Mark 5

¹Nebaiki Yesu o loiteng'eni lenyena olikae kekun le naiposha, te enkop oo Lgerasene.

²Ore pee edou Yesu te mpeut, nenang'are nabo kata oltung'ani otamanya nkuraren, eeta oloirirua oiduruk:

³nemeetae oltung'ani oidima ateena ninye too lpisia.

⁴Amu eteenaki katitin kumok too lpisia; nemeeta hoo obo oidimua aitoborro.

⁵Naa kebuakita ake dama o kewarie too nkuraren o to o ldoinyo, near kewan too soito.

⁶Ore pee edol Yesu te nelakua, nekuet aserem ninye.

⁷Nebuaku to ltoilo sapuk, ajo, “Kainyoo kiatayie nanu, Yesu, Enkerai e Nkai natii Shumata Aisul? Aatasayia te Nkai, mikisilisil.”

⁸Amu ketiaaka, “Tupuku tung'uai ilo tung'ani, lo oirirua oiduruk!”

⁹Neikilikuan Yesu ajoki, “Aikiji ng'ae?” Newaliki ajoki, “Kaaji empuoto; amu aikira kumok.”

¹⁰Nesai ninche Yesuoleng pee mearaa teinakop.

¹¹Netii eluaata oo lbitiro nadaa teine te mbata o ldoinyo.

¹²Nesai iloiriruani Yesu aajoki, “Irriwai iyiook maape aajing kuldo bitiro, nchoo iyiook matijing.”

¹³Neisho Yesu meshomo. Nepuku lelo oiriruani ooiduruk nejing lelo bitiro; ore ina luaata, nabaya nkalifuni are, neipirri aadoyio to loshong'ishong'i neng'orokino enaiposha, neimis te naiposha.

¹⁴Neisik ilchekuti lenye, nepuo aalikioo teina anasa o teina kop. Nepuonu ltung'ana aadol enataase.

¹⁵Nepuonu enetii Yesu, nedol oladuoo tung'ani oata oloirrirua eton teine, eishopo naa biyoto enkorrok enye, oladuoo otang'asa aata empuoto oo loiriruani: neureishoyu ninche.

¹⁶Ore lelo ootoduaa ina nelikioo nena nataasate te ilo apa otang'asa aata iloiriruani o too lbitiro.

¹⁷Neiteru aaomon Yesu metung'uai ina latia enye.

¹⁸Ore ejing'ita Yesu empeut, neomon ilo apa otang'asa aata iloiriruani eji pee eisiritore.

¹⁹Kake etanya Yesu nejoki, “Shomo ang enetii ilchoreta linono, toliki ninche eneba enikintaasa Olaitoriani, o eneikuna pee king'urrie.”

²⁰Nelo ilo tung'ani neiteru alikioo te Dekapoli nena naaitaasa Yesu ninye; neing'asia ltung'ana pooki.

²¹Ore pee eitoki Yesu alang'aki olikae kekun, neiturrurrokino olorora kitok; etii ninye embata e naiposha.

²²Nelotu ina kata obo le lelo ooitore enkaji e ntumo, oji enkarna Yairo; ore pee edol Yesu, nebatata too nkejek enyena.

²³Nesai, ajoki, “Etaa keye entito ai kiti. Wou inteleiki nkaik, pee eishiu, nepok.”

²⁴Neiriamariyie Yesu ninye. Nesuj iltung'ana kumok aaiding'akino.

²⁵Netii enkitok natawe larin tomon o aare,

²⁶netanyamala oleng eruk ilabaak kumok, netumuta ntokitin pooki apa naata, nepal enaikashu, neponari arrishu.

²⁷Netoning'o eimakini Yesu, neimu te siadi tiatua olorere neiseyie olkila lenye.

²⁸Amu etejo, “Te naiseyie ninye olkila lenye, naishiu.”

²⁹Negem nabo kata ewooto enye, nening to sesen lenye nchere eishiunyeki emuoyian enye.

³⁰Ore Yesu, etayiolo ajo eshomo engolon aing'uaa ninye, neibelekenya nabo kata tiatua olorere, nejo, “Ai ng'ae naaiseyie lkilani laainei?”

³¹Nejoki lkipaareta lenyena, “Idolita iltung'ana kumok kinding'akino, nintoki ajo, ‘Ai ng'ae naaiseyie?’ ”

³²Neing'orisho Yesu pee edol olotaasa ina.

³³Kake eishoo ina kitok pee edol enaitaasaki, nelotu te nkuretisho eikirikira, nebatata te dukuya ninye, neliki sipat pooki.

³⁴Nejoki Yesu ninye, “Na kerai, kinchiunye enkirukoto ino; shomo te seriani, ninchiu emuoyian ino.”

³⁵Ore eton eirorita Yesu, nepuonu ilooing'uaa enkaji e ilo oitore enkaji e ntumo nejo, “Etua entito ino kainyoo pee intoki aitanyamal Olaiteng'enani?”

³⁶Kake eitu eshilaa Yesu ina natejoki, nejoki oloitore enkaji e ntumo, “Miureishoyu, iruko ake iyie.”

³⁷Neitu eisho likae tung'ani metusuja ninye leme Petero ake o Yakobo o Yohana olalashe Yakobo.

³⁸Ore pee ebaiki ninche enkaji e ilo oitore enkaji e ntumo, nedol olong'oling'oli lo lorere ooishirita nebuaku aaishir oleng.

³⁹Ore pee ejing atua, nejoki ninche, “Kainyoo pee inchirishiri aabuaku? Eitu eye enkerai keirura.”

⁴⁰Nekueniyie iltung'ana ninye. Kake eipang'ie Yesu lelo pooki boo, nerik menye enkerai o ng'otonye o lelo ooiriamunore, nejing ine netii enkerai.

⁴¹Neibung enkaina nejoki, “Talita kumi;” eji, “Entito kinyi, aajoki inyo.”

⁴²Neinyototo nabo kata entito aitashe nelo, amu enoo larin tomon o aare embotoro enye. Ore nabo kata neing'asia iltung'ana oleng.

⁴³Nereiki Yesu ajoki pee meliki hoo likae tung'ani ena bae nejoki ninche meishoo ina tito endaa nanya.