Philemon 1

¹Paulo oena te nkaraki Yesu Kristo o Timoteo olalashe lang - kingeroki Filimon likinyor oasisho te nebo iyiook

²o Afia enkanashe ang o Arkipos osikari te nebo iyiook, o esirit natii atua enkaji ino.

³Meeu empiris enitii o eseriani eing'uaa Enkai Papa lang o Laitoriani Yesu Kristo.

⁴Aisho Enkai ai enashe te naadamu iyie te nkomono ai,

⁵amu aning'ito enyorrata ino o enkirukoto niaata ti atua Olaitoriani Yesu o lelo sinyat.

⁶Naomon paa ore ing'arie ilkulikae enkirukoto ino, neitubulaa eyiolounoto enena pooki supati naara nkunaang ti atua Kristo.

⁷Amu anoto nanu eng'ida sapuk o enkilejilejata naayaka enyorrata ino, olalashe lai, amu eitagoloki iltauja loo sinyat te nkaraki iyie.

⁸Ore etiu neijia, hoo naaitieu ti atua Kristo, aaitanap taasa ina naishiaakino,

⁹Kake ore te nkaraki enyorrata, nayieu naasai nanu Paulo, Olbalusui lo Laitoriani naena taata te nkaraki Kristo Yesu

¹⁰aasai nanu iyie te nkaraki enkerai ai Onesimas, ataa nanu menye ti atua eenata ai.

¹¹(Ore apa te dukuya naa pesho ninye te iyie, kake ore taata netaa ole tipat oleng, te iyie o te nanu.)

¹²Naa kairriu nanu ninye metushukunye enitii, airriu oltau lai kewan.

¹³Kayieu naaji naa kaiboo maataboitare, peyie aatum aisiaayia te rishata ino, te enata ai te nkaraki Ororei Supat;

¹⁴kake atejo maas aetoki eitu atum ewalata ino pee metiu esupatisho ino anaa earakinoto kake pee eaku eyieunoto ino makewan.

¹⁵Ebaiki naa ina apa pee kintung'uayioki Onesimas te nkiti kata, pee kintokini aaitaboitaki ntarasi,

¹⁶meekure aa orrindik, kake etuluso alang orrindik, etaa olalashe onyorri, eisulaki te nanu kake eisul naa oleng te iyie, te pokira are to sesen o to Laitoriani.

¹⁷Metaa te naa eikinken nanu ajo kira nabo, tang'amu ninye anaa naaji eniking'amu nanu.

¹⁸Te nikinyala apa ninye ti ae bae aashu te neeta esile ino e ae toki, nchoo eaku esile ai.

¹⁹Nanu Paulo oigero ena te nkaina ai makewan. Ekalak nemaimaki esile nikiaatayie nanu ebaiki kewan ino.

²⁰Ee, olalashe kayieu nanu dupoto te iyie ti atua Olaitoriani. Entagolo oltau lai ti atua Kristo.

²¹Ore amu kaaisilig ajo ining'isho, aaigeroki kuna ayiolo ajo ias oleng aitulus enatejo.

²²Ore te nebo nena, intobirakaki olgilata loo lomon, amu aisilig ajo ore te nkaraki enkomono inyi naa kaaishori nanu maeu enitii intae.

²³Kirriwaki enkirorokino Epafras, ilo oena te nebo nanu te nkaraki Kristo Yesu.

²⁴Naa neijia etiu Marko, o Aristakos o Demas o Luka ooasisho tenebo nanu.

²⁵Metaa empiris o Laitoriani Yesu Kristo te nebo enkiyang'et inyi.