

¹⁶Ematinyikaki naa ilo orika le mpiris kintieu, pee king'amu olng'ur nikitum empiris naretu iyiook te nkata e ngoloto.