Mark 3

¹Neitoki Yesu ajing enkaji e ntumo, netii ine oltung'ani oikaolo enkeeya enkaina.

²Neing'or iltung'ana ninye tenaa keishiunye ilo tamoyiai te nkolong e Sabato, pee etum aaitang'oro ninye.

³Nejoki Yesu ilo tung'ani oikaole enkaina “Wou ene.”

⁴Nejoki ninche, “Kaa naishoruno too nkitanapat mataas te nkolong e Sabato, metaasi isupati anaa metaasi intorrok, meitopoki ana metaari metua?” Kake etigirate lelo tung'ana.

⁵Nekurraki Yesu pooki nkonyek te ngoro, eisinanuo te nkaraki nerook oishuaa, nejoki ilo tung'ani “Intorioi enkaina ino!” Neitorioo, neishiu, enkaina.

⁶Neipang Ilfarisayo, nepuo nabo kata aanya enkiguana eboitare esirit oo le Herode, pee egilunore ninye eing'oru olosek oarie Yesu metua.

⁷Nerrinyo Yesu teine te nebo o lkipaareta lenyena aapuo enaiposha e Galilaya, nesuj olorora kitok oing'uaa Galilaya; o looing'uaa Yudea

⁸o Yerusalem o Idumea o lido kekun le Yordan o lorora kitok oing'uaa Tiro o Sidon; etoning'o nena pooki naataasa Yesu, nepuonu enetii ninye.

⁹Nejoki lkipaareta lenyena meitobirakini empeut te nkaraki olorere, pee merratanyi ninye;

¹⁰amu eidipa aishiunye lkumok, ometaa keiding'akino lelo pooki oomuoyiaa ejo maiseyie.

¹¹Naa ore ake pee emaniki iloiriruani ooiduruk, nerriaa te dukuya ninye ebuaku aajo, “Ira iyie Enkerai e Nkai!”

¹²Nekurraki areiki ajoki pee melikioo.

¹³Neilepaki Yesu oldoinyo, neipotu lelo ooyieu ninye openy nepuonu enetii ninye.

¹⁴Negelu tomon o aare, ooisiritore ninye, pee etum airriwai metolikioi ororei le Nkai;

¹⁵neisho ninche enkitoria naararie iloiriruani.

¹⁶Neisho Simon enkarna ajo Petero;

¹⁷Yakobo le Sebedayo, o Yohana olalashe Yakobo, neisho lelo enkarna ajo Boanerge, aa keji Ilenkikurrukur:

¹⁸Andrea, o Filipo, o Bartolomayo, o Matayo, o Tomas, o Yakobo le Alfayo o Tadayo, o Simon olkanaani,

¹⁹o Yudas Iskariot, laa ninye otakaldayie. Nelo ang.

²⁰Neitoki ake olorere aasoto, metaa metumoki Yesu o lkipaareta lenyena aainosa endaa.

²¹Ore pee ening iltung'ana lenyena le sotua, nepuo pee epuo aaibung, amu kejo, “Etarruoyie elukunya.”

²²Nejo laiteng'enak loo nkitanapat ootadoutuo eing'uaa Yerusalem, “Beelsebul eeta, naa ninye etumie engolon naararie loiriruani.”

²³Neipotu enetii ninye, nejoki too nkitanyaanyukot, “Kaji eiko pee eidim Sheitani ataarai Sheitani?

²⁴Teneoro enkitoria tiatua, nemeidim ina kitoria aitasho.

²⁵Naa te neoro enkaji tiatua kewan, nemeidim ina aji aitasho.

²⁶Naa te netudumakine Sheitani kewan aor, meitashe, kake keiting.

²⁷Meetae oltung'ani oidim atijing'a enkaji o ltung'ani ogol nearaa masaa enyena, eitu eng'as aen ilo ogol, pee etumoki taa ataara enkaji enye.

²⁸Esipa ajoki intae, epalakini ltung'ana ng'ok pooki, o emorore pooki namorisho ake;

²⁹kake ore oloba anaa olomor Enkiyang'et sinyati, metum empalakinoto aikata, kake etum eng'oki ntarasi.”

³⁰Amu ketejo ninche, “Oloirirua oiduruk eeta ninye.”

³¹Nelotu ng'otonye Yesu o lalashera lenyena; ore eitashe ninche te boo neirriwaa enkutuk meipoti ninye.

³²Netoni olorere aamanita ninye; nejokini, “Etii ng'utunyi o lalashera linono boo kinkilikuanu.”

³³Newaliki ajoki, “Ai ng'ae yieyio o lalashera laainei?”

³⁴Ore pee eitaman inkonyek lelo oomanita ninye, nejo, “Noolo yieyio o lalashera laainei!

³⁵Ore pooki ng'ae oas enayieu Enkai, ninye olalashe lai, o enkanashe ai o yieyio.”