Hebrews 5

¹Amu ore olapolosani ake pooki ogeluni tiatua olorere netegeluaki metaasisho te nkaraki olorere tialo Enkai, neitayu nkishoorot o lasarri te nkaraki ing'ok.

²Neidim ninye ataretu te mborron ilmoda o lwushuush, enapita ninye makewan enchalan enye.

³Ore te nkaraki ena, meeta nchere pee meng'as aitayu olasar loo ng'ok enyena makewan neitayu sii noo ilkulikae tung'ana.

⁴Nemeetae oloisho kewan ina kitoo, kake Enkai naipot, anaa apa pee eipot Aron.

⁵Neaku ore sii ninye Kristo eitu eilepie kewan meitaae olapolosani kitok, kake ketegelua ilo otiaaka ninye, “Ira iyie Oinoti lai taata aatoiwuo iyie,”

⁶anaa pee ejo te dikae wueji, “Ira iyie olapolosani ntarasi, to lkerreti le Melkisedek.”

⁷Ore too nkolong'i enyena o sesen etoomonuo Yesu esaisho, nebuaku oleng too lkiyio, esai ilo apa oidim aitajeu te keeya, netoning'oki ninye te nkaraki naure ninye Enkai.

⁸Amu ore hoo naa Oinoti ninye le Nkai, eitamoo kewan enkirukoto teina mion nanoto,

⁹naa ore amu eitabayioki, etaa ninye enjeunoto oo ntarasi te lelo pooki ooning ninye,

¹⁰neitaa Enkai ninye olapolosani kitok to lkerreti le Melkisedek.

¹¹Ore tena bae naa keetae nkumok naaji naagol elimunoto, amu eijo ketagolo intae ilukuny mining'ung'u.

¹²Amu ore aa intae naaji taata ilaiteng'enak, eton eiririkino tenelotu likae aigilie aiteng'en intae nkiterunot o rorei le Nkai. Eton aa kule naairirikino intae, mme endaa nagol;

¹³amu ore pooki ng'ae laa kule ake eishuyie naa kaalani to rorei le supatisho, amu eton aa enkerai ninye.

¹⁴Kake ore endaa nagol naa enoo ltung'ana botoro, ene lelo ooiteng'enaki to lmoo metayiolo aatirishu isupati o ntorrok.