Revelation 3

¹“Naa ore to lmalaika le sirit natii atua Sardis, ing'ero nchere, ‘Irorei le ilo oata nena kiyang'eta naapishana e Nkai o lelo akir oopishana. “ ‘Kayiolo isiaaitin inono, iata enkarna anaa oltung'ani oishu, nitua.

²Tuputunye naa nintagol ina natelekua netaa keye, amu eitu ainepu isiaaitin inono aa bayarot too nkonyek e Nkai ai.

³Tadamu naa ina apa nitang'amua o nitoning'o, mbung'a ina nirridu. Te nimiputunye nalotu anaa olapurroni, nimiyiolou ajo kaa saa alotunyie enitii iyie.

⁴Neton ake iatata nkuti arn tiatua Sardis, iltung'ana leitu epik oloirerio inkilani enye, naa kaairiamariyie ninche nanu eishopo inkilani naaibor amu keiririkino ninche.

⁵Ore ilo omirisho neikodi aaiko nejia too nkilani naaibor, nemajut enkarna enye te mbuku e mpuaan; naishakenoki enkarna enye te dukuya Papa lai o te dukuya ilmalaika lenyena.

⁶Oloata enkiok, nchoo ening enajoki Enkiyang'et nena sirito.’

⁷“Naa ore to lmalaika le sirit natii atua Filadelfia, ingeroki nchere, ‘Irorei le ilo Obo Sinyati, olosipa, oloata embolet e Daudi, olobol nemeetae likae oiken, oloiken nemeetae likae obol.

⁸“ ‘Kayiolo nkiaasin inono. Ng'ura ajo atipika dukuya iyie kutukaji nabolo nemeidim hoo ng'ae aikeno; kayiolo ajo enkiti golon iata, kake imbung'a ororei lai neitu imiki enkarna ai.

⁹Ng'ura ajo kareu lelo le nkaji e ntumo e Sheitani oojo ate Ilyahudi neme ninche, kake kelejisho, kareu ninche meetu aairrugokino inkejek inono neyiolou nchere aatonyorra nanu iyie.

¹⁰Ore amu imbung'a ororei lai te nyuaata o eng'iriata, ekaarrip teina saa oo ntemat nalotu enkop pooki, atem lelo ootii enkop.

¹¹Ekalotu asieku. Imbung'a tukurraki ina niaata pee mikioru ake likae enkopiyia ino e nkitoo.

¹²Ore ilo omirisho naitaa ninye eng'ape tiatua enkaji e Nkai ai, nemeitoki aekata aipang aing'uaa ine, naa kasiraki ninye enkarna e Nkai ai, o enkarna e nkanasa e Nkai ai, ina Yerusalem nadou eing'uaa Enkai ai te keper o enkarna ai kewan ng'ejuk.

¹³Oloata enkiok, nchoo ening enajoki Enkiyang'et nena sirito.’

¹⁴“Naa ore too lmalaika le sirit natii atua Laodikea, ingeroki, ‘Irorei le ilo oji Eesai, Oloisiligayu naa olchakeni osipa, naa ninye enkiterunoto e nkitobirata naitobira Enkai seuseu.

¹⁵“ ‘Kayiolo inkiaasin inono. Mirobi iyie nimirowua, oi imut airopiju aashu irowuaju.

¹⁶Neaku ore amu imololong, mirobi nimirowua, ekaanotu aitayu te nkutuk ai.

¹⁷Amu ijo iyie, Kara nanu karsis, atudupe, malau toki. Nimiyiolo iyie ajo ira menati, ira tolut, nira olaisinani modooni niminchopo.

¹⁸Ore te nkaraki ina, aaikok iyie naa pee inyiang'u te nanu saabu natisilaki te nkima, pee itum ataa karsis, ninchop ilkilani ooibor pee eitemoo enkurruna e masipaisho ino, meitokini aadol, o lchani liyelie nkonyek inono pee idolishoyu.

¹⁹Ore lelo lanyor naa kaisikong naitame metaa, tonyuaa naa irridu.

²⁰Ng'ura ajo aitashe te kutukaji naoshiosh, ore ake pooki ng'ae oning oltoilo lai nebol kutukaji, naa kajing'aki nanu;

²¹nalo anya endaa te nebo ninye, nenya sii ninye te nebo nanu. Ore ilo omirisho naa kaisho ninye metotona te nebo nanu to lorika lai le nkitoo anaa apa enatimirishe nanu, naton te nebo Papa lai to lorika lenye le nkitoo.

²²Oloata enkiok nchoo ening enajoki Enkiyang'et nena sirito.’ ”