Mark 4

¹Neitoki Yesu aiteru aiteng'enisho te mbata e naiposha e Galilaya. Neiturrurrokino iltung'ana kumok oleng, o metijing'a atua empeut aton tiatua enaiposha; netoni lelo tung'anak te nkop natoyio te mbata e naiposha.

²Neutaki Yesu ninche mbaa kumok too nkitanyaanyukot nejoki:

³“Entoning! Eshomo olaunoni aunisho.

⁴Ore eunisho nedoiki kulikae anterera embata e nkoitoi, nepuonu motonyi aanya.

⁵Nedoiki kulikae enkop oo soito nemetii inkulupuok kumok, nesioki aabulu, naa ore ake pee ebulu amu megut nkulupuok;

⁶ore pee eilepu enkolong nepej, naa ore amu meeta intona netoyu.

⁷Nedoiki kulikae anterera atua lkiku nebulu lelo kiku negor, metaa eitu eiu ilng'anayio.

⁸Nedoiki kulikae anterera atua nkulupuok sidain nebulu neiu ilng'anayio, neponari aaiu maa tomoni uni, maa ntomoni ile, maa iip.”

⁹Nejo Yesu, “Oloata nkiyiaa naaning'ishore, toning'o.”

¹⁰Ore etaa Yesu ake, neikilikuan lelo ooboitare tenebo lkipaareta lenyena enajo nena kitanyaanyukot.

¹¹Nejoki Yesu, “Eishooki intae entayiolo mbaa nemeibala e nkitoria e Nkai, kake ore te lelo ootii auluo, etiu mbaa pooki anaa nkitanyaanyukot;

¹²pee te neing'or, neing'or nemedol, naa te nening, nening nemejing'aa, pee meibelekenyakino ake Enkai, nepalakini.”

¹³Nejoki Yesu ninche, “Aimining'ung'u ena kitanyaanyukoto? Kaji naa inkoko pee ining'ung'u nkulie kitanyaanyukot pooki?

¹⁴“Ore olaunoni, ororei eun.

¹⁵Naa kulo ilootii embata e nkoitoi, ine eunieki ororei. Ore pee ening; nelotu Sheitani nabo kata aya ilo rorei otuunoki tiatua ninche.

¹⁶Naa inji etiu lelo ootuunoki te nkop oo soito, lelo laa, ore pee ening ororei, neng'amu nabo kata te ng'ida;

¹⁷nemeeta ntona tiatua ate, kake kebikie enkiti kata; kake ore pee elotu osina anaa enkisilisilore te nkaraki ilo rorei, nerrorro nabo kata.

¹⁸Ore lelo ootunokoki atua lkiku; naa lelo ooning ilo rorei,

¹⁹kake ore pee ejing'aki nyamalaritin e nkop, o eng'ida oo masaa, o eng'uarrata e kulie tokitin, negor ilo rorei, metaa meisho etum ilng'anayio.

²⁰Kake ore lelo ootuunokoki enkulupuoni sidai, naa lelo ooning ilo rorei neiruk nepik iltauja neiu ilng'anayio maa tomoni uni, maa ntomoni ile, maa iip.”

²¹Nejoki Yesu ninche, “Keyauni oltaa nepising'ari to ltoo, aashu epiki orunku le erruat? Mme eneiperere epiki?

²²Amu meetae entoki naisudoyioki neme keji ake pee eibalunyeki; nemeetae entoki natunukaki neme keji ake pee eibalayu.

²³Oloata nkiyiaa naaning'ishore, toning'o.”

²⁴Nejoki ninche, “Enining'o entobiraki ena nining'itoto; amu ore emborei ninchooyo iyie naa ninye kinchori sii iyie, nikiponikini.

²⁵Amu keponikini ilo oata aaisho kulie; ore ilo lemeeta, neoruni ina naata.”

²⁶Nejo Yesu, “Etiu enkitoria e Nkai anaa te neisuaaki oltung'ani lanterera enkop.

²⁷Neirura, neinyototo dama o kewarie, nerumishoyu lanterera nebulu, nemeyiolo ninye eneikununye.

²⁸Enkop naitubulu openy, neng'asunye mbenek, neitoki ntapuka neitoki ilng'anayio aabulaki.

²⁹Kake ore pee eku ilng'anayio, neitayu oltung'ani olalem adung'u amu etabawua enkikesare.”

³⁰Nejo Yesu, “Kainyoo kintanyaanyukie enkitoria e Nkai, anaa kaa kitanyaanyukoto kiaasishore te ninye?

³¹Etiu anaa enkantererai kini, enaa ore euni te nkop, ninye enkini aisul ilanterera le nkop;

³²kake ore pee euni nebulu, aisul inkeek e ntim, neitayu lng'osil, o metaa kepuonu imotonyi e shumata aapik inkajijik oloip lenye.”

³³Neinosaki Yesu iltung'anak ilo rorei aiko neijia too nkitanyaanyukot kumok, anaa enaidima ninche aatoning.

³⁴Neitu eirorie metii enkitanyaanyukoto, kake ore pee eaku ninye ake o lkipaareta lenyena neibalakinye ninche pooki toki.

³⁵Ore ina olong pee eaku teipa, nejoki Yesu lkipaareta lenyena, “Ematalang aapuo lido kekun.”

³⁶Neing'uaa olorere nerik ninche ninye, etiu anaa duoo ake, teina peut. Netii kulie peuti ine te nebo ninye.

³⁷Nedumunye olkutati kitok, nedam ilopir le nkare ina peut, o metaa keiput enkare.

³⁸Kake etii ninye Yesu siadi empeut, eirura epetita enkirishet e lukunya; neinyeyie lkipaareta lenyena ninye nejoki, “Olaiteng'enani, aimme toki te iyie te nikindaaya?”

³⁹Neinyototo Yesu neisikong osiwuo, nejoki enaiposha, “Tigirayu! Ntirring'ayu.” Neish osiwuo, neitiring'a enkare oleng.

⁴⁰Nejoki ninche, “Kainyoo pee itureishote?”

⁴¹Neiputukuny ninche, nejokino, “Ai ng'ae doi ele? Olaa kening ninye osiwuo o enaiposha?”