Titus 3

¹Ntadamu iltung'ana metaa ilooning'isho too laitoriak nening'isho, neas pooki siaai metii esunkuroisho,

²nememor likae tung'ani, nepaash olarrabal, neaku loobor, neitoduaaya esupatisho too ltung'ana pooki.

³Amu eikira sii apa iyiook ilmoda, nikigolong'u, neitapong'oyioki iyiook, nikiaaku rrindiki loo ng'uarrat o sikarri oo mpukunot pooki, nikinturraa nkolong'i ang te ntorroni o lom, neibayuni iyiook iltung'ana nikimbayuno iyiook maate;

⁴kake ore ake pee eliooyu esidano o enyorrata o esupatisho e Nkai Olaitajeunoni lang,

⁵neitajeu ninye iyiook neme te nkaraki nkiasin nikitaasa iyiook tiatua esupatisho, kake te nkaraki olng'ur lenye, te nkitukuoto o enkitang'ejukoto o einoto tiatua Enkiyang'et Sinyati,

⁶ina natubukoko ninye iyiook te nkiputakinoto tiatua Yesu Kristo Olaitajeunoni lang,

⁷pee eikenaki iyiook esupatisho te mpiris enye nikiaaku ilajung'ok lo siligi le nkishui oo ntarasi. Ororei osipa ele.

⁸Kayieu naa nimbung akurraki kuna baa, peyie aa ore ilooiruko Enkai nejurru aaitayiolo ate nkiasin sidain; kuna ninche sidain naata dupoto too ltung'ana.

⁹Kake tapaasha nkirorot emodai o ishoritin oo lmakui o mpaasharot o enchankar oo mbaa oo nkitanapat, amu meeta eretoto naa pesho.

¹⁰Ore oltung'ani okepari indipa aikoo ninye ene dukuya o eniare, talama.

¹¹Iyiolo ajo ore oltung'ani oikununo inji netapong'ori naa kaaing'okoni netudung'oko kewan enkiguana.

¹²Te nairriu nanu Atemas aashu Tikikos meeu enitii, tonyuaa oleng, wou ene natii te Nikapolis, amu atonyorayie pee aton teine te nkata e nkirobi.

¹³Tonyuaa isosionie Senos, ilo aiteng'enani loo nkitanapat o Apolos te lototo enye; nimincho eng'oriki hoo toki.

¹⁴Naa nchoo iltung'ana lang meitamoo ate nkiasin sidain, pee eretu nkolati naarrish pee meaku ilemeeta ilng'anayio.

¹⁵Eirriwaki intae enkirorokino kulo pooki laboitare. Iroroki lelo pooki oonyor iyiook tiatua enkirukoto. Metaa empiris e Nkai te nebo intae pooki.